Woosaa

5 Xoossay Siyidi Zaarii?

HA OYSHAY keehippe garamissiyaanne eranau denttettiya oysha. Xoossay ha wodiyan woosaa siyiyoogaa Geeshsha Maxaafay yootees. I nu woosaa siyiyoogee woy aggiyoogee daro baggi nu hanotaara gayttidaba.

Yesuusi ba wode deˈida, asa bessanau woossida haymaanootiyaa kaalettiyaageeti bantta geeshshatettaa bessiyoogaa xallaa qoppido gishshau, eti hegaadan oottana bessennaagaa yootiis. Yesuusi hegaa mala asati “bantta woituwaa muleera” ekkiichidoogaa, giishin etassi koshshiyaaba gidida, Xoossay eta woosaa siyiyoogaa gidennan, eti keehippe koyiyo, asan sabettiyoogaa xallaa demmanaagaa yootiis. (Maa. 6:5) Hegaadan ha wodiyankka, daroti Xoossaa sheniyaadan gidennan, bantta sheniyaadan woossoosona. Eti nuuni beˈido Geeshsha Maxaafaa maaraa kaallenna gishshau, Xoossay eta woosaa siyenna.

Ne hanotay shin ay malee? Xoossay ne woosaa siyidi zaaranee? Hegaa zaaroy ne zariyaara, biittaawatettaara woykko deretettan neeyyo deˈiya maataara gayttidaba gidenna. Geeshsha Maxaafay, “Xoossai asa som77⁠o xeellenna; shin dere ubban baassi yayyiyaagaanne xillo ooso oottiyaagaa galatiyoogaa” yootees. (Oos. 10:34, 35) Ha qaalati ne hanotaa qonccissiyoonaa? Neeni Xoossaa yayyiyaaba gidikko, a azzanttennaadan yayyiyoogan a xoqqu oottada xeellaasa. Xillobaa oottiyoogaa giyoogee, neeni koyiyoobaa woykko hara asay koyiyoobaa oottiyoogaappe, Xoossay suure giyoobaa oottanau koyiyoogaa giyoogaa. Xoossay ne woosaa siyanaadan tumuppe koyay? Xoossay siyanaadan neeni waata woossanaakko Geeshsha Maxaafay qonccissees. *

Daro asay Xoossay maalaalissiya ogiyan ba woosaa zaaranaadan koyees. SHin, beni wodekka Xoossay hegaa mala maalaalissiyaabaa darotoo oottibeenna. Xaafettida issi maalaalissiya hanotaappenne kaallidi xaafettidaagaappe gidduwan issi issitoo daro xeetu layttay aadhees. Hegaa bollikka, kiitettidaageetu wodiyaappe simmin maalaalissiyaabaa oottiyoogee attidoogaa Geeshsha Maxaafay yootees. (1 Qor. 13:8-10) Yaatin, hegaa giyoogee ha wodiyan Xoossay woosaa zaarenna giyoogee? CHii, gidenna! I zaariyo issi issi woosata ane beˈa.

Xoossay aadhida eratettaa immees. Yihooway tumu aadhida eratetta ubbau waanna Pultto. Xoossay ba kaaletuwaanne hegaara moggidi deˈanau koyiyaageetuyyo aadhida eratettaa kehatettan immees.—Yaaq. 1:5.

Xoossay ba geeshsha ayyaanaanne a goˈˈa ubbaa immees. Geeshsha ayyaanay Xoossaa wolqqaa. Hegaappe aadhiya wolqqi baawa. He wolqqay paaciyan genccanaadan nuna maaddana danddayees. Nuna metoy gakkiyo wode sarotettaa immana danddayees. Nuuni keehippe ufayssiya hara eeshshata dichanaadankka maaddana danddayees. (Gal. 5:22, 23) Xoossay ha imotaa kehatettan immiyoogaa Yesuusi bana kaalliyaageetussi yootiis.—Luq. 11:13.

Xoossay bana wozanappe koyiyaageetussi eratettaa immees. (Oos. 17:26, 27) Alame yuushuwan, tumaa wozanappe koyiya asay deˈees. Eti Xoossaabaa, giishin a sunttay oonakko, asaa naatussinne saˈaassi i halchidobay aybakko, qassi akko waani shiiqana danddayiyaakko eranau koyoosona. (Yaaq. 4:8) Darotoo Yihoowa Markkatuura hegaa mala asay gayttees; qassi hegaa mala oyshaa Geeshsha Maxaafaappe Yihoowa Markkati etau ufayssan zaaroosona.

Neeni ha maxeetiyaa ekkidoy hegaassee? Neeni Xoossaa koyay? Geella hagee i ne woosaa zaariyo oge gidana danddayees.

[Tohossa qofata]