Likkebaanne Balabaa: Maaddiya Kaaletuwa
Miilooniyan qoodettiyageeti Geeshsha Maxaafay yootiyo kaaletoy maaddiyagaanne ammanttiyagaa gidiyogaa akeekido oyddu hanotata beꞌa.
1. Aqo Deꞌuwa
Aqo deꞌuwanne aqo deꞌuwan ufayttanawu oottana koshshiyabaa xeelliyagan asay dumma dummabaa qoppees.
GEESHSHA MAXAAFAY HAGAADAN GEES: “Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.”—Efisoona 5:33.
HEGAA BIRSHSHETTAA: Aqo deꞌuwa doomissiday Xoossaa; yaaniyo gishshawu, aqo laggeti ufayttanawu aybi koshshiyakko I erees. (Marqqoosa 10:6-9) Azinaynne machchiya banttaagaappe aaruwan issoy issuwawu koshshiyabaa kaseyikko, naaꞌꞌaykka ufayttana danddayoosona. Issi azinay ba machchiyo bonchchiyogaaninne iyyo qoppiyogan O siiqiyogaa bessees. Qassi issi machchiya haasayiyobaaninne oottiyoban ba keettaawaa bonchchiyogaa bessawusu.
GEESHSHA MAXAAFAY YOOTIYO KAALETOY MAADDEES: Veetinaamen deꞌiya Kuwananne Tiiyo giyo azinaynne machchiya bantta aqo deꞌuwan mule ufayttana danddayennabadan qoppidosona. Kuwani darotoo kehenna. I hagaadan giis: “Tiiyissi siyettiyabay tana qofissenna, qassi darotoo O hanqqetissiyabaa oottays.” Tiiya paraman shaahettanawu koyaasu. A hagaadan gaasu: “Hegaappe simmin taani ta azinaa ammanettana woy bonchchana danddayennabadan qoppaas.”
Guyyeppe, Kuwaninne Tiiya Geeshsha Maxaafay tamaarissiyobaanne Efisoona 5:33y yootiyobaa bantta aqo deꞌuwan waati oosuwan peeshshana danddayiyakko eridosona. Kuwani hagaadan giis: “Ha xiqisee taani keha gidana koshshiyo gaasuwa akeekanaadaaninne Tiiyo siiqiyogaa A eranaadan oottana, qassi iyyo aquwaban, asatettaabaaninne qofan koshshiyabaa kunttana bessiyo gaasuwa akeekanaadan maaddiis. Taani hegaadan oottido wode, A tana kaseegaappe aaruwan siiqiyogaanne bonchchiyogaa doommaasu.” Qassi Tiiya hagaadan gaasu: “Taani Efisoona 5:33y yootiyobaa kaseegaappe aaruwan oosuwan peeshshiyogan ta keettaawaa bonchchiyogaa bessido wode, I kaseegaappe aaruwan tana siiqiis, qohuwappe naagiisinne sarotettay deꞌanaadan oottiis.”
Aqo deꞌuwabaa gujjada eranawu, “So Asaa Ufayssawu Maaddiya 12 Zoriya” giya Beegottite! Paydo 2 2018 jw.org saytiyan nabbaba.
2. Harata Oyqqiyo Ogiya
Asay zariya, biittaa, meraa, haymaanootiya woy mattumaara gayttidaban dooriyobaa gaasuwan darotoo harata qohees.
GEESHSHA MAXAAFAY HAGAADAN GEES: “Asa ubbaa bonchchite.”—1 PHeexiroosa 2:17.
HEGAA BIRSHSHETTAA: Geeshsha Maxaafay nuuni hara zariya, mattuman issi mala gidida aqo oyqqidaageeta, woy hara biittaa asaa ixxanaadan tamaarissenna. Ubba, Geeshsha Maxaafay nuuni haratu zariya, biittaa, woy etawu deꞌiya aquwa xeellennan asa ubbaa bonchchana koshshiyogaa yootees. (Oosuwaa 10:34) Harati nuuni maayettennabaa ammaniyaba woy oottiyaba gidikkokka, eta kehatettaaninne bonchchuwan oyqqana danddayoos.—Maatiyosa 7:12.
GEESHSHA MAXAAFAY YOOTIYO KAALETOY MAADDEES: Daaneeli Iisiya biittaa asaa ba biittaa morkkedan xeellana koshshiyogaa tamaariis. I Iisiya biittaa asa gidida ubbaa ixxiyogaa doommiis; qassi asay corattiyosan eta darotoo cayees. Daaneeli hagaadan giis: “Ta eeshshay taani ‘ta biittaa siiqiyogaa qonccissiyaba’ gaada qoppaas. Taani qoppiyobay woy oottiyobay bala gaada qoppabeykke.”
Daaneeli guyyeppe Geeshsha Maxaafaa tamaariis. I hagaadan giis: “Taani ta qofaa muleera laammana koshshiis. Taani asaa Xoossaagaadan xeellana koshshees; hegeekka, nu biittay awa gidikkonne, nuuni ubbay issi mala.” Daaneeli asaara gayttiyo wode haꞌꞌi bawu siyettiyabaa qonccissiis. Hagaadan giis: “Eti awa biittaa asa gidikkonne, hegee tana qofissenna. Taani haꞌꞌi ubba biittaa asaa siiqays; qassi kumetta saꞌan mata laggeti taayyo deꞌoosona.”
Gujjada eranawu, “Asaa Coo Ixxiyoogee Attanee?” giya Beegottite! Paydo 3 2020 jw.org saytiyan nabbaba.
