Kiristtoosa Loyttada Kaallay?

“Hegee intte kaseesappe de7⁠iyo maaraa; shin ha77⁠i intte kaseegaappe loittidi oottanaadan, . . . zoroos.”—1 TASALONQQE 4:1.

1, 2. (a) Yesuusi saˈan deˈiyo wode daro asay ayba gitabaa beˈidee? (b) Nuuni deˈiyo wodeekka xoqqu oottidi xeelliyoogaa gididoy aybissee?

YESUUSI saˈan deˈiyo wode neeni deˈidaba gidiyaakko, hegee ay keena ufayssiyaabakko qoppa eray? Neeni sahettiyo wode Yesuusi pattiyoogaanne asatettan gakkiya issi issi qohuwaappe nena ashshiyoogaa qoppana danddayaasa. Woykko Yesuusa beˈiyoogaanne i yootiyo wode siyiyoogaa, giishin appe tamaariyoogaa woykko maalaalissiya issi issibaa i oottishin beˈiyoogaa qoppana danddayaasa. (Marqqoosa 4:1, 2; Luqaasa 5:3-9; 9:11) Yesuusi he ubbabaa oottiyo wode deˈiyoogee gita maata! (Luqaasa 19:37) He wodeppe haa simmin, hegaa mala oosuwaa beˈida yeleti baawa; qassi Yesuusi “bana yarshshidi” saˈan polidobay zaaretti hanennaba.—Ibraawe 9:26; Yohaannisa 14:19.

² Nu wodeekka xoqqu oottidi xeelliyo wode. Aybissi? Nuuni deˈiyoy, ‘wurssetta wode,’ qassi ‘wurssetta gallassa’ giidi Geeshsha Maxaafay kasetidi yootido wodiyaana gidiyoogaa eroos. (Daaneela 12:1-4, 9; 2 Ximootiyoosa 3:1) Ha wodiyan, Seexaanay saluwaappe olettiis. Mata wode, i qashettidi “ciimma ollan” yegettana. (Ajjuutaa 12:7-9, 12; 20:1-3) Ha wodee, nuuni ‘kawotettaa wonggeliyaa mishiraachuwaa’ alame yuushuwan awaajjiyo, yaana Gannatiyaa hidootaa asau yootiyo gita maataa demmido wode; he oosoy zaarettidi mule oosettenna ooso.—Maatiyoosa 24:14.

3. Yesuusi saluwaa baanaappe guuttaa kasetidi, bana kaalliyaageeti ay oottanaadan yootidee, hegee ay gujjii?

³ Yesuusi saluwaa baanaappe guuttaa kasetidi, bana kaalliyaageeta: “Yerusalaameeninne Yihudaa biitta ubban, Samaariyaaninne sa7aa gaxaa gakkanaashinkka taassi markkattiyaageeta gidana” yaagiis. (Oosuwaa 1:8) He oosoy alame yuushuwan tamaarissiyo oosuwaa gujjees. He oosuwaa halchoy aybee? Wurssettay gakkanaappe kase, asaa erissiyo ashkkara, giishin hara asaakka Kiristtoosa kaalliyaagaa oottanaassa. (Maatiyoosa 28:19, 20) Nuuni Kiristtoosa azazuwaa loytti polanau koyikko, ay oottana koshshii?

4. (a) PHeexiroosi 2 PHeexiroosa 3:11, 12n aybi koshshiyoogaa qonccissidee? (b) Nuuni aybippe naagettana koshshii?

