YELAGATA MAADDIYAABAA
12: Hoolliyaa
HEGEE AYBEE?
Hoollee issibay polettanaadan amottiyoogaappe aadhdhees. Hoolliyaa gakkanawu halchchiyoogee, halchchidobaa hanotaadan laammiyoogeenne minnidi oottiyoogee koshshiyaaba.
Hoollee amarida gallassan woy saaminttan, amarida aginan, qassi issi layttan woy hegaappe daruwan gakkiyooba gidana danddayees. Adussa wodiyaa hoolliyaa gakkanawu qantta wodiyaa hoolliyaa kessidi hegaa gakkana bessees.
HOOLLEE KOSHSHIYO GAASUWAA
Hoolliyaa gakkiyoogee neeni kaseegaappe aaruwan nenan ammanettanaadan, laggetettaa minttanaadaaninne ufayttanaadan oottana danddayees.
Banan ammanettiyoogaa: Neeni darin deexxenna hoolliyaa kessada hegaa gakkiyo wode, deexxiya hoolliyaa kessada gakkanaagaa ammanettana danddayaasa. Hegee laggeti iitabawu denttettishin eqettiyoogaa mala galla galla gakkiya paaciyaa xoonanawukka nenan ammanettanaadan maaddees.
Laggetettaa: Asay darotoo, bantta koyiyo hoolliyaa kessidi hegawu gakkanawu baaxetiya asaara laggetiyoogaa dosees. Qassi, laggetettaa minttanawu maaddiya waannabatuppe issoy hara uraara issi mala hoolliyaa kessidi hegawu gakkanawu issippe oottiyoogaa.
Ufayssaa: Neeni hoolliyaa kessada hegawu gakkiyo wode, keehi ufayttaasa.
“Taani hoolliyaa kessiyoogaa dosays. Hegee taani issibaa halchchada hegawu gakkanawu ubbatoo baaxetanaadan oottees. Qassi hoolliyaa gakkiyo wode, oottidobaa qoppada, ‘Hayya! Loyttaas. Taani oottanawu halchchidobaa polaas’ yaagays.”—Kiristtofera.
GEESHSHA MAXAAFAY YOOTIYO MAARAA: “Carkkuwaa hanotaa naagiya ooninne kattaa zerenna; qassi shaarai denddanaashin naagiya ooninne ba kattaa cakkenna.”—Eranchchaa 11:4.
AY OOTTANA DANDDAYAY?
Hoolliyaa kessanawunne hegawu gakkanawu kaallidi deˈiyaabaa ootta.
Dummaya. Neeni gakkanawu koyiyo hoolliyaa xaafa; qassi neeni awugaa kasetada oottana koyiyaakko awugaa kaallada oottana koyiyaakko doora.
Halchcha. Ne kessiyo hoolle ubbawu kaallidi deˈiyaabaa ootta:
-
Ne hoolliyaa gakkiyo wodiyaa keera.
-
Ne hoolliyaa gakkanawu oottanabaa halchcha.
-
Gakkana danddayiya xube aybakko qoppada, hegaa waata xoonanaakko giigetta.
Ootta. Ne halchchidobaa polanawu ubbabay giiganaashin naagoppa. ‘Ta hoolliyaa gakkanawu taani oottana danddayiyo koyrobay aybee?’ yaagada nena oychcha. Yaatada hegaa ootta. Ne hoolliyaa gakkanawu oottidobaa ubbaa yigga.
GEESHSHA MAXAAFAY YOOTIYO MAARAA: “Mino oosanchchaa halchchoi dureyees.”—Leemiso 21:5.