3. Miishshaa
Daroti ufayttanaadaaninne sinttappe loꞌꞌo deꞌuwa deꞌanaadan oottees giidi duretanawu baaxetoosona.
GEESHSHA MAXAAFAY HAGAADAN GEES: “Miishshai asa iitaappe kammidi ashshiyoogaadan, aadhdhida eratettaikka ashshees. SHin, aadhdhida eratettai miishshaappe dariyoogee, i asassi de7o immanau danddayiyoogaana.”—Eranchchaa 7:12.
HEGAA BIRSHSHETTAA: Nuussi miishshay koshshikkonne, nuuni ufayttanaadan woy sinttappe loꞌꞌo deꞌuwa deꞌanaadan oottana danddayenna. (Leemiso 18:11; 23:4, 5) Nuuni tumu ufayssaa demmananne sinttappe loꞌꞌo deꞌuwa deꞌana danddayiyoy Geeshsha Maxaafan deꞌiya Xoossay yootiyo hayyuwa oosuwan peeshshiyogaana.—1 Ximootiyoosa 6:17-19.
GEESHSHA MAXAAFAY YOOTIYO KAALETOY MAADDEES: Inddooneezhiyan deꞌiya Karddoy dure gidanawu baaxetiis. I hagaadan giis: “Daro asay amottiyobay tawu deꞌees; hara heeri baas, qassi alꞌꞌo buqurata, kaametanne keettata shammaas.” Shin guyyeppe he ubba aqoy xayiis. Karddoy hagaadan giis: “Taani daro layttawu minna oottada shiishshido miishshaa, balibakkiyageeti liphida ayfee xeellanaashin xayssidosona. Taani ta deꞌo laytta ubban duretanawu baaxetaydda takkaas; shin wurssettan aybinne baynnabadan tawu siyettiis, tana pattennabadan xeellaasinne unꞌꞌettaas.”
Karddoy miishshaa xeelliyagan Geeshsha Maxaafay yootiyobaa oosuwan peeshshiyogaa doommiis. I aquwa shiishshanawu ba wolqqa ubbaa wurssiyogaa aggidi, sima deꞌuwa deꞌanawu dooriis. I hagaadan giis: “Taani Xoossaara dabbotido gishshawu, haꞌꞌi tumu ufayssaa demmaas gaada qoppays. Taani haꞌꞌi loytta xiskkana danddayays, qassi tumuppe ufayttays.”
Geeshsha Maxaafay miishshaa xeelliyagan yootiyobaa gujjada eranawu, Wochchiyo Keelaa Paydo 3 2021n kiyida, “Ufayssiya Deꞌuwaa Deꞌanawu Xoqqa Timirtteenne Miishshay Maaddana Danddayii?” giya huuphe yohuwa jw.org saytiyan nabbaba.
4. Mattumaa Gaytettaa
Mattumaa gaytettaa xeelliyagan likkebay awugaakko asay dumma dummabaa qoppees.
GEESHSHA MAXAAFAY HAGAADAN GEES: “Shaaramuxiyoogaa muleera [aggite]. Intte ubbai huuphen huuphen geeshshatettaaninne bonchchuwan machcho waati ekkiyaakko eranau besseesippe attin, Xoossaa erenna ammanenna asatudan, keehi amottiyoogan ekkanau bessenna.”—1 Tasalonqqe 4:3-5.
HEGAA BIRSHSHETTAA: Geeshsha Maxaafay nuuni mattumaa gaytettaa koshshawu zawaa wottana koshshiyogaa yootees. ‘Pokkiya tuna nagaraa’ giya qaalay shaaramuxiyogaa, wodiraa laammiyogaa, aqo oyqqibeennaageeti mattumaa gayttiyogaa, mattuman issi mala gididaageeti mattumaa gayttiyogaanne asay mehiyara mattumaa gayttiyogaa qonccissees. (1 Qoronttoosa 6:9, 10) Mattumaa gaytettay eketti gelettida attumaagaanne maccaari xalaalawu Xoossay immido imota.—Leemiso 5:18, 19.
GEESHSHA MAXAAFAY YOOTIYO KAALETOY MAADDEES: Awusttiraaliyan deꞌiya Kiila hagaadan gaasu: “Taani aqo oyqqennan deꞌiyo wode haratuura mattumaa gayttikko, eti tana siiqananne woppu gaada deꞌana danddayays gaada qoppaas. Shin hanidabay hegaappe keehi dumma. Taani woppaa xayaasinne azzanaas.”
Guyyeppe, Kiila Geeshsha Maxaafay mattumaa gaytettaa xeelliyagan yootiyobaa tamaaraasunne hegaa oosuwan peeshshaasu. A hagaadan gaasu: “Xoossay kessido maarati nuna qohuwappe naaganawu maaddiyogaa akeekaas. Taani ubbabaa Yihooway koyiyo ogiyan oottiyo gishshawu, haꞌꞌi woppu gaasinne harati tana siiqiyogaa akeekaas. Geeshsha Maxaafay yootiyo kaaletuwa kaallidoogee keehi daro azzanuwappe tana naagiis!”
Gujjada eranawu, “Aqo Oyqqennan Issippe Deꞌiyoogaa Xeelliyaagan Geeshsha Maxaafay Woygii?” giya huuphe yohuwa jw.org saytiyan nabbaba.
Nuna Medhdhidaagee nuuni likkebaanne balabaa shaakki eranaadan maaddees. Likkebaanne balabaa xeelliyagan I yootiyo kaaletuwawu azazettiyogee issi issitoo waayissiyaba gidikkonne, yaatiyogee bessiyaba. Hegee nuuni ubba wode ufayttanaadan oottanaagaa ammanettana danddayoos.
