Yihoowan Wozanappe Ammanettiyoogee Woppu Gaanaadan Oottees

“Taani GODAA [“Yihoowa,” NW] xeesiyo wode, i taayyo siyees.”—MAZ. 4:3.

1, 2. (a) Daawita ayba wolqqaama metoy gakkidee? (b) Nuuni tobbana mazamureti awugeetee?

KAWUWAA DAAWITI Israˈeele asaa amarida wodiyau haari simmin, a wolqqaama metoy gakkiis. A naˈay Abeseloomi a bolli maqettidi bana kawo giidi awaajjin, Daawiti Yerusalaameppe baqatiis. Ulottiya laggeekka a kaddiis; qassi ayyo ammanettiya amaridaageetuura issippe yeekkiiddi, mela tohuwan Dabira Zayte Deriyaa kiyiis. Hegaa bollikka, Kawuwaa Saaˈola dabbo gidida SHimˈˈi a qanggiiddi, a bolli shuchaa oliisinne buhiyaa laaliis.—2 Sam. 15:30, 31; 16:5-14.

² Ha iita metoy Daawiti azzaniiddinne kawuyyidi duufuwan gelanaadan oottanee? I Yihoowan ammanettiyo gishshau hegee hanenna. Daawiti Abeseloomaappe baqatidoogaa xaafido 3tto Mazamuree hegaa qonccissees. I 4tto Mazamuriyaakka xaafiis. Ha naaˈˈu mazamuretikka Xoossay woosaa siyiyoogaanne zaariyoogaa ammanettiyoogaa bessoosona. (Maz. 3:4; 4:3) Ha mazamureti Yihooway banan ammanettidi oottiyaageeta gallassinne qammi maaddiyoogaanne sarotettaanne woppaa immidi anjjiyoogaa yootiyoogan nuna minttettoosona. (Maz. 3:5; 4:8) Hegaa gishshau, ha mazamureti woppu gaanaadaaninne Xoossan ammanettanaadan oottiyoy ayba ogiyaanakko ane beˈoos.

Daroti ‘Nu Bolli Denddiyo’ Wode

3. Mazamure 3:1, 2n qonccidaagaadan, Daawiti ay mala hanotan deˈidee?

³ Issi kiitettidaagee, “Israa7eela asaa wozanai Abeseloomakko simmiichchiis” yaagiis. (2 Sam. 15:13) Abeselooma hegaa keena asay waanidi kaafana danddayidaakko garamettidi Daawiti hagaadan giis: “Abeet GODAU, ta morkketi aiba corattidonaa! Ta bolli aappunati denddiyoonaa! Daroti, ‘Xoossai a ashshenna’ yaagidi tabaa haasayoosona.” (Maz. 3:1, 2) Israaˈeela asati daroti Abeseloominne aara deˈiya ajabay gattiyo daafaappe Yihooway Daawita ashshenna giidi qoppidosona.

4, 5. (a) Daawiti aybin ammanettidee? (b) ‘Ta huuphiyaa xoqqu xoqqu oottiyaagaa’ giya qaalay ay qonccissii?

⁴ SHin Daawiti Yihoowan wozanappe ammanettido gishshau woppu giis. I, “SHin abeet GODAU, neeni ta yuushuwan gonddalle. Tana bonchchissiyaageenne gitayiyaagee [ta huuphiyaa xoqqu xoqqu oottiyaagee] nenattennee” yaagidi yexxiis. (Maz. 3:3) Daawiti, gonddallee wotaaddaraa qohuwaappe naagiyoogaadan Yihooway bana naaganaagaa ammanettees. Ee, he cimida kawoy ba huuphiyaa gulletidinne kawuyyidoogaa bessiya hanotan hokkidi baqatees. SHin Ubbaappe Xoqqiyaagee a hanotaa laammidi, i bonchettanaadan oottana. Yihooway i sitti giidi eqqanaadan, giishin zaarettidi ba huuphiyaa xoqqu oottanaadan maaddana. Daawiti Yihooway a woosaa siyanaagaa ammanettidi akko woossiis. Inttekka Yihoowan hegaadan ammanetteetii?

