Bala Timirttiyaa 6: Goynuwan Misiliyaa Goˈettiyoogee Xoossaa Ufayssiyaaba

Ha bala timirttiyau denddoy aybee? “Misilee beni Kiristtaanetu goynuwan erettiyaaba gidenna. . . . Woosa keettay 4ttanne 5tta xeetu layttan misiliyaa goˈettiyoogaa doommidoogau gaaso geetettiyaabay, tamaaribeenna asay sibkatiyan tamaariyoogaappenne maxaafaappe tamaariyoogaappe misiliyaa goˈettiyoogan Kiristtaane timirttiyaa loytti tamaarana danddayees giyo qofaa.”—Saykiloppidiya of Bayblikal, Tiˈolojikal, end Eklesiyasttikal Litirecher, Makilintokinne Isttirongi xaafidoogaa, Vooliyum 4, sinttaa 503nne 504.

Geeshsha Maxaafay woygii? “Bolla saluwan de7iyaabaa, woikko garssa sa7an de7iyaabaa, woikko sa7aappe garssan haatta giddon de7iyaabaa aibanne malatissada neeyyo goinniyo misileta kessoppa. Etayyo hokkoppa woikko etayyo goinnoppa.” (Kessaabaa 20:4, 5) Kiitettida Yohaannisi koyro xeetu layttan deˈida Kiristtaanetuyyo: “Ta naatoo, eeqatuppe intte huuphiyaa naagite” yaagidi xaafiis.—1 Yohaannisa 5:21.

Woosa keettati giyoogaadan, misileti eti kalˈˈatiyoobaakko shiiqanaunne a bonchanau goˈettiyooba xallee? Ze Inssaykilopidiya of Rilijin giyo maxaafay: “Misileti koyro heeran tamaarissanaunne alleeqoossi goˈettidoba gidana danddayoosona; haray attikko eta goˈettanau gaaso giyoobi hegaa gidana danddayees. SHin eti sohuwaara goynuwau goˈettiyooba gididosona gaana danddayettees. Arshsho Orttodokisiyan keehippe erettida misiletu hanotay hegaa bessees” yaagees. SHin hananabaa yootiya Isiyaasi: “Xoossaa intte oonaara milatissuuteetii? Woikko aibiira likkissi xeelluuteetii?” yaagidi oychidoogee bessiyaaba.—Isiyaasa 40:18.

[Picture on page 9]

BALA TIMIRTTIYAA AGGADA TUMAA MINTTA OYQQA

Daro woosa keettatun tamaarissiyo bala timirtteta qanttan beˈidoogaappe ay kuuyana danddayiyoo? Minttettiya Geeshsha Maxaafaa tumay ha “medhdhi ekkido haisiyan [Giriikettuwan, mitos]” xoonettana danddayenna.—2 PHeexiroosa 1:16.

Yaatiyo gishshau, ne qofaa aassada, tumaa pultto gidida Xoossaa Qaalaara neeni tamaaridobaa gatta xeellanau mammottoppa. (Yohaannisa 17:17) Yaatiyaaba gidikko: “Intte tumatettaakka erana; qassi tumatettai inttena ailletettaappe kessana” yaagiya qaalay tuma gidiyoogaa neeni akeekana.—Yohaannisa 8:32.

Kaallidi deˈiya Geeshsha Maxaafaa xiqiseta beˈa: Isiyaasa 44:13-19; Oosuwaa 10:25, 26; 17:29; 2 Qoronttoosa 5:7

TUMAA:

Goynuwan misiliyaa goˈettiyoogee Xoossaa ufayssenna

[Sinttaa 9n deˈiya Misilee Ekettidosaa]

Pictorial Archive (Near Eastern History) Est.