⁴ Kiitettida PHeexiroosi: “Intte ai mala asa gidanau bessii? Intte de7⁠oi geeshshanne Xoossaa milatiyaagaa gidanau koshshees. Intte Xoossaa gallassaa naagishin, he gallassai eesuwan gakkanaadan, intteyyo danddayettiyaabaa oottite” yaagidoogaa hassayite. (2 PHeexiroosa 3:11, 12) Ha wurssetta wodee matan gakkanaagaa naagiiddi, nu deˈuwan Xoossau aqidoogaa bessiya oosuwan nu xeelaa wottana koshshiyoogaa PHeexiroosi yootidobay qonccissees. He oosoy mishiraachuwaa sabbakiyoogaa gujjees. Hegaa gishshau, sabbakanaadan Kiristtoosi azazidoogaa, alame yuushuwan deˈiya nu ishati mishettidi poliyoogaa nuuni beˈiyoogee ayba ufayssii! Gidoppe attin, galla galla Seexaanaa alamiyaappe gakkiya sugettaynne polo gidenna nu asatettaa koshshay Xoossaa oosuwaa nuuni mishettidi oottiyoogaa irxxissenna mala naagettana koshshiyoogaa akeekoos. Yaatiyo gishshau, nuuni aggennan Kiristtoosa kaalliyoogaa waatidi erana danddayiyaakko ane beˈoos.

Xoossay Immiyo Aawatettaa Ufayssan Ekka

5, 6. (a) PHauloosi Yerusalaamen deˈiya ba mala Kiristtaaneta galatidoy aybissee, qassi aybippe naagettanaadan akeekissidee? (b) Xoossay immido aawatettaa nuuni mishettidi polana koshshiyoy aybissee?

⁵ Kiitettida PHauloosi Yerusalaamen deˈiya Kiristtaanetuyyo  xaafido dabddaabbiyan, yedetay gakkishinkka eti ammanettidi genccido gishshau, ba mala Kiristtaaneta galatiis. I: “Intteyyo Xoossaa poo7⁠oi poo7⁠idoogaappe guyyiyan, intte daroban waayettidi, gita waretan genccido beni wodiyaa hassayite” yaagiis. Ee, eti ammanettidi oottidobaa Yihooway hassayiis. (Ibraawe 6:10; 10:32-34) PHauloosi siiquwan galatidoogee, Ibraawe Kiristtaaneta keehippe minttettennan aggenna. Gidikkokka, PHauloosi he dabddaabbiyan, naagettana xayikko asatettaa koshshay issi uri Xoossaayyo mishettidi oottiyoogaa irxxissana danddayiyoogaakka yootiis. I Kiristtaaneti Xoossaa azazota kaalliyoogaa “ixxenna mala” woykko hegaa kaalliyoogaa agganau gaaso shiishshenna mala naagettana koshshiyoogaa yootiis.—Ibraawe 12:25.

⁶ Xoossay immiyo aawatettaa ekkennan ixxanau gaaso shiishshenna mala yootido akeekissoy ha wodiyan deˈiya Kiristtaanetuyyookka oottees. Nuuni Kiristtaane aawatettaa mishettidi kiyanau murttana koshshiyoogaa akeekoos. (Ibraawe 10:39) Geeshsha oosuwaa oottiyoogee atotettau keehippe koshshiyaaba.—1 Ximootiyoosa 4:16.

7, 8. (a) Nuuni Xoossaa oosuwau ubbatoo mishettanaadan aybi maaddii? (b) Nuuni koyroogaadan mishettennaba gidikko, Yihoowanne Yesuusa xeelliyaagan ay hassayana koshshii?

⁷ Xoossay immido aawatettaa polanau gaaso shiishshennaadan nuna aybi maaddii? Hegaadan gaaso shiishshanau qoppennaadan naagettanau keehippe maaddiya issi ogee, Yihoowayyo nuna geppidoogee woygiyoogaakko ubbatoo wotti denttidi qoppiyoogaa. Yihoowa sheniyaa oottiyoogaa nu deˈuwan kaseyanau ayyo qaalaa gelida; qassi he qaalaa ubbatoo polanau koyoos. (Maatiyoosa 16:24 nabbaba.) Yaatiyo gishshau, issi issitoo: ‘Xammaqettiyo wode siyettidaagaadan, Xoossau geppidoogaara moggada deˈanau murttidoogee haˈˈikka tau siyettii? Woykko hegaappe simmin deˈiya wodetun koyroogaadan mishettiyoogaa aggidanaa?’ yaagidi nuna oychana koshshees.

