1. Yoonaasi ay mala ogiyaa baanee, qassi biyoosaa xeelliyaagan awu aybi siyettidee?

 YOONAASASSI haꞌꞌi daro wodee deꞌiyo gishshawu, i wotti dentti qoppana danddayees. I 800 kilo meetireppe dariya ogiyaa issi aginawu woy hegaappe dariya wodiyawu hemettanawu deꞌees. I qantta ogiyaa woy giiga gidida adussa ogiyaa dooridi, daro zanggaaraanne keehi daro deriyaa kanttidi baana. I aaho gidida Sooriyaa Bazzuwaa gaxaara biidi, gita Efiraaxiisa SHaafaa pinnidi, Sooriyaa, Masphexoomiyaanne Asoore biittaa katamatuuninne gaxaretun asa son aqennan aggenna. Amarida gallassaa hemettidi ba biyoosaa Nanawe mati mati biyo wode, i yayyiis.

2. Yoonaasi bawu imettida oosuwaa aggidi baqatana bessennaagaa ayba ogiyan tamaaridee?

² Yoonaasi bawu imettida oosuwaa aggidi kaseegaadan harasaa baqatana bessennaagaa erees. Kasetiya huuphe yohuwan beꞌidoogaadan, Yihooway abbaa beetaanne maalaalissiya hanotan a ashshanawu gita moliyaa goꞌettidi Yoonaasa danddayan tamaarissiis. Heezzu gallassappe guyyiyan, he molee Yoonaasa abbaa gaxan cooyiis; hegaappe simmin, Yoonaasi azazettiyaagaanne ashkke gidiis.—Yona., shemppo 1, 2.

3. Yihooway Yoonaasa waatidee, shin denddiya oyshati awugeetee?

³ Yihooway Yoonaasi Nanawe baanaadan naaꞌꞌanttuwaa azazin, i eeno giidi arshsho baggi adussa ogiyaa biis. (Yoonaasa 3:1-3 nabbaba.) SHin Yihooway a seeri simmin, Yoonaasi ba qofaa laammidee? Leemisuwawu, Yihooway i muukettidi hayqqennaadan ashshiyoogan, makkalidaba gidikkokka a qaxxayennan aggiyoogan, qassi  i he oosuwaa oottanaadan zaarettidi yootiyoogan a maariis. He ubbabaappe simmin, Yoonaasi harata maaraana bessiyoogaa eridee? Darotoo, nagarancha asi harata maaranawu metootees. Yoonaasi maariya asa gidanawu metootidoogaappe nuuni ay tamaaranaakko ane beꞌoos.

4, 5. Yihooway ‘Nanawee gita katama’ giidoy aybissee, qassi hegee nuuni abaa ay akeekanaadan oottii?

⁴ Yihooway Nanawe katamaa Yoonaasi xeellidoogaadan gidennan gita katamadan xeelliis. Yihooway ‘Nanawee gita katama’ gidiyoogaa yootidoogee Yoonaasa maxaafan heezzutoo qoncciis. (Yona. 1:2; 3:2; 4:11) He katamay Yihoowayyo gita woy i xoqqu ootti xeelliyooba gididoy aybissee?

⁵ Nanawee Naamiruudi Bashshaa Haattaappe simmin keexxido koyro katamatuppe issuwaa gidiyo gishshawu, keehi takkida katama. Nanawee keehi aaho; qassi yaaninne a yuushuwan deꞌiya katamatun keehi cora asay deꞌees; ha gaxaappe ya gaxaa gakkanawu  heezzu gallassaa hemetissees. (Doo. 10:11; Yona. 3:3) Nanawee gita beeta maqidaseti, adussa gimbbe dirssaynne gita keettati deꞌiyo loꞌꞌiya katama. SHin he katamay Xoossaa Yihoowayyo gita gidanaadan oottiday hegaa gidenna. I xoqqu oottidi xeellidoy asaa. He wode hara kataman deꞌiyaagaappe dariya asay Nanawen deꞌees. Yan deꞌiya asay iita gidikkokka, Yihooway etawu qarettiis. Yihooway asa ubbaa siiqees; qassi ubbay nagaraappe simmanaadaaninne suurebaa oottanaadan koyees.

