TIMIRTTE 6
Hayqqidaageetussi Ayba Hidooti Deꞌii?
1. Hayqqidaageeta xeelliyaagan ayba mishiraachoy deꞌii?
Yerusalaame matan deꞌiya Biitaaniyaa katamaa Yesuusi gakkiyo wode, a laggee Alꞌꞌaazari hayqqoosappe oyddu gallassay aadhiis. Yesuusi hayqqida bitaniyaa michontta gidida Marttiiranne Mayraamiira i moogettidosaa biis. Sohuwaara daro asay shiiqiis. Yesuusi Alꞌꞌaazara hayquwaappe denttido wode, Marttanne Mayraama ay keena ufayttidonaashsha!—Yohaannisa 11:21-24, 38-44 nabbaba.
Martta hayqqidaageetussi mishiraachoy deꞌiyoogaa erawusu. Yihooway hayqqidaageeta denttidi saꞌan deꞌanaadan oottanaagaa a erawusu.—Iyyooba 14:14, 15 nabbaba.
2. Hayqqidaageeti ayba hanotan deꞌiyoonaa?
Xoossay Addaama, “Neeni baana; neeni baanau simmana” yaagiis.—DOOMETAABAA 3:19.
Asaa naati baanaappe merettidosona. (Doomettaabaa 2:7; 3:19) Nuuni ashuwaa maayida ayyaana mereta gidokko. Nu ashoy hayqqiyo wode, nuuppe kiyidi biyaabi baawa. Nuuni hayqqiyo wode, nu guuggee oottenna gishshau qoppana danddayokko. Hayqqidaageeti aybanne erenna gishshau, Alꞌꞌaazari ba hayquwaabaa aybanne yootibeenna.—Eranchchaa 9:5, 6, 10 nabbaba.
Xoossay hayqqida asaa taman barcheyii? Geeshsha Maxaafay hayqqida asay aybanne erennaagaa yootiyo gishshau, siꞌooliyaa tamaa giyoobay Xoossaa sunttaa mooriya, worddo timirtte. Asay taman barchetees giyo qofay i ixxiyooba.—Ermmaasa 7:31 nabbaba.
Hayqqidaageeti Ayba Hanotan Deꞌiyoonaa? Giya Biiduwaa Xeella
3. Hayqqidaageeti nuna haasayissana danddayiyoonaa?
Hayqqidaageeti haasayanaukka siyanaukka danddayokkona. (Mazamure 115:17) SHin issi issi kiitanchati iita gidiyo gishshau, hayqqida asaa milatidi asaa haasayissana danddayoosona. (2 PHeexiroosa 2:4) Nuuni hayqqida asaa oychenna mala Yihooway diggees.—Zaarettido Wogaa 18:10, 11 nabbaba.
4. Hayquwaappe denddanay oonee oonee?
Hayqqidi duufuwan deꞌiya miilooniyan qoodettiya asay saꞌan deꞌanau denddana. Ubba Xoossaa erennaageetuppenne iitabaa oottida asatuppekka issoti issoti hayquwaappe denddana.—Mazamure 37:9; Oosuwaa 24:15 nabbaba.
Hayquwaappe denddiyaageeti Xoossaabaa tumaa tamaarana; qassi Yesuusau azazettiyoogan an ammanana. (Ajjuutaa 20:11-13) Hayquwaappe denddidi loꞌꞌobaa oottiyaageeti saꞌan merinau deꞌana.—Yohaannisa 5:28, 29 nabbaba.
5. Denddoy Yihoowabaa ay qonccissii?
Xoossay ba Naꞌay nu gishshau hayqqanaadan kiittiyoogan hayqqidaageetuyyo hidootay deꞌanaadan oottiis. Hegaa gishshau, denddoy Yihoowa siiquwaanne a aaro kehatettaa nuussi qonccissees. Hayqqidaageeti denddiyo wode, oonaara gayttanau koyay?—Yohaannisa 3:16; Roome 6:23 nabbaba.
