Worddo Laggiyaa

Neeni yelagatettan erettido issi “laggee” deˈees. I neeni nena gastta asadan xeellanaadan, qassi laggetuura maayettanaadan maaddiyaaba milatiis. Neeni unˈˈettiyo wode awudekka, I neeni woppu gaanaadan oottees. Darobawu neeni an ammanettaasa.

SHin guyyeppe I keehi iita asa gidiyoogaa eradasa. I awudenne, ubba neeni aara gidana koyenna sohuwankka neeppe duuxxenna. Neeni nena gastta asadan xeellanaadan I oottikkonne ne payyatettaa qohiis. Hegaappekka aaruwan, I ne miishshaappe amaridaagaa wuuqqees.

Mata wodeppe haa simmin, neeni aara laggetiyoogaa agganawu baaxetadasa; shin I duuxxennan ixxiis. Yaatidi I neeyyo goda mala gidiis. Neeni aara erettido gishshawu zilˈˈettaasa.

DARO asawu sijaaray hegaa mala lagge. Erlino giyo, 50 layttawu sijaaraa uyida maccaasiyaa hagaadan gaasu: “Sijaaray asaara deˈiyoogaappe aaruwan tana maaddees. I tanaara takkida lagge gidiyoogaappekka aaruwan, issi issitoo ta laggee a xalla.” SHin Erlina guyyeppe akeekidoogaadan, sijaaray worddo lagge, ubba keehi qohiyaagaa. Doomettan deˈiya qofay issibi attishin, A yootidoba gaana danddayeettees. Sijaaraa uyiyoogee Xoossay immido nu bollaa tunissiyoogaappe denddidaagan, A xeelan iitaba gidiyoogaa erada, A sijaaraa uyiyoogaa aggaasu.—2 Qoronttoosa 7:1.

Franka giyo urikka Xoossaa ufayssanawu giidi sijaaraa uyiyoogaa aggiis. SHin I wurssettaagaa uyoosappe issi gallassa gidiyaagee aadhdhin, kase uyidi olido ciraacuwaa son koshshaa tattaafees. Franki, “Hegee tawu duuxa gidiis. Kase ta olidobi deˈikko demmana gaada wuygen zuummidoogee tana keehi sheneyiis. Hegaappe simmin mule sijaaraa uyabeykke.”

Sijaaraa uyiyoogaa agganawu asay keehi metootiyoy aybissee? Xannaˈiyaageeti hegawu daro gaasoy deˈiyoogaa akeekidosona: (1) Sijaaray jallissiya xaliyaadan amale gidana danddayees. (2) Sijaaran deˈiya nikotine giyoobay A uyin laappun sokonddiyan guuggiya kiyees. (3) Sijaaraa uyiyoogee miyoogaara, uyiyoogaara, asaara haasayiyoogaara, unˈˈissiyaabaappe minettiyoogaaranne hegaa malabaara gayttiyo gishshawu, izaawu deˈuwan darotoo attennaba.

SHin Erlininne Franka hanotaappe beˈidoogaadan, ha iita amaliyaa aggana danddayettees. Neeni haˈˈi sijaaraa uyiyaabanne agganawu koyiyaaba gidikko, kaallidi deˈiya huuphe yohoti hegawu nena maaddana.