“Intte ta sunttan woossiyoobaa ubbaa Aawai intteyyo immana.”—Yohaannisa 16:23.

Misiletu baggaara, geeshshata giyoogeetu baggaara, kiitanchchatu baggaara woy hayqqida nu mayzzatu baggaara gidennan, Yesuus Kiristtoosa sunttan woossanaadan Yihooway koyiyoogaa Yesuusi yootidobay loytti qonccissees. Nuuni Xoossaakko Yesuusa sunttan woossiyo wode, Yesuusi nuussi oottidobaa gishshawu Xoossay nu woosaa siyiyoogaa eriyoogaa bessoos. Yesuusi, “Ta baggaarappe attin, ooninne ta Aawaakko baanau danddayenna” yaagiis.—Yohaannisa 14:6.

“Intte metuwaa ayyo yootite.”—Mazamure 62:8.

Nuuni Yihoowakko woossiyo wode, siiqiya issi aawaa haasayissiyoogaadan haasayissana koshshees. Maxaafaappe nabbabiyoogaa woy kase hassayiyoobaa zaaretti zaaretti giyoogaa aggidi, bonchchuwaaninne wozanappe A haasayissana koshshees.

‘Xoossay koyiyoogaadan, aynne nuuni A woossikko, I siyana.’—1 Yohaannisa 5:14.

Xoossaa Yihooway nuussi oottanabaa qassi nuuni assi oottanaadan I koyiyoobaa Geeshsha Maxaafay yootees. Nu woosaa Xoossay siyana mala nuuni I “koyiyoogaadan” woossana koshshees. Yaatanawu, A loytti eranaadan nuuni Geeshsha Maxaafaa xannaˈana koshshees. Nuuni yaatikko, nu woosay Xoossaa ufayssana.

Neeyyo koshshiyaabatuyyo woossa. Nuuyyo galla galla koshshiyaabatuyyo, hegeetikka qumawu, maayuwawunne deˈiyoosawu Xoossaa woossana danddayoos. Qassi nuuni loˈˈobaa kuuyanaadan maaddiya aadhdhida eratettaa demmanawunne metuwaa gencciyo wolqqaa demmanawu woossana danddayoos. Qassi ammanuwawu, maarotaa demmanawunne Xoossaa maaduwawu woossana danddayoos.—Luqaasa 11:3, 4, 13; Yaaqooba 1:5, 17.

Haratussi woossa. Bantta naata siiqiya yelidaageeti eta naati issoy issuwaara siiqettiyo wode ufayttoosona. Yihooway saˈan deˈiya ba naatikka issoy issuwaa siiqanaadan koyees. Nuuni nu aqo laggiyawu, nu naatuyyo, nu dabbotuyyoonne nu laggetuyyo woossiyoogee bessiyaaba. Erissiyo ashkkaray Yaaqoobi nuuni ‘issoy issuwaayyo Xoossaa woossanaadan’ yootiis.—Yaaqooba 5:16.

Galatiyoogaa yoota. Xoossay nuna Medhdhidaagaa, qassi Geeshsha Maxaafay abaa hagaadan gees: “Intteyyo iraa saluwaappe bukissees; kattaakka i wodiyan immees; qassi qumaa immidi, inttena daro ufaissees; yaatidi intteyyo lo77obaa [oottiis.]” (Oosuwaa 14:17) Nuuni Xoossay nuuyyo oottido ubbabaa qoppiyoogee woosan A galatanaadan nuna denttettana. Nuuni Xoossawu azazettiyoogankka A galatiyoogaa bessana koshshees.—Qolasiyaasa 3:15.

Nuuni wozanappe woossido woosay sohuwaara simmibeenna gishshawu issi issitoo azzanana danddayoos. Hegaa giyoogee Xoossay nuussi qoppenna giyoogee? CHii! Nuuni aggennan woossiyoogee koshshana danddayiyoogaa bessiya deˈuwan hanida kaallida deˈiyaabaa beˈa.

Koyro huuphe yohuwan abay odettido Istivi, “Taani ubbatoo woossennaakko, zaarettada ufayttiyo hidootaa ubbay xayana” yaagiis. I laamettanaadan maaddidabay aybee? I Geeshsha Maxaafaa xannaˈiyoogaa doommiis, qassi woossananne hegaa aggennan oottana koshshiyoogaa akeekiis. Istivi hagaadan giis: “Tana siiqiya laggetuppe demmido minttettiya maaduwawu ubba gishshawu Xoossaa galatanawu akko woossaas. Taani haˈˈi awudeegaappenne aaruwan ufayttays.”

Xoossay ta woosaa siyanawu taani bessenna asa gaada qoppida Jaanibay shin? A, “Pattenna asadan tawu siyettiyo wode, tawu hegaadan siyettiyoy aybissakko akeekanaadan tana maaddana mala Xoossaa minttada woossaas” yaagaasu. Hegee O waati maaddidee? “Xoossaakko woossiyoogee tana I xeelliyoogaadan taanikka tana xeellanaadan maaddiis; ta wozanay tana boriyaaba gidikkokka I tana borennaagaa akeekaas. Hegee taani hidootaa qanxxennaadan maaddiis.” Hegee ay demissii? “Woosay Yihooway tawu beettiyaagaa keenaa qoncce, siiqiya Xoossaa, Aawaanne Dabbo gidiyoogaa akeekanaadan tana maaddiis; I ubbatoo tana maaddiyaanne I koyiyoobaa oottanawu baaxetiyo wode ubban tana maaddana.”

Isaabeeli hanotaakka beˈa. A shahaarido wode dottoree A yelana naˈaa bollay sila gidanaagaa iyyo yootiis. A keehi dagammaasu. Issoti issoti shahaaraa kesissanaadankka O zoridosona. “Taani tana gakkida waaye ubbaappe denddidaagan, hayqqanawukka amottaas.” Yaatin A ay oottadee? A, “Xoossay tana maaddanaadan zaaretta zaarettada woossaas” yaagaasu. A Jerarda giyo attuma naˈaa yelaasu; qassi A bollay sila. Isaabeela ba woosaa Xoossay zaaridabadan qoppadee? Ee qoppaasu! Ayba ogiyan? Isaabeela hagaadan gaasu: “Ta naˈawu haˈˈi 14 laytta; A bollay sila gidikkonne I keehi ufayttees. I taayyo gita anjjo. Taani A beˈiyo wode, Xoossaa Yihooway ta woosaa zaaridoogaa taani akeekays.”

Hegaadan wozanappe woossiyoogee mazamuraawee, “Abeet GODAU, neeni banttana ziqqissiyaageetu amuwaa [woosaa] siyaasa” giidobaa nuuni qoppanaadan oottees. (Mazamure 10:17) Aggennan Xoossaakko woossiyo loˈˈo gaaso deˈees!

Yesuusi woossido woosatuppe daroti Geeshsha Maxaafan deˈoosona. Hegeetuppe keehi erettidaagee I ba erissiyo ashkkarata tamaarissidoogaa. Nuuni hegaappe ay tamaarana danddayiyoo?