6. (a) Yoonaasi Nanawe gakkidi yayyidoy aybisseeshsha? (Tohossa qofaakka xeella.) (b) Yoonaasi sabbakido hanotaappe abaa ay erana danddayiyoo?

⁶ Yoonaasi Nanawe gakkidi, yan 120,000ppe dariya asay deꞌiyoogaa eridi ubba keehi yayyennan aggenna. a I issi gallassa ogiyaa katamaassi giddokko hemettidi keehi cora asay deꞌiyoosaa gakkiis; i yaa biidoy kiitaa yootanawu injjetiyaasaa demmanaassa gidennan aggenna. I he asawu waati yootanee? I Asooretu qaalaa erii? Woy Yihooway he eraa awu maalaalissiya ogiyan immidee? Geeshsha Maxaafay hegaabaa yootenna. Geella Yoonaasi i Ibraawettuwan yootiyoobaa, Nanawe asaassi birshshiya ura demmennan aggenna. I etawu ay ogiyankka yooto, he kiitay qoncce shin asaa ufayssennaagaa; i, “Oitamu gallassaappe guyyiyan, Nanawee xayana” yaagidi awaajjiis. (Yona. 3:4) I yayyennan hegaa zaari zaaridi yootiis. Yaatiyoogan, i mino ammanoy deꞌiyo xala asa gidiyoogaa bessiis; hegee nuuyyookka keehi koshshiyaaba.

7, 8. (a) Nanawe asay Yoonaasi yootiyoobaa siyidi waanidee? (b) Yoonaasi yootiyoobaa siyidi Nanawe kawoy ay oottidee?

⁷ Nanawe asay Yoonaasi yootiyoobaa siyanawu shiiqiis. I asay hanqqettidi ba bolli iitabaa gattana giidi qoppiis. SHin i qoppibeennabay haniis. I yootiyoobaa asay siyiis! I yootidobay xaragaadan ubbasaa gakkiis. Sohuwaara, kataman deꞌiya ubbay Yoonaasi yootido bashshaabaa haasayiyoogaa doommiis. (Yoonaasa 3:5 nabbaba.) Duree manqqoy, naatoy cimay, maccay attumay ubbay ba nagaraappe simmiis. Eti ubbay xoomidosona. Qassi asay nagaraappe simmanawu oottidobaa kawoykka siyiis.

⁸ Kawoykka Yoonaasi yootiyoobaa siyidi ba nagaraappe simmiis. I Xoossawu yayyidi, ba kawotaa araataappe wodhidi, kawotaa  maayuwaa qaaridi ba asaadan waaruwaa maayiis; ubba “bidinttan uttiis.” I he biittan deꞌiya ubba asay xoomanaadan ba ‘oosanchatuura’ awaajjiis. Qassi asaykka meheekka waaruwaa maayanaadan azaziis. b I ba asay iitabaa oottidoogaanne makkalidoogaa ammaniis. Qassi eti bantta nagaraappe simmidoogaa beꞌidi Xoossay qarettanaagaa hidootidi, “Xoossai . . . nuuni xayennaadan, ba wolqqaama hanqquwaappe simmanaakkonne” yaagiis.—Yona. 3:6-9.

9. Toochiyaageeti Nanawe asaa xeelliyaagan woygiyoonaa, shin eta qofay bala gidiyoogaa aybin eriyoo?

⁹ Geeshsha Maxaafaa toochiyaageeti hegaadan eesuwan nagaraappe simmana danddayettenna goosona. SHin Geeshsha Maxaafaa eranchati malan ammaniyaanne qofay sohuwaara laamerettiyo asay beni hegaadan kayyottiyoogee meeze gidiyoogaa akeekidosona. Guyyeppe Yesuus Kiristtoosikka Nanawe asati bantta nagaraappe simmidoogaa yootido gishshawu, toochiyaageetu qofay likke gidenna. (Maatiyoosa 12:41 nabbaba.) Yesuusi he hanotaa saluwan uttidi beꞌido gishshawu, i giidobay tuma. (Yoh. 8:57, 58) Nuuni keehi iita giidi qoppiyoogeetikka bantta nagaraappe simmana danddayokkona gaana koshshennaagaa ha taarikiyaappe akeekoos. Asa wozanan deꞌiyaabaa beꞌana danddayiyay Yihoowa xalla.

