Gencciya asi metoy gakki simmin sohuwaara minettiya ura. He eeshshay deˈuwan beˈiyoobaappe tamaariyooba. Issi naˈi kunddennan issi issitoo waati hemettanaakko tamaarana danddayennaagaadan, I issi issitoo metoy gakkennan, ba deˈuwaa waati ushachchissanaakko tamaarana danddayenna.

Issi issi naati issibay etawu hanennan ixxiyo wode, eta metoy gakkiyo wode woy eti oottiyooban balidobaa harati yootiyo wode azzanoosona. Harati muleera hidootaa qanxxoosona. Gidoppe attin, kaallidi deˈiya tumaa eti akeekana koshshees:

• Nuuni oottiyo issi issibay ushachchennaagee wottin deˈiyaaba.—Yaaqooba 3:2.

• Deˈuwan metiyaabay ubba asaa gakkees.—Eranchchaa 9:11.

• Nuuni mooridobaa hara asi yootiyoogee tamaaranawu keehi koshshiyaaba.—Leemiso 9:9.

Gencciyoogee deˈuwan metoy gakkiyo wode xooni kanttanaagaa intte naˈi ammanettanaadan maaddana.

Intte naˈi mooriyo wode.

GEESHSHA MAXAAFAY YOOTIYO MAARAA: “Xillo asi laapputoo kunddikkokka denddees.”—Leemiso 24:16.

Issi metoy wolqqaamakkonne woy wolqqaama gidennaakko intte naˈi waati kuuyanaakko tamaaranaadan maaddite. Leemisuwaassi, I timirtte keettan issi paaciyan wullikko, waananee? I, “Taani aynne likkebaa oottana danddayikke!” giidi hidootaa qanxxana danddayees.

Intte naˈi haroode waatidi kaseppe loytti oottana danddayiyaakko qoppanaadan maaddite. Yaatikko, I he metuwaa suurissanawu baaxetana, qassi azzaniyoogaa aggana.

Hegaa bollikka, intte naˈi metootido metuwaa intte suurissennaadan naagettite. SHin, hegaa suurissiyo ogiyaa koyanaadan maaddite. Intte A woy O hagaadan oychchana danddayeeta: “Neeni tamaaraydda deˈiyo yohuwaa loytta akeekanawu waatana danddayay?”

Iitabay gakkiyo wode.

GEESHSHA MAXAAFAY YOOTIYO MAARAA: “Wontto intte de7oi ai hananaakkonne erekketa.”—Yaaqooba 4:14.

 Deˈoy hananabay erettenna. Hachchi dure gidida asi wontto hiyyeesa gidana danddayees; hachchi payya gidida asi wontto harggana danddayees. Geeshsha Maxaafay hagaadan gees: “Eesotiya wottanchchati ubba wode xoonokkona; woikko mino olanchchatikka ubba wode olan xoonokkona; . . .  SHin ubbaikka qaadainne wodee oottoogaadan [“wodee oottiyoobaaninne qoppennan gayttiyaaban,” NW] hanees.”—Eranchchaa 9:11.

Intte aawa woy aayo gidiyo gishshawu, intte naˈi qohettennaadan naaganawu inttessi danddayettida ubbabaa ootteeta. SHin, intte naˈa iitaba ubbaappe intte naagana danddayennaagee qoncce.

Intte naˈa azzanttiyaabi, leemisuwawu mata laggee woy so asappe issoy hayqqiyoogaa malabay gakkiyo wode, I genccanaadan maaddite. Yaatiyoogan, I gasttiyo wode oosuwaappe yedetettiyo woy miishsha metootiyo wode waati genccanaakko tamaarisseeta. *

Intte naˈawu woy intte naˈeessi seeray imettiyo wode.

GEESHSHA MAXAAFAY YOOTIYO MAARAA: “Zoriyaa siya; . . .  Yaatikko, neeni wurssettan aadhdhida eranchcha gidana.”—Leemiso 19:20.

Intte naˈa issi uri seeriyoy yashissanaassa woy qohanaassa gidennan, suureyana koshshiyaabaa suureyanaadaana.

Intte naˈi seeraa ekkanaadan intte tamaarissiyo wode, inttekka intte naˈikka goˈettana. Jona giyo issi aaway hagaadan giis: “Naati bantta mooruwaa suurissana xayikko, eti mule tamaarokkona. Eti bantta deˈuwan daro metuwan gelana, qassi intte eta mooruwaa ubbatoo suurissana. Hegee yelidaageetunne eta naˈaa deˈuwaa azzanttiyaaba oottees.”

Seeray intte naˈa goˈˈanaadan waati maaddana danddayeetii? Timirtte keettan woy harasan intte naˈawu seeray imettiyo wode, he seeray bessennaba yaagoppite. SHin, hagaadan oychchana danddayeeta:

• “Seeray neessi imettidoy aybissa gaada qoppay?”

• “Neeni waata kaseegaappe loyttana danddayay?”

• “Neeni haroode hegaa malabaa oottikko waatuutee?”

Seeray intte naˈi haˈˈikka sinttappekka goˈettanaadan oottiyoogaa hassayite.