Atthu yaanaakhelela miteko ni sowiixuttiha sa Yesu, moovarihana ni mukhalelo wa murima aya. Eyo ti etthu yiiraneyale etthoko emosa oGalileya. NFarisi mmosa iihaniwa Simoni, aahimulattula Yesu wira alye owannyawe. Woonasa wene, aaphavela wira omoone Yesu opakaka miiriirya. Okhala wira aahoona okhala eparakha ya waalaleerya atthu ale, Yesu aaheemererya. Ntoko eemerenrya awe nlattulo na orowa olya ni alipa-ooliviha mpoosito ni anatampi.

Masi Yesu khaakheliwe ntoko yaakheliwa aya aletto. Okhala wira iphiro sa oPalestina saanisareya ntthupi, atthu yaaninanara inawu hata yaawara isandalya. Tivonto, yaari yoolema orapihiwa ni maasi ooriirya inawu sa aletto. Masi Simoni khaarapinhe inawu sa Yesu. Nave khanvanhe ebeexo ntoko yaalimalenle aya. Yoolema ekina yaari wiitthela makhura mmuruni mwa aletto yooniheryaka waareerela murima ni owaakhela saana. Okathi Yesu aaphiyale awe, Simoni khaapanke eyo. Niireke aahimwaakhela saana?

Vano waahiphiya okathi woolya, nto aletto otheene yaari vameesa. Alyaaka, aahikela muthiyana ahaalattuliwe. Muthiyana owo aasuweliwe okhala “namuttompe” aahiiso natampi. (Luka 7:37) Ekeekhai wira atthu otheene aattheka. Masi muthiyana ole aarina mweettelo woohiloka, woonasa wene aari namararuwa. Pooti wira aahiiwa sowiixuttiha sa Yesu, ohela muhina nlattulo na Yesu noowi “nyuwo othene mukhulumunwe, mulemeliwene muritti mulupale, mukirwele miyo: komumuliheni”. (Matheyo 11:28, 29) Woonasa wene, masu ni miteko sa Yesu ti saamwiirinhe muthiyana ole omwaavya Yesu.

Nto aahimwaattamela Yesu khukokhora waattamela inawu sa Yesu. Vano maithori awe yaaninaaniha inawu sa Yesu, onapuputtha ni ikharari sawe. Mooreerela aahibexari inawu sa Yesu ni aahiitthela makhura oowunkhela. Okhala wira Simoni khaasiveliwe, owo aahihimya wira: “Yes’ula, àri profeta, ammusuwela muthiyan’ola oninvarakasa, amusuwela makhalelo awe, mana ola natampí!”​—Luka 7:39.

Osuwelaka ele Simoni uupuwela awe, Yesu aahimmye so: “Simoni, kihana etthu yo wohimeryani”. Simoni aahaakhula wira: “Mwixuttihi, muhimyeke”. Yesu aahiira: “Mutthu mmosá ahikopheliwa n’atthu anli: mukina amukophenle imiya mulokó [1.000], mukina amukophenle ilívura mulokó [10]. Vano, okhala wira owànli aya khiyàrina y’omulivana, ahalevelela. Vano, w’atthu awo, t’ani onrowa omphentexa yowo?” Moohaaniherya, Simoni aahaakhula wira: “Kinona wira t’ule àleveleliwe imiya mulokó!”​—Luka 7:40-43.

Yesu aaheemererya. Nto onwehaka muthiyana ole, Yesu aahimuleela Simoni wira: “Munnimona muthiyan’ola? Kokela mpani mwanyu, nyuwo khamukivanhe màsi òrapihela inawu: vano ola òrapiha inawu saka ni maithori awe, khupuputtha n’ikharari sawe. Nyuwo khamukivanhe ebejo: vano ola, akelakaru-mu, khahiyerenrye ovaha ibejo inawu saka. Nyuwo khamukittikitthenle makhura mmuruni: vano ola òkittikitthela makhura òwùnkhela munawuni”. Yesu aahoona wira muthiyana ole aahittharuwa mweettelo awe woohiloka. Tivonto, aahimmye awe wira: “Tivó vanolèlakani wira: itampi sawe, sirokhalaru sinjene, sothene soleveleliwa. Tivó ola omphentawe vanjene. Mana ole onleveleliwa vakhani, oniphenta vakhani siso”.—Luka 7:44-47.

Khahiyo wira Yesu eemererya mweettelo woohiloka wa muthiyana ole. Masi ooniherya wira atthu yaale apanke itampi suulupale anattharuwa, annooneliwa othunku ni oleveleliwa. Nave, muthiyana ole aahihakalala vaavo aamwiiwale awe Yesu oriki: “Itampi sanyu soleveleliwa. . . . Wamini wanyu wowopolani: muroke ni murettele!”​—Luka 7:48, 50.