OYSHA 9
Taani Lodda Laamiyan Ammanana Bessii?
NEENI AY OOTTANEE?
Ha hanotaa qoppa: Alamussi hanotay kirqqi giis. I Xoossaanne ubbabay merettidoogaa ammanees. SHin bayoloojiyaa asttamaaree, lodda laamee tuma gidiyoogaanne ammanttiya saynise naqaashay deꞌiyooba gidiyoogaa hachi mintti yootiis. Alamu eeyya milatana koyibeenna. I, ‘Lodda laamee tuma gidiyoogee saynisiyan erettikko, taani hegaa siranawu oonee?’ yaagidi qoppiis.
Neeni Alama gidiyaakko, timirtte keettaa maxaafay lodda laamiyaa tuma giyo gishshawu ammanuutee?
TAKKI GA QOPPA!
Lodda laamiyaa ammaniyaageeta gidin ubbabay merettidoogaa ammaniyaageeta gidin, naaꞌꞌatikka hegaa ammaniyoy aybissakko shaakkennan yootoosona.
-
Issi issi asay ubbabay merettidoogaa ammaniyoy, woosa keettan hegaadan tamaarido gishshataassa.
-
Qassi issi issi asay lodda laamiyan ammaniyoy, timirtte keettan hegaadan tamaarido gishshataassa.
QOPPANA BESSIYO USUPPUN OYSHATA
Geeshsha Maxaafay, “Keetta ubbaa keexxidaagee issi asa; shin ubbabaa keexxidaagee Xoossaa” yaagees. (Ibraawe 3:4) Hegaadan ammaniyoogee bessiyaabee?
Deꞌuwaa Medhida uri baawa giyoogee ha keettaa keexxida uri baawa giyoogaa mala
ASAY GIYOOBAA: Saluwan saꞌan deꞌiya ubbay merettidoy issi wolqqaamabay xuuqqiina.
1. He wolqqaamabay xuuqqanaadan oottiday oonee woy aybee?
2. Tuma milatiyaagee awugee? Ubbabay coo yiis giyoogeeyye ubbabaa issi uri medhiis giyoogee?
ASAY GIYOOBAA: Asay doꞌaappe loddan loddan laamettiis.
3. Asay doꞌaappe, leemisuwawu geleshshuwaappe loddan loddan laamettikko, asaa eray geleshshuwaagaappe keehi dummatiyoy aybissee?
4. Keehi laafa giyo, deꞌon deꞌiyaabatu meretaykka asaa akeekaappe bolla gidiyoy aybissee?
ASAY GIYOOBAA: Lodda laamee tuma gidiyoogawu naqaashay deꞌees.
5. Hegaadan giya uri he naqaashata ba huuphe pilggidee?
6. Erancha gidida asa ubbay lodda laamiyan ammanees giyoobaa siyidi, ay keena asay hegaa ammanii?
“Wora giddon hemettaydda, issi loꞌꞌiya keettaa beꞌada, ‘Hagee ayba maalaalii! Mittati keettay keexettanaadan maaddiya hanotan suure kunddido gishshawu ha keettay keexettiis’ gaada qoppuutee? CHiikka! Hegaadan qoppiyoogee bessiyaaba gidenna. Yaatin, saluwan saꞌan deꞌiya ubbabay coo yiidabadan ammanana bessii?”—Juuliyo.
“Xuufiyaa attamiyo sohuwan issibay xuuqqin, qalamee godaaninne koriniissiyan gukkin, issi gita dikshineeree giigi aggidabadan issi uri neeyyo yootiis gaada qoppa. Neeni hegaa ammanuutee?” —Giweno.
XOOSSAN AMMANIYOY AYBISEE?
Geeshsha Maxaafay nuuni ‘ubbabaakka paaccanaadan’ minttettees. (1 Tasalonqqe 5:21) Hegaa giyoogee neeni ammaniyoy kaallidi deꞌiyaabaa gaasuwaana gidana bessenna:
-
COO AMMANIYOOGAA (Issi wolqqaamabay deꞌana gaada qoppays)
-
HARATUPPE DUMMATANA KOYENNAAGAA (Asay ba haymaanootiyaa mintti kaalliyo heeran deꞌays)
-
HARATI DENTTETTIYO GISHSHAWU (Nu soo asay Xoossan ammananaadan oottidi tana dichido gishshawu, harabaa erikke)
SHin neeni ammaniyoy hegaa ammananaadan oottiyaabay deꞌiyo gishshataassa gidana bessees.
“Asttamaaree nu bollay waani oottiyaakko qonccissiyo wode, taani Xoossay deꞌiyoogaa aynne sirabeykke. Nu bolla qommo ubbay guutta giyoobaykka, ba oosuwaa oosuwaa oottees; qassi eti hegaa oottiyo wode nuuni akeekokko. Asaa bollay tumuppe maalaaliyaagaa!” —Tereeso.
“Taani keehi xoqqa pooqiyaa, markkabiyaa woy kaamiyaa beꞌiyo wode, ‘Hagaa oottiday oonee?ʼ gaada qoppays. Leemisuwawu, kaamiyaa medhidaageeti erancha asata; kaamee baana mala a giddon deꞌiya guuttabati ubbay maara oottana bessees. Kaamiyaa medhida uri deꞌikko, nunakka medhidaagee deꞌana bessees.”—Richarda.
“Taani saynisiyaa loytta xannaꞌido wode, lodda laamee ammanana bessennaba gidiyoogaa akeekaas. . . . Taassa gidikko, gita ammanuwaa koshshiyoy lodda laamiyan ammaniyoogaappe attin Medhidaagan ammaniyoogaa gidenna.”—Anttona.
QOPPANA BESSIYAABAA
Saynttistteti daro layttawu xannaꞌikkokka, hanno gakkanawu lodda laamiyaa xeelliyaagan ubbay maayiyo qofaa yootana danddayibookkona. Eranchata giyo saynttisttetikka lodda laamiyaara gayttida qofan maayettennaba gidikko, neeni hegaa sirikko balee?