10, 11. (a) Nanawe asati bantta nagaraappe simmin Yihoowayyo aybi siyettidee? (b) Yihooway suure pirddiyoogaa ammanettana danddayiyoy aybissee?

¹⁰ Nanawe asati bantta nagaraappe simmin, Yihoowayyo aybi siyettidee? Yoonaasi guyyeppe, “Eti bantta iita ogiyaappe simmidoogaa Xoossai be7ido wode, etau qarettidi [“ba qoppidoban zilꞌꞌettidi,” NW], eta bolli ehaana giido iitabaa aggi bayiis” yaagidi xaafiis.—Yona. 3:10.

¹¹ Yihooway Nanawe katamaa xayssanawu qoppidi aggidoogee i balidoogaa bessiyaabee? CHii, gidenna. Geeshsha Maxaafay Yihoowa pirddan wotoy baynnaagaa yootees. (Zaarettido Wogaa 32:4  nabbaba.) Hegee Yihooway Nanawe asaa hanqqettido hanqqoy dochidoogaa bessees. I kasetidi he asaa qaxxayanawu qoppikkokka, eti laamettidoogaa beꞌidi qaxxayennan aggibayiis. Yihooway eta maaranawu koyiis.

12, 13. (a) Yihooway ba qofaa laammanawu eeno giyaagaanne maariyaagaa gidiyoogaa waati bessidee? (b) Yoonaasi hanana giidi yootidobay worddo gidennay aybissee?

¹² Yihooway haymaanootiyaa kaalettiyaageeti giyoogaadan zozzu giidaagaa, asawu qoppennaagaa, qassi meqetti baynnaagaa gidenna. Yihooway ba qofaa laammanawu eeno giyaagaanne maariyaagaa. I iitati Nanawe asaagaadan bantta nagaraappe simmanaadaaninne laamettanaadan koyiyo gishshawu, eta xayssanawu qoppiyo wode pirddaa kiitaa yootanaadan ba ashkkarata kiittees. (Hiz. 33:11) Yihooway hananabaa yootiya Ermmaasa hagaadan giis: “Ai wode gidikkonne, taani issi biittaabaa woikko issi kawotettaabaa, ‘Taani inttena xoqollana, yooddananne xaissana’ gaada yootin, he taani yootido kawotettai ba iitatettaappe aggidi simmikko, taani eta bolli ehaana giido iitabaa eheennan agga bayana.”—Erm. 18:7, 8.

¹³ Yaatin, Yoonaasi hanana giidi yootidobay worddoo? CHiikka, hegee Xoossay halchidoogaadan asay ba nagaraappe simmanaadan maaddiis. He kiitay odettidoy Nanawe asay iitabaa oottiyo gishshataassa; shin eti guyyeppe iitabaa oottiyoogaa aggidosona. Nanawe asati bantta iita oosuwaa zaaretti oottiyaaba gidikko, Yihooway kaseti yootido pirddaa eta bolli ehaana. Guyyeppe eta bolli gakkidabaykka hegaa.—Sof. 2:13-15.

14. Yihooway Nanawe asaa maarido gishshawu, Yoonaasayyo aybi siyettidee?

¹⁴ Yoonaasi qoppido wodiyan bashshay gakkennan aggin awu aybi siyettidee? Geeshsha Maxaafay, “Hegee Yoonaasa mulekka ufaissibeenna. Hegaa gishshau, i keehi hanqqettiis” yaagees. (Yona. 4:1) Yoonaasi Yihooway balidabadan qoppidi a seeriyoogaa mala woosaa woossiis. Yoonaasi Nanawe beennan aggiyaakko loꞌꞌo gidiyoogaa yootiis. I Yihooway Nanawe bolli bashshaa eheennaagaa kasekka eriyoogaa, ubba Tarsseesa baqatidoy hegaassa gidiyoogaa yootiis. I paxa deꞌiyoogaappe hayqqiyoogee kehiyoogaa yootidi, Yihooway bana woranaadan woossiis.—Yoonaasa 4:2, 3 nabbaba.