⁵ Daawiti ‘tana gitayiyaagee’ yaagidi, Yihooway a maaddanaagaa ammanettiyoogaa yootiis. Tudeys Inglish Vershin giyo Geeshsha Maxaafaa birshshettay, “SHin abeet GODAU neeni tana ubbatoo naagiya gonddalle; neeni tana xoonissaasa, qassi zaarettada xalanaadan oottaasa” yaagidi birshshiis. Issi xuufee “ta huuphiyaa xoqqu xoqqu oottiyaagee” yaagiyaagaa xeelliyaagan “Issi ura ‘huuphiyaa’ . . . Xoossay xoqqu oottiyoode,  he uri hidootaa wottanaadaaninne woppu gaanaadan oottees” yaagees. Israaˈeela kawotettaa araataappe wolqqan wodhido wode, Daawiti yibbatidoogee bessiyaaba. SHin ‘a huuphiyaa xoqqu oottidoogee’ i zaarettidi xalanaadan, woppu gaanaadaaninne Xoossan wozanappe ammanettanaadan oottiis.

‘Yihooway Allees!’

6. Yihooway ba geeshsha deriyaappe a woosaa zaaridoogaa Daawiti yootidoy aybissee?

⁶ Daawiti Yihoowan ammanettiyoogaaninne i a aggennaagaa ammaniyoogan, “Taani ta qaalaa xoqqissada GODAAKKO waassais. Waassin ba geeshsha deriyaappe taassi i allees” yaagiis. (Maz. 3:4) Xoossay qoncciyoogau leemiso gidida maachaa taabootaa, Daawiti azazin Xiyoone Deriyaa efiidosona. (2 Sameela 15:23-25 nabbaba.) Yaatiyo gishshau, Yihooway ba geeshsha deriyaappe a woosaa zaaridoogaa Daawiti yootidoogee bessiyaaba.

7. Daawiti yayyibeennay aybissee?

⁷ Daawiti Xoossaakko woossiyo woosay hada gidennaagaa ammanettiyo gishshau yayyenna. Yaatiyo gishshau, i, “GODAI tana naagiyo gishshau, taani zin77ada xiskkaisinne beegottais” yaagidi yexxiis. (Maz. 3:5) Akeekennan morkkee qohuwaa gattana danddayiyo qammaanikka, Daawiti yayyennan xiskkees. I kase ba deˈuwan beˈidoban Xoossaa maadoy appe shaahettennaagaa wozanappe ammanettiyo gishshau, beegottanaagaa ammanees. ‘Yihoowa ogiyaa’ minttidi kaalliyaabanne appe mule shaahettennaba gidikko, nuunikka hegaadan ammanettana danddayoos.—2 Sameela 22:21, 22 nabbaba.

8. Mazamure 27:1-4y Daawiti Yihoowan ammanettidoogaa waatidi bessii?

⁸ Daawiti Xoossan wozanappe ammanettiyoogeenne a ammaniyoogee, geeshsha ayyaanay denttettin i xaafido kaallidi deˈiya qofaa gujjiya hara mazamuriyan qoncciis: “GODAI taayyo poo7onne tana ashshiyaagaa; yaatin, taani ooyyo yayyanee? GODAI ta de7oi naagettiyo miixaa; yaatin, taani ooyyo dagammanee? . . . Morkkiya toorai tana dooddiyaakkokka ta wozanai yayyenna. . . . Taani GODAA issibaa oichchaas; taani hegaa koyaas; hegeenne, taani ta de7o laitta ubban GODAA keettan de7anaagaa; de7aidda, taani  GODAA lo77otettaa be7anaagaanne a Beeta Maqidasiyan a koyanaagaa.” (Maz. 27:1-4) Intteyyo hegaadan siyettiyaabaanne intte hanotay paqqadiyaaba gidikko, intteegaadan Yihoowayyo goynniyaageetuura ubbatoo shiiqeeta.—Ibr. 10:23-25.

