Nuumala efesta ya ekasamento oKanani, Yesu aahirowa oKafarnawu. Owo aaronwe ni amamawe vamosa ni Yakobo, Yosefe, Simoni ni Yuda.

Masi xeeni Yesu ohalaka orowa oKafarnawu? Epooma ele, yaakhala opuro wooloka ni yaari yuulupale ovikana oNazarethi aahiiso oKanani. Nave, awiixutti anceene a niinaano a Yesu yaakhala ipooma iya aahiiso waattamela oKafarnawu. Tivonto, Yesu aahiwiixuttiha elapo aya.

Okathi aari awe oKafarnawu, Yesu aahipaka-tho itthu sikina sootikiniha. Nto atthu anceene a epooma ele ni a mittetthe soowaattamela yaahiiwa itthu iyo. Masi, Yesu ni atthareli awe ni atthu yaatthara ikano sa aYuda, yaahaana orowa omwiira Paasikha a 30 EC, oYerusalemu.

Ari ene empa ya Muluku, oYerusalemu, awiixutti awe yaahinweha Yesu opakaka etthu yootikiniha ovikana itthu yaatonko aya onweha opakaka.

Moovarihana ni Nlamulo na Muluku, aIsarayeli yaahaana ovaha mukuttho wa inama mutemplo, nto ale yaakhuma mittetthe soorakamela yaahaana oruuha yoolya aya. Tivonto, ale yaarowa oYerusalemu yaaneemereriwa ni Nlamulo oruuha musurukhu aya wira athumeke inyompe, ipwittipwitthi, ipuri ni itthu sikina wira arumeeleke ari ene epooma ele. (Otumererya 14:24-26) Nto, anamatumiha a oYerusalemu yaanitumiha inama ni axipalame muhina mwa nivate nuulupale na etemplo. Nave, anamatumiha akina yaaniwiiyerya atthu yaatumiheryaka musurukhu munceene.

Otikinihiwe ene vanceene, Yesu aahimwarexela vathi musurukhu wa alipa-oowaakakhanya ni khupittulela meesa vathi ni owoomola anamatumiha ale. Nuumala-vo, Yesu aahimmye so: “Mukumihe-mu itthu iya. Empa y’Atithi aka muhikhalihé empa ya nakoso!”​—Yohani 2:16.

Vaavo awiixutti a Yesu yaaweha aya, awo yaahuupuwela eprofesia enimuhimya Mwaana a Muluku wira: “Ophenta waka emp’anyu onokilaliha ntoko moro”. Masi aYuda yaahimukoha wira: “Ethonyeryo xeni ennòniheryanyu y’owerya wanyu wira siso?” Yesu aahiwaakhula wira: “Mpwexakase emp’ela ya Muluku: miyo kinoteka-tho yela muhiná mwa mahiku mararú”.​—Yohani 2:17-19; Esalimo 69:10.

Nto aYuda yuupuwela wira Yesu aahimya etemplo ele ya oYerusalemu, tivonto yaahimukoha wira: “Emp’ela yamanle iyakha miloko mixexe n’iyakha thanu na mosa [46] etekiwaka: vano nyuwo munoteka-tho muhina mwa mahiku mararú?” (Yohani 2:20) Masi, Yesu aalikanyiha erutthu awe ni etemplo. Iyaakha tthaaru muhoolo mwaya, awiixutti awe yaahuupuwela moolumo ala vaavo Yesu aahihimuxiwa awe.