15. (a) Yoonaasi yiillotanaadan oottidabay aybeeshsha? (b) Yihooway unꞌꞌettida ba ashkkaraa waatidee?

¹⁵ Yoonaasa hirggissidabay aybee? Awu siyettidabaa nuuni geeshshidi erennaba gidikkokka, Yoonaasi Nanawe xayanaagaa yan deꞌiya asawu yootidoogaa eroos. Eti hegaa ammanidosona. SHin Nanawee xayibeenna. I asay bana qilliiccana woy worddo hananabaa yootiyaagaa gaana giidi qoppideeshsha? A qofay ayba gidikkokka,  asay ba nagaraappe simmido gishshawu woy Yihooway eta maarido gishshawu i ufayttibeenna. I lancciis, ba hanotan azzaniis, qassi asay a worddancha gees giidi hirggiis. Gidikkokka, Yoonaasa Xoossay maariyaagaa gidiyo gishshawu, azzanida ba ashkkaraayyo deꞌiya loꞌꞌo eeshshaa akeekiis. Yihooway bana Yoonaasi bonchibeenna gishshawu qaxxayiyoogaappe, “Tumu neeni hagau hanqqettanau bessii?” yaagidi bana qoranaadan oottiya oyshaa oychiis. (Yona. 4:4) Yoonaasi he oyshaa zaaridee? Geeshsha Maxaafay hegaabaa yootenna.

16. Issotu issotu qofay Xoossaagaappe dummatiyoy aybiinee, qassi Yoonaasa leemisuwaappe ay tamaarana danddayiyoo?

¹⁶ Yoonaasi suurebaa oottibeenna giidi nuuni pirddana danddayoos; shin nagarancha gidida asi issi issitoo Xoossaa qofaara maayettennabaa oottiyoogee oorattaba gidennaagaa hassayana koshshees. Issi issi asay Yihooway iitabay gakkennaadan teqqana bessishin aggidabadan, i iitata sohuwaara xayssana bessishin aggidabadan woy i ha iita alamiyaa xayssana bessishin hanno gakkanawu takkidabadan qoppees. Nu qofay Xoossaa Yihoowagaappe dummatiyo wode, giigana bessiyay nu qofaappe attin Xoossaagaa gidennaagaa Yoonaasa hanotaappe tamaaroos.

17, 18. (a) Yoonaasi Nanaweppe kiyidi waanidee? (b) Gosiyaara gayttidaagan Yihooway oottido maalaalissiyaabay Yoonaasayyo aybi siyettanaadan oottidee?

¹⁷ Hananabaa yootiya he bitanee keehi azzanidi Nanaweppe kiyidi, ba biitti gidennan, katamaa duge xeellanawu, arshsho baggi deretiyaasaa biis. I Nanawe bolli gakkiyaabaa beꞌanawu, yan daasiyaa daasidi uttiis. I hegaadan oottidoy he katamay xayishin beꞌanaassa gidennan aggenna. Maaranawu koyenna ha bitaniyaa Yihooway maarotaabaa waati tamaarissanee?

¹⁸ Issi galla qammi Yihooway gosee mokkanaadan oottiis. Yoonaasi beegottiyo wode, aaho hayttay deꞌiyo he gosee eesuwan diccidi kallo deꞌiya a daasiyaa loytti kammidoogaa beꞌiis. Beꞌidi keehi ufayttiis. Yoonaasi Xoossay he gosiyaa maalaalissiya ogiyan dichidoogan ‘keehippe ufayttidoy,’ hegee Xoossay an ufayttidoogaa bessanaassanne anjjanaassa gi qoppido gishshataassa gidennan aggenna. SHin Yihooway hegaadan oottidoy Yoonaasa awaappe ashshananne i yiilluwaa agganaadan tamaarissana xallaassa gidenna. I Yoonaasa gitabaa tamaarissana koyiis. Hegaa gishshawu Xoossay maalaalissiya harabaakka oottiis. I he gosiyaa miya guxuniyaa yeddin, gosee meliis. Yaatidi, i “michchiya carkkuwaa arshsho baggappe”  yeddiis; he mishuwaappe denddidaagan Yoonaasi ‘labbaniis.’ Yoonaasi haꞌꞌikka keehi yiillotidi, bana Xoossay worana mala zaarettidikka oychiis.—Yona. 4:6-8.