9, 10. Mazamure 3:6, 7n odettidabay deˈishinkka, Daawiti haluwaa kiyanau koyenna giyoy aybisee?

⁹ Abeseloomi a bolli maqettidabanne hara daroti ayyo ammanettennaageeta gidikkonne, Daawiti hagaadan giidi yexxiis: “Taani tana dooddidi denddida tammaa sha7iya asatuyyookka yayyikke. Abeet GODAU, dendda Abeet ta Xoossau, tana ashsha! Aissi giikko, neeni ta morkketa ubbaa goggocuwaa shocadasa; iitatu achchaakka menttadasa.”—Maz. 3:6, 7.

¹⁰ Daawiti haluwaa kiyanau koyenna. A morkketu ‘goggocuwaa shocana’ koshshikko, hegaadan oottiyay Xoossaa. Kawuwaa Daawiti Higgiyaa baassi duuqqiis; qassi Yihooway he higgiyan, “Haluwaa kessananne kushiyaa zaarana” yaagidoogaa erees. (Zaa. 17:14, 15, 18; 32:35) ‘Iitatu achaa menttanaykka’ Xoossaa. Eta achaa menttiyoogaa giyoogee etau qohiyo wolqqaa xayssiyoogaa giyoogaa. ‘Yihooway wozanaa xeelliyo’ gishshau, iitati oonakko erees. (1 Sam. 16:7) Mata wode ciimma ollan yegettidi xayo xallay naagiyo, achay baynna gudiya gaammo mala gidana, iita gidiyoogan waannatiya Seexaanaa nuuni eqettanaadan Xoossay ammanuwaanne minotettaa immidoogau keehippe galatoos!—1 PHe. 5:8, 9; Ajj. 20:1, 2, 7-10.

‘Ashettay Yihoowagaa’

11. Nuuni nu mala Kiristtaanetuyyo woossana koshshiyoy aybissee?

¹¹ Daawiti baayyo keehippe koshshiyaaba gidida atotettaa demmanaadan oottana danddayiyay Yihoowa xalla gidiyoogaa erees. SHin i qoppiyoy babaa xalla gidenna. Yihooway nashshiyo asa ubbaa xeelliyaagan woygana danddayettii? Daawiti geeshsha ayyaanay denttettin xaafido mazamuriyaa, “Ashettai GODAAGAA; GODAU, ne asaa neeni anjja” yaagidi kuuyidoogee bessiyaaba. (Maz. 3:8) Daawita wolqqaama metoy gakkidoogee tuma; shin i Yihoowa asaa ubbaa hassayiisinne Xoossay eta anjjanaagaa ammanettiis. Nuunikka nu mala Kiristtaaneta hassayana koshshennee? Eti xalanaadaaninne tishsha gididi mishiraachuwaa sabbakana mala, Yihooway ba geeshsha ayyaanaa immanaadan woossiyoogan eta hassayiyaageeta gidoos.—Efi. 6:17-20.

12, 13. Abeselooma bolli aybi gakkidee, qassi Daawiti waanidee?

¹² Abeseloomi laafa hayqo hayqqidoogee, harata, ubba qassi Xoossay tiyido Daawita mala asata naaqqiya ubbatussi wolqqaama seera. (Leemiso 3:31-35 nabbaba.) Olay denddin Abeselooma olanchati xoonettidosona. Abeseloomi baquluwaa toggidi biishin issi wogga mittaa daashsha n a adussa huuphee oyqettiis. Yooˈaabi heezzu tooran a wozana ayfiyan caddidi worana gakkanaassi Abeseloomi paxa deˈikkokka, aynne oottana danddayenna hanotan kaqettidi takkiis.—2 Sam. 18:6-17.