⁸ Nu huuphiyaa suure pilggiyoogee nuuni kaseegaadan mishettidi oottennaagaa qonccissiyaaba gidikko, hananabaa yootiya Sofonaasi yootido minttettiya qaalaa hassayana koshshees. I: “He gallassi eti Yerusalaame hagaadan yaagana; ‘Xiyoonee, yayyoppa! Ne kushetikka arggaacoppona. GODAI ne Xoossai ne giddon de7⁠ees; i neeyyo xoonuwaa immiya olanchchaa. I nenan ufaittana’” yaagiis. (Sofonaasa 3:16, 17) Ha minttettiya qaalay koyro odettidoy Baabiloone omooduwaappe Yerusalaame simmida beni Israaˈeeletussa. Gidikkokka, ha minttettoy ha wodiyan deˈiya Xoossaa asaukka oottees. Nuuni oottiyoy Yihoowa oosuwaa gidiyo gishshau, Xoossay immido aawatettaa kiyiyo wode, Yihoowaynne a Naˈay nuuni hegaa polanaadan maaddiyoogaanne minttettiyoogaa hassayana koshshees. (Maatiyoosa 28:20; Piliphphisiyuusa 4:13) Nuuni ubbatoo Xoossaa oosuwaa mishettidi oottanau baaxetiyaaba gidikko, ayyaanaaban dicci dicci baanaadan i anjjananne maaddana.

‘Kasetada Xoossaa Kawotettaa’ Mishettada Koya

9, 10. Yesuusi leemisuwan yootido xoqqu oottidi xeelliyo kahuwaa waanna qofay aybee, qassi hegaappe ay tamaarana danddayiyoo?

⁹ Yesuusi Parisaawetu halaqa gidida issi bitaniyaa son qumaa miyo wode, xoqqu oottidi xeelliyo kahuwaabaa leemisuwan yootiis. He leemisuwan, saluwaa Kawotettaa laattana danddayiya dumma dumma asati shoobettidoogaa qonccissiis. “Banttana aggi bayana mala” woossiyoogee woygiyoogaakkokka i leemisuwan yootiis. (Luqaasa 14:16-21 nabbaba.) Yesuusi leemisuwan yootido, shoobettida imattati gibirau yeennan agganau gaaso shiishshidosona. Issoy, shammido biittaa beˈanau baana koshshiyoogaa yootiis. Hankkoy, shammido boorata goyi beˈana koyiyoogaa yootiis. Haray qassi: “Taani machchiyo ekkido gishshau, baanau danddayikke” yaagiis. Hagee gaaso gidana danddayennaba. Biitta woy mehe shammiya uri kaseti beˈidi shammiyo gishshau, shammi simmin beˈanau eesoyiyaabi baawa. Mata wode machidoogee shin, hegaa mala xoqqu ootti xeelliyo shoobiyaappe waatidi ashshana danddayii? Leemisuwan odettida, shoobbida bitanee keehippe yiillotidoogee garamissenna!

¹⁰ Xoossaa asa ubbay Yesuusi yootido leemisuwaappe timirtte demmana danddayees. Tamaariyoobi aybee? Yesuusa leemisuwan odettidaageetu mala allaalleta nuuni Xoossaa oosuwaappe  mule kaseyanau koshshenna. Issi Kiristtaanee ba buzo allaalliyaa bessiyaagaadan xeellana xayikko, kaseegaadan mishettidi haggaaziyoogaa loddan loddan aggana danddayees. (Luqaasa 8:14 nabbaba.) Hegaappe naagettanau, Yesuusi: “Kasetidi, Xoossaa kawotettaanne a xillotettaa koyite” yaagidi zoridoogaadan deˈana koshshees. (Maatiyoosa 6:33) Xoossau oottiya yelagatinne cimati, keehippe koshshiya he zoriyaa oosuwan peeshshiyoogaa beˈiyoogee daro minttettees! Daroti ubba haggaazanaayyo gidiya wodiyaa demmanaassi sima deˈuwaa deˈanau tangguwaa ekkidosona. Mishettidi Kawotettaa kaseyiyoogee tumu ufayssaanne daro woppaa demissiyoogaa, eti bantta deˈuwan gakkidabaappe akeekidosona.

