Hiraagaa 3. Harggiyaa

“Wurssiya harggee yaana.”—LUQ. 21:11.

● Olan hammasettiya issi Afirkka biittan, issi haakime keettaa alaafe gidida Bonzaala geetettiya bitanee, Marberg giyo vayresiyan oyqqiya harggiyan keehippe sahettiya, he kataman deˈiya maadiniyaa oosanchata maaddana danddayibeenna. * I wogga kataman deˈiya alaafeti he asata maaddanaadan oychidi zaaro demmibeenna. Maaddiya asati oyddu aginappe guyyiyan yiidaba gidikkonne Bonzaalikka hayqqiichiis. I maadiniyaa oosanchata ashshanau baaxetishin Marberg giyo vayresee a oyqqiis.

HANOTAY AY QONCCISSII? Wolqqaama qufee, karay, eedisee, ajaajjeenne shekkeeree asaa naata keehippe qohiya harggetuppe amaridaageeta. Ha ichashu qommo harggiyan mata wode issi laytta giddon 10.7 miiloone gidiya asay hayqqiis. Hegaa giyoogee, laytta kumettan gimmitiyan heezzu sokkonddiyan issi asi hayqqees giyoogaa.

DAROTOO ASAY WOYGII? Alamiyan asaa qooday gujjiiddi deˈees; hegee harggee daranaadan oottiis. Daro asay harggiyan oyqettana danddayees.

HEGEE TUMEE? Alamiyaa asaa qooday keehi gujjiis. Hegaadankka, asay harggiyaa marammariyoonne akkamiyo, qassi harggee aakkennaadan teqqiyo eraykka gujjiis. Yaatin, harggee asaa naata qohiyoogaa aggana bessennee? SHin hanotay hegaappe dumma.

NE QOFAY AYBEE? Geeshsha Maxaafay kasetidi yootidoogaadan asay wurssiya harggiyan qohettiiddi deˈii?

Biittaa qaattay, koshaynne harggee asa wolqqaappe bolla gididabata gidishin, miilooniyan qoodettiya asaa wurssiiddi deˈoosona. Qassi miilooniyan qoodettiyaageeta hara asati qohoosona; hegeetuppe darotu bolli qohuwaa gattiyay, eta qohuwaappe ashshana bessiyaageeta. Geeshsha Maxaafaa hiraagay aybi hananaagaa yootiyaakko akeeka.

[Tohossa qofaa]

[Sinttaa 6n deʼiyaagaa qonccissuwaa]

“Gaammuwan woy hara doˈan meetettiyoogee keehi yashshiyaaba; nu bolla giddon deˈiya iita harggiyan meetettiyoogeenne hara asaa bolli hegaa malabay gakkiyoogaa beˈiyoogeekka hegaadan yashshiyaaba.”​—EPIDEMIYOLOJIST MIKAAˈEL OSTERHOLM.

[Sinttaa 6n deʼiya misiliyaa qonccissuwaa]

© William Daniels/Panos Pictures