¹³ Daawiti ba naˈˈaa bolli gakkidabaa siyidi ufayttidee? Akkay ufayttibeenna. Hegaappe dumma hanotan, i wuygen yaanne haanne simerettiiddi, “Aayye ta na7au Abeseloomaa! Ta na7au! Ta na7au Abeseloomaa! Ne gishshaa taani haiqqarkkinaashsha! Aayye ta na7au Abeseloomaa! Ta na7au!” yaagidi yeekkiis. (2 Sam. 18:24-33) Daawiti azzanido wolqqaama azzanuwaa agganaadan oottiday Yooˈaabi haasayidobaa. Yaaretidinne amottidi, Yihooway tiyido ba aawaara olettida Abeseloomi iita hanotan hayqqiis.—2 Sam. 19:1-8; Lee. 12:21; 24:21, 22.

Daawiti Xoossan Ammanettiyoogaa Zaarettidikka Yootiis

14. Mazamure 4 giigissido hanotaabaa woygana danddayettii?

¹⁴ Heezzantto mazamuriyaadan oyddanttoogeekka Daawiti keehi Yihoowan ammanettiyoogaa bessiya, wozanappe woossido woosa. (Maz. 3:4; 4:3) Daawiti ha mazamuriyaa yexxidoy, Abeseloomi a kawotettaa ekkanau denddidoogee polettennan atti simmin demmido woppaa yootanaassanne Xoossaa galatanaassa gidennan aggenna. Woy mazamuriyaa yexxiya Leewata qoppidi xaafidoba gidennan aggenna. Aybanne gido, ha mazamuriyan wotti dentti qoppiyoogee nuuni Yihoowan keehippe ammanettanaadan maaddana danddayees.

15. Nuuni ammanettidi Yihoowakko a Naˈaa bagaara woossana danddayiyoy aybissee?

 ¹⁵ Daawiti Xoossan wozanappe ammanettiyoogaanne Xoossay a woosaa siyidi zaariyoogaa ammaniyoogaa zaarettidikka bessiis. I, “Abeet tana xillissiya [“ta xillo,” NW] Xoossau, taani nena xeesiyo wode, taayyo koya. Taani un77ettido wode, neeni tana shemppissadasa. Taayyo neeni qarettada, ta woosaa siya” yaagidi yexxiis. (Maz. 4:1) Nuuni xillobaa oottiyaaba gidikko, hegaadan ammanettana danddayoos. ‘Xillo Xoossay’ Yihooway suure gidida ba asata anjjiyoogaa eriyo gishshau, Yesuusa wozuwan ammaniyoogan Yihoowakko a Naˈaa baggaara ammanettidi woossana danddayoos. (Yoh. 3:16, 36) Hagee ayba woppissiyaabee!

16. Daawiti hidootaa qanxxidoy aybissa gidana danddayii?

¹⁶ Issi issitoo nuuni woppu geennaadan oottiya, hidootaa qanxxissiyaabay nuna gakkana danddayees. Daawiti, “Inttenoo asatoo, intte aude gakkanaassi ta bonchchuwaa kaushshuuteetii? SHori bainnabaakka aude gakkanaassi intte siiquuteetii? Wordduwaanne aude gakkanaassi caddi oiqqi kaalluuteetii?” yaagidi yexxido gishshau, guutta wodiyau au hegaadan siyettennan aggenna. (Maz. 4:2) “Asatoo” yaagiyaagee loˈˈo gidenna hanotan asaa naatubaa yootiyoogee tuma. Daawita morkketi ‘shori baynnabaa’ siiqidosona. Niwu Intternaashinaal Vershin giyo maxaafay, “Intte awude gakkanau worddobaa siiquuteetiinne eeqa xoossata kaalluuteetii?” yaagidi birshshiis. Harati oottiyoobay nuna hidootaa qanxxissiyaaba gidikkokka, ubbatoo mintti woossiyaageetanne a xallay tumu Xoossa gididaagan wozanappe ammanettiyaageeta gidoos.

