Likkebaanne Balabaa: Geeshsha Maxaafaa—Ammanttiya Kaaletuwa
Nuuyyo woy haratuyyo siyettiyaba xallaa kaallidi likkebaanne balabaa xeelliyagan kuuyiyogee ubbatoo loˈˈobaa kaalettees giidi qoppana danddayokko. Geeshsha Maxaafay hegee aybissakko qonccissiyogaa xalla gidennan, hegaappe aadhdhiyabaakka yootees. Likkebaanne balabaa shaakki eranawu maaddiya kaaletoy A giddon deˈees; hegee nuuni ufayttanaadan oottees.
NUUSSI KOSHSHIYA KAALETUWA
Xoossaa Yihooway a asawu A maadoy koshshiyogaanne I maaddennan asay barkka aybanne oottana danddayennaagaa Geeshsha Maxaafan qonccissiis. (Ermmaasa 10:23) Likkebaanne balabaa xeelliyagan Geeshsha Maxaafan deˈiya kaaletuwa I immidoy hegaassa. I asaa siiqees, qassi nuuni nuna qohiyanne metootanaadan oottiya iitabaa kuuyanaadan koyenna. (Zaarettido Wogaa 5:29; 1 Yohaannisa 4:8) Hegaappekka aaruwan, I nuna medhdhidaagaa gidiyo gishshawu, likkebaanne balabaa xeelliyagan keehi loˈˈobaa nuna zoranawu ayyo hayyoynne eratettay deˈees. (Mazamure 100:3; 104:24) Gidikkonne, Xoossay asay I yootiyo maaraa kaallidi deˈanaadan mule wolqqanttenna.
Yihooway koyro bitaniyayyonne maccaaseeyyo, Addaameyyonne Hewaaniyyo, eti tumuppe ufayttanawu koshshiya ubbabaa immiis. (Doomettaabaa 1:28, 29; 2:8, 15) Qassi, eti azazettanaadan deexxenna azazuwakka immiis. Gidikkonne, he azazuwa azazettanaakko agganaakko eti banttawu dooranaadan oottiis. (Doomettaabaa 2:9, 16, 17) Azzanttiyabay, Addaameenne Hewaana Xoossay kessido maarata gidennan, banttawu kessido maarata kaallidosona. (Doomettaabaa 3:6) Hegee ay kaalettidee? Asay likkebaanne balabaa xeelliyagan banttawu kuuyiyogee etawu ushachchanaadan oottanee? Chii. Hanno gakkanawu hanidabay bessiyogaadan, Xoossaa maaraa kaallennaagee sarotettaynne ufayssay deˈanaadan oottenna.—Eranchchaa 8:9.
Nuuni diccido hanotay aybanne gido, loˈˈobaa kuuyanawu maaddiya kaaletuwa Geeshsha Maxaafay yootees. (2 Ximootiyoosa 3:16, 17; “ Ubba Asawu Haniya Maxaafaa” giya saaxiniya xeella.) Geeshsha Maxaafay hegaa waati yootiyakko akeeka.
Geeshsha Maxaafay “Xoossaa qaalaa” geetettidoy aybissakko gujjada era.—1 Tasalonqqe 2:13. Geeshsha Maxaafaa Xaafissiday Oonee? giya biiduwa jw.org saytiyan beˈa.
GEESHSHA MAXAAFAY XOOSSAY NUUPPE KOYIYOBAA YOOTEES
Geeshsha Maxaafay Xoossay asaara dabbotido dabbotaabaa koyroppe doommidi yootees. Likkebaanne balabaa, qassi maaddiyabaanne qohiyabaa Xoossay waati xeelliyakko akeekanaadan maaddiyabay Geeshsha Maxaafan deˈees. (Mazamure 19:7, 11) Nuuni appe tamaariyobay awudenne laamettennaba; qassi hegee nu deˈuwan ubba wode likkebaa kuuyanaadan maaddees.
Leemisuwawu, ane Leemiso 13:20n deˈiya ha zoriya akeeka: “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees.” Ha maaray beni wode maaddidoogaadan, ha wodiyankka maaddees. Hegaadan keehi maaddiya daro maarati Geeshsha Maxaafan deˈoosona.—“ Ay Wodekka Maaddiya Geeshsha Maxaafay Yootiyo Hayyuwa” giya saaxiniya xeella.
Shin hagaadan qoppana danddayaasa: ‘Likkebaanne balabaa xeelliyagan Geeshsha Maxaafay yootiyo kaaletoy ha wodiyan maaddiyogaa waana ammanettana danddayiyanaa?’ Kaalliya huuphe yohoy amarida asatu deˈuwan hanidabaa qonccissees.
a Yihoowa giyogee Xoossawu buzo suntta.—Luqaasa 4:8.