11. Xoossaayyo kumetta wozanaappe mishettidi oottiyoogee koshshiyoogaa qonccissiya Geeshsha Maxaafaa taarikee awugee?

¹¹ Xoossaa oosuwaa mishettidi oottiyoogee keehippe koshshiyoogaa akeekanau, Israaˈeela Kawuwaa Yoˈaasha gakkidabaa hassaya. Sooriyaa biittaa asay Israaˈeeleta xoonennan aggenna gi hirggidi, Yoˈaashi yeekkiiddi Elssaaˈaakko biis. Yihoowa maaduwan he deriyaa xooniyoogaa bessanau, i Sooriyaa biittaa ginan maskkootiyaara zubbiyaa dukkanaadan Elssaaˈi yootiis. Hegee he kawuwaa minttettidoogee erettidaagaa. Hegaappe simmin, Yoˈaashi ba zubbiyan biittaa caddanaadan Elssaaˈi yootiis. Yoˈaashi heezzutoo biittaa caddiis. Biittaa ichashutoo woy usupputoo caddiyoogee, ‘Sooriyaa asata xoonidi muleera xayssanaagaa’ bessiyo gishshau, Elssaaˈi hegan keehippe yiillotiis. Yoˈaashi muleera gidennan, heezzutoo xalla xoonana. Yoˈaashi mishettidi oottibeenna gishshau, muleera xoonibeenna. (2 Kawotu 13:14-19) He taarikiyaappe ay tamaarana danddayiyoo? Yihooway nuna daroppe anjjiyoy nuuni a oosuwaa kumetta wozanaappe mishettidi oottiyo wode xallaana.

12. (a) Deˈuwan gakkiya metuwaara baaxetiiddi Xoossaa oosuwaa ubbatoo mishettidi oottanaadan nuna aybi maaddii? (b) Neeni haggaazuwaa ubbatoo minnada oottiyoogan ayba goˈˈaa demmidaakko yoota.

¹² Deˈuwan gakkiya metoy nuuni mishettidi wozanappe Xoossaa oosuwaa oottanau metootanaadan oottees. Daro ishatinne michoti ikkonoomiyaara gayttida metuwaara baaxetiiddi deˈoosona. Harati sahuwaappe denddidaagan Yihoowa oosuwaa bantta koyiyoogaadan oottanau danddayenna gishshau, hidootaa qanxxoosona. Gidikkokka, nuuni ubbay ubbatoo mishettidinne Kiristtoosa kumetta ogiyan kaalliiddi deˈanau tangguwaa ekkana danddayoos. “Neeni Ubbatoo Kiristtoosa Kaallanau Aybi Maaddii?” giya saaxiniyan deˈiya qofaappenne xiqisetuppe issota issota hayyanaa akeeka. Hegaa neeyyo danddayettida ubban waatada oosuwan peeshshana danddayiyaakko qoppa. Neeni hegaadan oottikko, tumu goˈˈaa demmaasa. Nuuni haggaazuwan ubbatoo minnidi oottiyoogee qaaxxennaadaaninne nu deˈoy ayyaanaaban ishalanaadan oottees; qassi daro sarotettaanne ufayssaa demissees. (1 Qoronttoosa 15:58) Hegaa bollikka, Xoossaa oosuwaa kumetta shemppuwaappe oottiyoogee Yihoowa ‘gallassay eesuwan gakkanaagaa’ ubbatoo nu qofan wottanaadan maaddees.—2 PHeexiroosa 3:12.