17. Mazamure 4:3ra moggiyaabaa nuuni waati oottana danddayiyaakko qonccissa.

¹⁷ Daawiti Xoossan ammanettiyoogaa kaallidi deˈiya qaalati qonccissoosona: “SHin GODAI Xoossaa asata baayyo dummayi wottidoogaa intte erite. Taani GODAA xeesiyo wode, i taayyo siyees.” (Maz. 4:3) Yihoowau ammanettiyaageeta gididi deˈanau xalanne wozanappe an ammanettiyaageeta gidana koshshees. Leemisuwau, ba nagarappe simmenna dabboy bohettiyo wode, Kiristtaane so asatussi ha eeshshati koshshoosona. Xoossay baunne ba ogiyau ammanettiyaageeta anjjees. Qassi Yihoowan ammanettiyoogeenne a baxuuxiyoogee a asaa giddon ufayssay daranaadan oottees.—Maz. 84:11, 12.

18. Issi uri nuna yiilloyiyaabaa haasayiyo wode woy oottiyo wode, Mazamure 4:4ra moggottiya ogiyan ay oottana koshshii?

¹⁸ Issi uri nuna yiilloyiyaaba haasayiyaaba woy oottiyaaba gidikko shin? Nuuni Daawiti, “Hanqqettite, shin intte hanqquwan nagaraa oottoppite. Hiixan zin77iyo wode, intte wozanaa qoritenne sirphphi giite” giidoogaadan oottiyaaba gidikko, ufayttidi deˈana danddayoos. (Maz. 4:4) Issi uri nuna yiilloyiyaabaa haasayiyoode woy oottiyoode, haluwaa kiyiyoogan nagaraa oottana koshshenna. (Roo. 12:17-19) Nu hiixan zinˈˈiyo wode nu wozanan deˈiyaabaa woosan qonccissana danddayoos. Nuuni he allaalliyaa xeelliyaagan woossiyaaba gidikko, nu xeelaa laammananne siiqoy denttettin atto gaana danddayoos. (1 PHe. 4:8) Hegaara gayttidaagan kiitettida PHauloosi, “Hanqqettite; shin intte hanqquwan nagaraa oottoppite. Intte hanqqetti uttidaashin, awai wulloppo. Xalahe halaqaayyo soho immoppite” yaagidi zoridobay akeekanau koshshiyaaba; hegee Mazamure 4:4n deˈiya qofaara gayttidabaa gidennan aggenna.—Efi. 4:26, 27.

19. Mazamure 4:5y ayyaanaaban nuuni yarshshiyo yarshshuwaara gayttidaagan waati maaddana danddayii?

¹⁹ Daawiti, “GODAAYYO likke yarshshuwaa yarshshitenne GODAN ammanettite” yaagidi, Xoossan ammanettana koshshiyoogaa minttidi yootiis. (Maz. 4:5) Israaˈeeleti yarshshiyo  yarshshoy ekettiyaaba gidiyoy, eta denttettidabay suureba gidiyo wode xallaana. (Isi. 1:11-17) Ayyaanaaban nuuni yarshshiyo yarshshoy Xoossaa ufayssiyaagaa gidanaadan, nuna denttettiyaabaykka suureba gidana bessees; qassi nuuni Yihoowan wozanappe ammanettana bessees.—Leemiso 3:5, 6; Ibraawe 13:15, 16 nabbaba.

20. ‘Yihoowa somˈˈuwaa pooˈuwan’ leemisettidabay aybee?

²⁰ Daawiti gujjidikka hagaadan giis: “Daroti, ‘Nuna lo77obaa bessanai oonee?’ yaagoosona. Abeet GODAU, neeni nuna keha aifiyan xeella [“ne pooˈuwaa nu bolli xoqqu oottada pooˈissa,” NW].” (Maz. 4:6) ‘Yihoowa somˈˈuwaa pooˈoy’ Xoossay anjjiyoogaa bessees. (Maz. 89:15) Daawiti, “Ne pooˈuwaa nu bolli xoqqu oottada pooˈissa” yaagidi woossido wode, Xoossay ‘anjjanaadan’ woossiis. Nuuni Yihoowan ammanettiyo gishshau, i nuna anjjees; qassi a sheniyaa ammanettidi poliyo wode keehippe ufayttoos.

