Xoossay Nena Dureyanau Qaalaa Gelii?

‘Xoossay intte dure gidanaadan, giishin intteyyo daro kaameenne daro miishshaa demmiyo oosoy deˈanaadan koyees. A ammanite; intte immana danddayiyo keena miishshaa ubbaa intte borssaappe kessidi immite.’

BRAZILEN attamettiya issi gaazeexay yootiyoogaadan, he biittan deˈiya issi issi haymaanooteti hegaadan goosona. Hegee daro asay xoqqu oottidi xeelliyooba. Amerkkan deˈiya Kiristtaane geetettiya asaa bolli oottido xinaatiyaa xeelliyaagan, Taym maxeetee: “Xeetaappe 61 kushe gidiyaageeti asay duretanaadan Xoossay koyiyoogaa ammanoosona. Qassi xeetaappe 31 kushe gidiyaageeti . . . issi uri ba miishshaa Xoossaayyo immikko, Xoossay daro miishshaa immanaagaa maayoosona” yaagiis.

Darotoo duretettaabaa tamaarissiyoogaa geetettiya, hegaa mala ammanoy, Tohossa Amarkkan, Brazile mala biittatun keehippe aakkiiddi deˈees; qassi Xoossaappe miishshaanne aquwaa demmeeta giidi tamaarissiya woosa keettaa daro asay zulees. SHin Xoossay baassi oottiyaageeta dureyanau tumuppe qaalaa gelii? Beni wode deˈida, Xoossau oottidaageeti ubbay duree?

Ibraysxxe Geeshsha Maxaafaa Xuufetun Xoossaa anjjoy aquwaaban duretiyoogaara gayttidaba gidiyoogaa darotoo nuuni nabbabiyoogee tuma. Leemisuwau, Zaarettido Wogaa 8:18n: “Neeni GODAA ne Xoossaa hassaya; aissi giikko, . . . neeni duretaa demmanaadan neeyyo wolqqaa immidaagee attennee” yaagiyaagaa nabbaboos. Hegee Israaˈeeleti Xoossaayyo azazettiyaaba gidikko, i eta dure kawotetta oottanaagaa eti ammanettanaadan oottees.

Xoossaayyo oottiya issi ura xeelliyaagan shin? Ammanettida asa gidida Iyyoobi keehippe dure; qassi Seexaanay ayyo deˈiyaabaa xayssi simmin, Yihooway Iyyooba kase aquwaa gishshaa “naa77u kushe oottidi immiis.” (Iyyooba 1:3; 42:10) Abrahaamikka dure asa. Doomettaabaa 13:2y, i “mehiyan, biraaninne worqqan daro” duretidoogaa yootees. Arshsho baggappe oyddu kawotettati issippe yiidi, Abrahaama ishaa naˈaa Looxa omooddido wode, Abrahaami “olaa eriya ba son yelettida heezzu xeetanne tammanne hosppun asaa denttiis.” (Doomettaabaa 14:14) “Olaa eriya” 318 asaa gujjin, Abrahaama keettaa asay keehi cora gidana bessees. Hegaa keena cora so asaa ayssanau danddayidoogee, Abrahaami daro wudee deˈiyo dure asa gidiyoogaa bessees.

Ee, beni wode deˈida ammanettidi Xoossau oottidaageetuppe daroti dure; etappe amaridaageeti Abrahaama, Yisaaqa, Yaaqooba, Daawitanne Solomona. Gido shin, hegaa giyoogee, Xoossay baayyo oottiya ubbaa dureyees giyoogee? Hara baggaara issi uri hiyyeesa gidiyoogee, he uran Xoossay ufayttenna giyoogee? Kaalliya huuphe yohuwan ha oyshata beˈana.