Ne Hanotaa Akeekan Pilgga

13. Kumetta wozanaappe haggaaziyoogee nuuyyo woygiyoogaakko waatidi erana danddayiyoo?

¹³ Gidikkokka, kumetta wozanaappe oottiyoogee nuuni haggaazuwan aattiyo wodiyaara gayttidaba gidennaagaa hassayiyoogee loˈˈo. Issuwaa hanotay haraagaappe dummatees. Aginan aginan, issi woy naaˈˈu saatiyaa haggaaziya uri, a payyatettay paqqadiyoy hegaa xalla gidikko, Yihoowa keehippe ufayssana danddayees. (Marqqoosa 12:41-44⁠ra gatta xeella.) Hegaa gishshau, Yihoowayyo kumetta wozanaappe oottiyoogee nuuyyo woygiyoogaakko eranau, nu abbiyaanne nu hanotaa akeekan pilggana koshshees. Kiristtoosa kaalliyaageeta gidiyoogaadan, nu qofay aagaara mogganaadan koyoos. (Roome 15:5 nabbaba; 1 Qoronttoosa 2:16) Yesuusi ba deˈuwan ay kaseyidee? Qifirinaahoomappe yiida cora asau i: “Taani hara kataman de7⁠iya asaukka Xoossaa kawotettaa wonggeliyaa mishiraachchuwaa yootanau bessees. Aissi giikko, Xoossai tana kiittidoogee hegaassa” yaagiis. (Luqaasa 4:43; Yohaannisa 18:37) Yesuusi mishettidi oottidoogaa hassayada, neeni kaseegaappe aaruwaa haggaazana danddayiyaakkonne ne hanotaa pilgga.—1 Qoronttoosa 11:1.

14. Nu haggaazuwaa ayba ogiyan aassana danddayiyoo?

 ¹⁴ Nu hanotaa akeekan qoppiyoogee, haggaazuwan aattiyo wodiyaa gujjana danddayiyoogaa akeekidi kuuyanaadan maaddana danddayees. (Maatiyoosa 9:37, 38) Leemisuwau, mata wode timirttiyaa wurssida yelaga Kiristtaanetuppe daro shaˈan qoodettiyaageeti bantta haggaazuwaa aassidosona; qassi aqinye gididi mishettidi haggaaziyoogan ufayttiiddi deˈoosona. Neenikka hegaadan ufayttana koyay? Issi issi ishatinne michoti bantta hanotaa yuushshi qoppidi, bantta biittan gidin woy hara biittan, aassiyaageeti keehippe koshshiyo heeri baanau qofaa qachidosona. Harati qassi hara biitta qaalaa haasayiyaageeta maaddanau eta qaalaa tamaaridosona. Nu haggaazuwaa aassiyoogee metana danddayikkokka, hegaadan oottiyoogee daro anjjuwaa demissees; qassi daroti “tumatettaa eranaadan” maaddanaukka danddayoos.—1 Ximootiyoosa 2:3, 4; 2 Qoronttoosa 9:6.

Kaallana Bessiya, Geeshsha Maxaafan Deˈiya Leemisota

15, 16. Mishettidi Kiristtoosa kaalliyaageeta gidiyoogan o doˈuwaa leemisuwaa kaallana koshshii?

¹⁵ Guyyeppe kiitettidaageeta gidida issoti issoti, Kiristtoosi bana kaallanaadan xeesido wode ayba zaaro immidonaa? Geeshsha Maxaafay: “Ubbabaa aggi bayidi, denddi eqqidi, a kaalliis” yaagidi, Maatiyoosabaa yootees. (Luqaasa 5:27, 28) He wode moliyaa oyqqiiddi deˈiya, PHeexiroosanne Inddiraasa xeelliyaagan Geeshsha Maxaafay: “Sohuwaarakka bantta gitiyaa yeggi bayidi, Yesuusa kaallidosona” yaagees. Hegaappe simmin, Yesuusi bantta aawaara gitiyaa giigissiya Yaaqoobanne Yohaannisa beˈiis. Eti Yesuusa shoobiyau ayba zaaro immidonaa? “Sohuwaarakka eti wolwoluwaanne bantta aawaa yeggi bayidi, Yesuusa kaallidosona.”—Maatiyoosa 4:18-22.