21. Ha wodiyan ayyaanaabaa cahaa oosuwaa nuuyyo danddayettida keena ubban oottikko, ay ammanettana danddayiyoo?

²¹ Kattaa cakkiyo wodiyaagaappe aadhiya, Xoossay immiyo ufayssaa yeemottidi naagiiddi Daawiti Yihoowayyo hagaadan yexxiis: “Neeni ta wozanan gita ufaissaa kunttadasa. Hegeenne, katta aifeenne ooratta woiniyaa eessai banttayyo darin ufaittiyaageetu ufaissaappekka dariyaagaa.” (Maz. 4:7) Ha wodiyan ayyaanaabaa kattaa cahan kumetta hanotan shaahettikko, nuuni wozanappe ufayttanaagee erettidaba. (Luq. 10:2) “Kawotettaa asaa darissadasa” geetettida, tiyettidaageeti kaalettin, ‘kattaa cakkiyaageeti’ gujji gujji biyoogan ufayttoos. (Isi. 9:3) Ha ufayssiya cahaa oosuwaa oottiyoogan tumuppe ufaytteetii?

Wozanappe Xoossan Ammanettiyoogan Sinttau Sugite

22. Mazamure 4:8 maaraadan, Israaˈeeleti Xoossaa Higgiyaa azazettido wode waanidonaa?

²² Daawiti ha mazamuriyaa, “Abeet GODAU, ne xalaalai tana saruwan naaga wottiyo gishshau, taani zin77ada sarotettan xiskkais” yaagidi kuuyiis. (Maz. 4:8) Israaˈeeleti Yihoowa Higgiyaa naagiyo wode aara sarotettan deˈidosona; qassi woppaa demmidosona. Leemisuwau, Solomona haaruwaa wode, ‘Yihudaa asaynne Israaˈeela asay saro deˈiis.’ (1 Kaw. 4:25) Heeran deˈiya kawotettati eta ixxiyo wodekka, Xoossan ammanettiyaageeti sarotettan deˈidosona. Xoossay nuuni woppu gaanaadan oottiyo gishshau, Daawitaagaadan sarotettan xiskkoos.

23. Nuuni wozanappe Xoossan ammanettiyaaba gidikko, ay demmanee?

²³ Ammanettidi Yihoowa oosuwan sinttau sugiyaageeta gidoos. Qassi ammanuwan woossiyaageeta gidoos; yaatiyoogan, “asa eratettaa ubbaappe aadhdhiya Xoossaa [sarotettaa]” demmana. (Pili. 4:6, 7) Hegee nuuni ufayssaanne sarotettaa demmanaadan oottiyaaba. Nuuni ubbatoo Yihoowan wozanappe ammanettiyaaba gidikko, sinttanaa wodiyaa ammanettidi naagana danddayeettees.

Woygada Zaaruutii?

• Abeselooma gaasuwan Daawita ayba metoy gakkidee?

• Mazamure 3y woppu gaanaadan oottiyoy ayba ogiyaanee?

• Mazamure 4y nuuni Yihoowan minttidi ammanettanaadan oottana danddayiyoy ayba ogiyaanee?

• Wozanappe Xoossan ammanettiyoogan ayba ogiyan goˈettana danddayiyoo?

[Oyshata]

[Sinttaa 29n deʼiya misiliyaa qonccissuwaa]

Daawiti Abeseloomappe baqatido wodekka, Yihoowan ammanettiis

[Sinttaa 32n deʼiya misiliyaa qonccissuwaa]

Yihoowan wozanappe ammanetteetii?