19, 20. Yihooway gosiyaa goꞌettidi Yoonaasa waati tamaarissidee?

¹⁹ Yihooway he gosee melido wodekka Yoonaasi hanqqettana bessiyaakkonne zaarettidi oychiis. Oychin, Yoonaasi ba mooruwaa ammaniyoogaappe, “Ee bessees; ubba haiqqana gakkanaassi hanqqettanau bessees” yaagidi zaariis. Yoonaasa tamaarissanawu koyidobaa Yihooway kaallidi qonccissana.—Yona. 4:9.

²⁰ Yoonaasi azzanidoy issi qammi mokkida, i tokkibeennanne dichibeenna gosee meliina gidiyoogaa Xoossay awu yootiis. Yaatidi Xoossay, “Ushachchaanne haddirssaa shaakkidi eribeenna xeetanne laatamu sha7u asainne daro mehee Nanawen de7ees. Yaatin taani ha gita katamaayyo qarettanau bessennee?” yaagidi oychiis.—Yona. 4:10, 11. c

21. (a) Yihooway Yoonaasa tamaarissido waannabay aybee? (b) Yoonaasa hanotay nuuni nu huuphiyaa loytti qoranaadan waati maaddii?

 ²¹ Yihooway tamaarissana koyido waannabaa akeekadii? Yoonaasi he gosee diccanaadan aybanne oottibeenna. SHin Yihooway Nanawe asaa deꞌuwawu Pultto; qassi i hara meretatuyyo koshshiyaabaa immiyoogaadan, etawukka immees. Yaatin, Yoonaasi 120,000 asaappenne eta mehetuppe aattidi issi gosiyawu hegaadan qarettana bessii? Yoonaasi hegaadan qoppidoy i ba xallaa siiqiyo gishshataassa gidennee? I he gosiyawukka hegaadan azzanidoy bana goꞌꞌido gishshataassa. Qassi Nanawe asay xayibeennaagan yiillotidoykka ba sunttaa gishshawunne asay bana worddancha geennaadan qoppido gishshawu gidennee? Yoonaasa hanotay nuuni nu huuphiyaa loytti qoranaadan maaddana danddayees. Nu wozanay nuuni nu xallaa siiqanaadan denttettees. Yihooway nuuni a leemisuwaa kaallidi kaseegaappe aaruwan harata siiqanaadan, etawu qarettanaadaaninne maariyaageeta gidanaadan danddayan tamaarissiyo gishshawu, a wozanappe galatana bessees!

22. (a) Yihooway aadhida eratettan maarotettaabaa tamaarissidobaappe Yoonaasi goꞌettidoogaa bessiyaabay aybee? (b) Nuuni ubbay tamaarana bessiyaabay aybee?

²² SHin Yoonaasi he ubbabaappe tamaaridee? Yoonaasa sunttan xaafettida maxaafaa wurssettan Yihooway oychido oyshay deꞌees; i he oyshaa haꞌꞌikka oychiiddi deꞌees. Geeshsha Maxaafaa toochiya issoti issoti Yoonaasi he oyshaa mule zaarenna gaana danddayoosona. SHin he maxaafay Yoonaasi he oyshaa zaaridoogaa bessiyaaba. A sunttan xaafettida he maxaafaa xaafiday Yoonaasa gidiyoogaa bessiya naqaashay deꞌees. I ba biitti simmidi he taarikiyaa xaafiyoogaa qoppa. Cima, eranchanne ashkke gidida he bitanee ba mooruwaabaa, ba makkalaabaanne harata maaranawu ixxidoogaabaa xaafiyo wode zilꞌꞌettidi ba huuphiyaa qaattiyoogaa qoppana danddayoos. Yihooway aadhida eratettan tamaarissido gitabaa Yoonaasi tamaaridoogee qoncce. I harata maarana koshshiyoogaa akeekiis. Nuuni shin?—Maatiyoosa 5:7 nabbaba.