Geeshsha Maxaafan 66 guutta maxaafati deꞌoosona. Geeshsha Maxaafay 1, 600 gidiya layttan xaafettiis. An Xoossay yootidobay hegeekka, ‘Xoossaa qaalay’ deꞌees.—1 Tasalonqqe 2:13.

Ha huuphe yohuwan

•  Geeshsha Maxaafaa xeelliyaagan tumaa

•  Geeshsha Maxaafay yootiyoobay aybee?

•  Geeshsha Maxaafaa qofay laamettidee?

•  Dumma dumma gidida daro Geeshsha Maxaafaa birshshettati deꞌiyoy aybissee?

•  Geeshsha Maxaafaa giddon deꞌana koshshiyaabaa kuuyiday oonee?

•  Geeshsha Maxaafaa giddoppe xayida maxaafi deꞌii?

•  Geeshsha Maxaafaa xiqiseta waati demmana danddayiyoo?

•  Geeshsha Maxaafan deꞌiya maxaafata

•   Geeshsha Maxaafaa xaafiday oonee? Geeshsha Maxaafaa xaafissiday Xoossaa, qassi I 40 gidiya attuma asati xaafanaadan oottiis. He asatuppe amaridaageeti Muusa, Kawuwaa Daawita, Maatiyoosa, Marqqoosa, Luqaasanne Yohaannisa. a Xoossay he asati A qofaa xaafanaadan hegaa eta wozanan wottiis.—2 Ximootiyoosa 3:16.

   Leemisuwawu: Issi ooso keettaa halaafee qofaa yootidi issi kiitaa ba xaafiyaa baggaara xaafissikkokka, he kiitay halaafiyaagaa. Hegaadankka, Xoossay ba qofaa dumma dumma asati xaafanaadan oottikkokka, Geeshsha Maxaafan deꞌiya qofay aagaa.

•   “Geeshsha Maxaafaa” geetettida qaalay woygiyoogee? “Geeshsha Maxaafaa” geetettida qaalay “guutta maxaafata” geetettidi birshshettida bibiliya giyo Giriiketto qaalaappe yiis. Guyyeppe, bibiliya giyo qaalay guutta maxaafata ubbaa oyqqida, Geeshsha Maxaafaa geetettidaagaa qonccissiyaaba gidiis.

•   Geeshsha Maxaafay xaafettidoy awudee? Geeshsha Maxaafaa xaafiyoogee 1513 K.K. doomettidi, 98 M.L. heeran wuriis; hegee 1,600ppe dariya layttaa ekkiis.

•   Koyro xaafettida Geeshsha Maxaafay awan deꞌii? Koyro xaafettida Geeshsha Maxaafatuppe awugeenne deꞌenna. Ayssi giikko, Geeshsha Maxaafaa xaafidaageeti ceeccaanne galbbaa mala he wode deꞌiya sohuwaara moorettiyaabatun xaafido gishshataassa. Gidikkokka, kushiyan duuqqidi xaafiya eranchchati, wodeppe asay hegaa nabbabanaadan daro xeetu layttawu zaari zaaridi duuqqi xaafidosona.

•   “Galꞌꞌa Maachchaynne” “Ooratta Maachchay” aybee? Daroti Galꞌꞌa Maachchaa giyo Geeshsha Maxaafaa shaahuwaappe dariya baggay Ibraawetto b qaalan xaafettiis; qassi Ibraawetto Geeshsha Maxaafaa geetettees. Ooratta Maachchaa geetettiya shaahoy Giriiketto qaalan xaafettiis, hegee Kiristtaane Giriiketto Geeshsha Maxaafaa geetettees. Naaꞌꞌu shaahota issippe gattin issi maxaafaa gididi, Geeshsha Maxaafaa geetettiis. c

•   Geeshsha Maxaafan deꞌiyaabay aybee? Geeshsha Maxaafan taarikee, higgee, hiraagay, danttoy, leemisoy, mazamureenne dabddaabbee deꞌees.—“ Geeshsha Maxaafan deꞌiya maxaafata” xeella.

 Geeshsha Maxaafay doommiyoy Ubbabaa Danddayiya Xoossay saluwaanne saꞌaa medhdhidoogaa qanttan qonccissiyoogaana. Xoossay asay A eranaadan ba sunttay Yihoowa gidiyoogaa Geeshsha Maxaafan xaafissiis.—Mazamure 83:18, NW.

 Geeshsha Maxaafay Xoossaa sunttay moorettidoogaanne hegaa I zaarettidi giigissanaagaa qonccissees.

