Okhumaka oGalileya, Yesu ni awiixutti awe yaahilapuwa Muro Yordani arowaka mpantta wa okuusini wa muttetthe wa oPereya. Ekwaha yookiserya Yesu aari awe oPereya, aahilavula ni aFarisi moota Muluku onoonela awe omwalana. (Luka 16:18) Vano aFarisi yaahitthikela-tho omukoha Yesu mwaha ole.

Nlamulo na Moise naahimya wira mulopwana aahaana omwalana mwaarawe akhala wira ‘omònana etthu enimùliha muru’. (Otumererya 24:1) Atthu ale yaahikhalana moonelo woovirikana waamwiiriha mutthu omwalana. Akina yaakupali wira yaahaana omwalana hata ni myaha saamukhaani. Tivonto aFarisi yaahimukoha Yesu wira: “Mulopwana othenle onniwerya omwalana ni mwar’awe mwaha w’etthu p’itthu?”​—Matheyo 19:3.

Yesu khaakhunle olavulaka moota apinaatamu anoonela aya. Masi aalavunle moovarihana ni moonelo wa Muluku yoowo okumihenrye ekasamento, oriki: “Nyuwo mosoma khuluwi wira: ‘Wopajeryani Muluku, àpattuxaka atthu, àpakalé mulopwana ni muthiyana’, ni wira: ‘Tivó, mulopwana onimwahiya atithi awe n’ame awe, wira apithane ni mwar’awe: òwanli aya enakhala mutthu mmosá pahi’. Siso awo khahiyó-tho atthu anli: ari mutthu mmosá pahi. Tivó, yeyo Muluku ephitanyalyawe mutthu ahimwalanyihé-tho”. (Matheyo 19:4-6) Vaavo Muluku aathelaninhe awe Adamu ni Eva, khaahimmye wira yaahaana omwalana.

Vano aFarisi yaahiphavela onvaanyiha Yesu ariki: “Vano, exeni Moise ahalaka oruma wira mulopwana anvahe mwar’awe epaphelo y’omwalana, amòmole?” (Matheyo 19:7) Yesu aahiwaakhula wira: “Mwaha w’olipa wanyu murima Moise t’òtthunihenryaweni omòmola mwar’inyu. Nto, wopajeryani khavìriwa siso”. (Matheyo 19:8) Masu oowi “wopajeryani” khahiyo anihimya mahiku a Moise, masi okathi Muluku aakumihenrye awe ekasamento wEedeni.

Nuumala-vo, Yesu aahihimya ekeekhai yootthuneya, oriki: “Miyo kinolèlani wira: mulopwana onimwalana ni mwar’awe, ohikhanle mwaha w’okhalasa yettaka onamuttompe [nuulumo na Egriki por·neiʹa], anamuthela mukina, onoraruwa”. (Matheyo 19:9) Tivonto, Biibiliya oneemererya paahi omwalana akhala wira mmosa ooraruwa.

Vano awiixutti yaahihimya wira: “Mukhalelo wa mulopwana mwaha wa mwar’awe wakhalaka sisa, fatari ohithela!” (Matheyo 19:10) Tivonto, ole oniphavela othela aahiiso otheliwa, ohaana wuupuwela wira ekasamento khentthikeliwa ottuli!

Olavulaka sa ohithela aahiiso ohitheliwa, Yesu aahimmye wira akina aniyariwa oohuleya ene, ahinawerya orupihana. Akina anoohuliwa, ahinawerya orupihana. Nave aakhala akina anithanla ohithela aahiiso ohitheliwa. Awo annipaka eyo wira akhaliherye vanceene Omwene. Yesu aahaatumererya ale yanwiriyana wira: “Ale anwerya okupali itthu iya [ohithela aahiiso ohitheliwa], ekupaliki”.​—Matheyo 19:12.

Vano atthu yaahipacerya omuroihela Yesu anamwane. Masi awiixutti yaanaakhoottiherya atthu waaruuha anamwane wira ahimunyoonyihe Yesu. Vaavo Yesu aaweha awe eyo, aahitikinihiwa khwiira: “Mwahiye anamwane ekirweleke miyo. Muhakhottiheryé, mana Omwene wa Muluku ti wawaya ale ari ntoko axinamwane ala. Kinolèlani ekhweli wira: ole ohinakhelela Omwene wa Muluku ntoko mwanamwane, khanwerya okela Momweneni memmo”.​—Marko 10:14, 15; Luka 18:15.

Tthiri ola mwaha muulupale! Wira nikele Momweneni mwa Muluku, nihaana okhala oowiiyeviha ni ophavela wiixutta ntoko anamwane. Nto Yesu aahooniherya wira onnaaphenta anamwane aakuxaka mmatatani ni waareeliha. Nave Yesu onnaathokorerya moophenta atthu otheene ‘anakhela Omwene wa Muluku ntoko mwanamwane’.​—Luka 18:17.