Okhala wira aari oomalela, Yesu khaarina mixankiho arina aya apinaatamu. Masi aaniwoonela othunku atthu. Nave aahiivahererya wira aakhaliherye akina, nto ikwaha sikina aanivara miteko sinceene ovikana iye aareerela awe ovara. Omoriwa ikharari ti waamwiiriha waakhaliherya atthu. Nwehe matakiheryo ari Miru 32, 37, 57, 99.

Atthu a makhalelo otheene, niire so, anamwane ni oowuuluvala, yaanilavulana Yesu, maana owo aanaawiriyana atthu otheene ni khaixoona okhala ootepa otthuneya. Mwaha wa yeeyo atthu yaanoona okhweya olavulana. Wira moone eyo, xontte musome Miru 25, 27, 95.

Ikwaha sinceene, Yesu aaninvekela ni murima wotheene Tiithi awe, oryeene mekhawe ni awiixutti awe oororomeleya. Yesu aahivekela imaara sinceene ohiya paahi okathi woolya. Aanivekela wira omuxukhuru Tiithi awe, onvuwiha, ni onvekela malakiheryo ohinatthi opaka soothanla suulupale. Nwehe matakiheryo ari Miru 24, 34, 91, 122, 123.

Ikwaha sikina Yesu aanooceela ophumurya ophavelaka waakhaliherya atthu akina. Nto khaihela nipuro noopacerya. Nave-tho, mwaha ola wa ohikhalana nrima, Yesu oonivaha ntakiheryo wira nitthareke. Xontte musome Miru 19, 41, 52, wira moone moota Yesu iirale awe eyo.

Yesu khahiyo paahi aawiixuttiha atthu otthuneya waya olevelela, masi-tho aahooniherya eyo aakhwelaka awiixutti awe ni atthu akina. Nkawehani matakiheryo ari Miru 26, 40, 64, 85, 131.

Soolempwa saahihimya vahinatthi wira aYuda anceene yaarowa omukhootta Mesiya ni wira awanani awe yaarowa omwiiva. Tivonto, anwerya opaka itthu vakhaani paahi mmureerelo wa atthu. Ohiya opaka eyo, Yesu aahikhalela nthiti okokhorela wekeekhai. Nto Yesu ohaavaha ntakiheryo atthareli awe, wira aluttuweliweke hata anyokhiwaka ni olupatthiwa. Nwehe Miru 16, 72, 103.

Mwa inamuna sinceene, Yesu ta vameekhaawe, maana owo ookhalana osuwela wuulupale ni ankhili waavikana apinaatamu. Okhala wira Yesu khaarina etampi, owo aahiwerya wuupuwela ni opaka itthu waavikana atthu. Nave mowiiyeviha, aahaarumeela atthu. Munoowerya wiixutta etthu nwehaka Miru 10, 62, 66, 94, 116.

Ikwaha sinceene, Yesu aanaapixerya murima arummwa awe ni atthu akina, vaavo yooceela aya otthara ntakiheryo nawe aahiiso weettela sowiixuttiha sawe. Moopixa murima, Yesu aahaakhaliherya ikwaha sinceene wira awerye omwaattamela Yehova. Xontte nwehe matakiheryo anooniherya opixa murima wa Yesu Miru 74, 98, 118, 135.