 Geeshsha Maxaafay Xoossay asawunne saꞌawu halchchidobaa yootees. Asay tuggatanaadan oottidabaa sinttappe Xoossay waati xayssanaakkokka yootees.

 Geeshsha Maxaafay galla galla deꞌuwan maaddiya zoriya oyqqiis. Hegeetuppe amaridaageeti:

•   Haratuura deꞌiya loꞌꞌo gaytotettaa. “Hara asi intteyyo oottanau koyiyo ubbabaa inttekka asau oottite.”—Maatiyoosa 7:12.

   Hegee woygiyoogee? Harati nuna oyqqanaadan koyiyo ogiyan nuuni harata oyqqana koshshees.

•   Unꞌꞌissiyaabaa gencciyoogaa. “Wonttobau hirggoppite; aissi giikko, wonttoi bau hirggana.”—Maatiyoosa 6:34.

   Hegee woygiyoogee? Sinttappe hananabawu keehippe hirggiyoogaappe, galla galla hanotaabaa qoppiyoogee loꞌꞌo.

•   Aqo deꞌuwan ufayttiyoogaa. “Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.”—Efisoona 5:33.

   Hegee woygiyoogee? Ufayssiya aqo deꞌuwawu siiqoynne issoy issuwaa bonchchiyoogee keehi koshshiyaaba.

 Laamettibeenna. Eranchchati beni wode Geeshsha Maxaafaa xuufeta ha wodiya Geeshsha Maxaafaara akeekan geeddarssidi, Geeshsha Maxaafan deꞌiya koyro qofay laamettibeennaagaa akeekidosona. Xoossay asay A qaalaa nabbabanaadaaninne akeekanaadan koyiyaaba gidikko, A qaalan deꞌiya qofay laamettennaadan oottana giyoogee bessiyaaba gidennee? d—Isiyaasa 40:8.

 Ha wodiyan Geeshsha Maxaafaa nabbabiyaageetuppe daroti beni wode Geeshsha Maxaafay xaafettido qaalaa erokkona. Gidoppe attin, Geeshsha Maxaafan “asa ubbaayyo, zare ubbaayyo, qommo ubbaayyo, dumma dumma biittaa qaala ubbaayyoonne yara ubbaayyo” haniya ‘mishiraachoy’ deꞌees. (Ajjuutaa 14:6) Hegaa gishshawu, asay Geeshsha Maxaafan deꞌiya Xoossaa qofaa nabbabanawunne loytti akeekanawu eti eriyo qaalan giigida Geeshsha Maxaafaa birshshettay koshshees.

 Heezzu qommo Geeshsha Maxaafaa birshshettati deꞌoosona:

•   Issi qaalaa qaalaa bishshiyoogee danddayettida keenan issi qaalay woygiyoogaakko birshshiyoogaa.

•   Qofaa birshshiyoogee koyro xaafettido doonan deꞌiya qofay woygiyoogaakko qonccissiya qaalata goꞌettiyoogaa.

•   Qonccissidi birshshiyoogee nabbabanawu ufayssiya hanotan dumma dumma qaalata gujjidi birshshiyoogaa. Gidoppe attin, dumma dumma qaalata gujjidi qonccissi birshshiyoogee issi issitoo waanna qofaa genttana danddayees.

 Loꞌꞌo Geeshsha Maxaafaa birshshettay asay Xoossaa qofaa suure akeekanaadan oottiya hanotan, qaalaa qaalaadan, qassi he wodiyan haasayiyo ogiyan birshshettidaagaa. e

 Geeshsha Maxaafaa xaafissiday Xoossaa gidiyo gishshawu, A giddon deꞌana koshshiyaabaa I kuuyiis. Ibraawetto Geeshsha Maxaafaa naaganaadan, Xoossay koyro beni Israaꞌeelata dooridi “ba kiitaa hadaraa Aihudatuyyo immiis.”—Roome 3:2.

 Baawa. Geeshsha Maxaafay kumetta; A giddoppe ‘xayida’ maxaafi baa. Issoti issoti daro layttawu qosettidi takkida beni wode maxaafati Geeshsha Maxaafaa shaahota goosona. f Gidoppe attin, Geeshsha Maxaafay ba giddon deꞌiyaabay tuma gidiyoogaa yootees. (2 Ximootiyoosa 1:13) Hegaa maaran, Xoossaa ayyaanay kaalettin xaafettida Geeshsha Maxaafan deꞌiya maxaafati issoy issuwaara maayettoosona. Issoti issoti Geeshsha Maxaafaa shaaho giyo beni wode maxaafata xeelliyaagan hegaadan gaana danddayettenna. g