¹⁶ Hara loˈˈo leemisoy guyyeppe kiitettida PHauloosa geetettida Saaˈoolaagaa. I Kiristtoosa kaalliyaageetu bolli wolqqaama yedetaa gattidaagaa gidikkonne, ba deˈuwaa laammidi, Kiristtoosa sunttaa erissanau “doorettida miishsha” gidiis. “Sohuwaara, ‘Yesuus Kiristtoosi Xoossaa Na7a’ yaagidi, [PHauloosi] Aihuda woosa keettatun qaalaa yootiis.” (Oosuwaa 9:3-22) PHauloosa bolli daro metoynne yedetay gakkidaba gidikkokka, i mishettidi oottiyoogaa mule aggibeenna.—2 Qoronttoosa 11:23-29; 12:15.

17. (a) Kiristtoosa kaalliyoogaa xeelliyaagan neeni ay oottana koyay? (b) Nuuni kumetta wozanaappenne wolqqaappe Yihoowa sheniyaa oottiyoogan ayba anjjo demmiyoo?

¹⁷ Nuuni he erissiyo ashkkaratu loˈˈo leemisuwaa kaallanau, qassi ufayttidinne guyye geennan  he shoobiyaa ekkanau koyiyoogee erettidaagaa. (Ibraawe 6:11, 12) Nuuni Kiristtoosa mishettidinne loytti kaallanau ubbatoo baaxetiyoogan ayba anjjo demmiyoo? Xoossaa sheniyaa oottiyoogan tumu ufayssaa demmoos; qassi hara maataa demmidi Yihoowayyo oottiyoogaaninne gubaaˈiyan aawatettaa oyqqidi oottiyoogan ufayssaa demmoos. (Mazamure 40:8; 1 Tasalonqqe 4:1 nabbaba.) Ee, nuuni Kiristtoosa minnidi kaalliyo wode, garssa sarotettaa, woppaa, ufayssaa, Xoossan nashettiyoogaanne merinaa deˈuwaa hidootaa mala daro anjjuwaa demmoos.—1 Ximootiyoosa 4:10.

Hassayay?

• Nuuyyo imettida, keehippe koshshiya oosoy awugee, hegaa waatidi xeellana koshshii?

• Nuuni naagettana koshshiyo, asatetta koshshay awugee, aybissi?

• Nuuni nu hanotaa ayba ogiyan pilggana koshshii?

• Kiristtoosa ubbatoo kaallanaadan nuna aybi maaddii?

[Oyshata]

[Sinttaa 31n deʼiya misiliyaa]

Neeni Ubbatoo Kiristtoosa Kaallanau Aybi Maaddii?

[Sinttaa 31n deʼiya misiliyaa]

▪ Xoossaa Qaalaa galla galla nabbaba; qassi nabbabidoban wotta dentta qoppa.—Mazamure 1:1-3; 1 Ximootiyoosa 4:15.

▪ Xoossaa geeshsha ayyaanaa kaaletuwaanne maaduwaa demmanau ubbatoo woossa.—Zakkaariyaasa 4:6; Luqaasa 11:9, 13.

▪ Wozanappe mishettidi haggaaziyaageetuura laggeta.—Leemiso 13:20; Ibraawe 10:24, 25.

▪ Nuuni deˈiyoy eesoyiya wodiyaana gidiyoogaa akeeka.—Efisoona 5:15, 16.

▪ Gaaso shiishshiyoogee kaalettiyo metuwaa akeeka.—Luqaasa 9:59-62.

▪ Ne huuphiyaa geppiyo wode gelido qaalaa, qassi Yihoowayyo oottiyoogeenne kumetta wozanaappe Kiristtoosa kaalliyoogee demissiyo anjjuwaa ubbatoo qoppa.—Mazamure 116:12-14; 133:3; Leemiso 10:22.