Hiraagaa 4. Siiqoy Baynnaagaa

“Asay . . . ba soo asaa siiqennaagaa gidana.” —2 XIM. 3:1-3, Gods Word Baybil

● Krisi, so asaa bolli gakkiya qohuwaa xeelliyaagan maaddiya citan Welssen huuphessa baggan oottees. Krisi hagaadan giis: “Hariyaa kessi bukkido issi maccaasiyaa taakko yiido wode, taani kase beˈido maccaasa gidiyoogaa akeekana danddayabeennaagaa hassayays. Bantta bolli gakkiyaaban azzanida hara maccaasati qassi asaa xoqqu giidikka xeellokkona.”

HANOTAY AY QONCCISSII? Issi Afirkkaa biittan, 3ppe 1 maccaasiyaa naatettan deˈishin attuma asay iira wolqqan zinˈˈees. He biittan oosettida xinaatee qonccissiyoogaadan, 30 attuma asaa giddon 10ppe dariyaageeti bantta macca asaa wadhiyoogee bessiyaabadan qoppoosona. SHin so giddon qohoy gakkiyoy maccaasa xalla gidenna. Leemisuwau, Kanaadan 10 attuma asatuppe 3 gidiyaageeta eta aqo laggeti qohoosona.

DAROTOO ASAY WOYGII? So giddon gakkiya qohoy kaseesappekka deˈiyaaba. SHin haˈˈi kaseegaappe aaruwan qofissiyaaba gidiis.

HEGEE TUMEE? Aadhida tamman qoodettiya layttatun, so giddon gakkiya qohuwaa asay kaseegaappe aaruwan akeekiis. Yaatin, so giddon gakkiya qohuwaa xeelliyaagan, asay kaseegaappe aaruwan akeekidoogee gakkiya qohuwaa guuttidee? Akkay, hanotay hegaadaana gidenna. Awudeegaappenne aaruwan asay siiqoy baynnaagaa gidiis.

NE QOFAY AYBEE? Ha wodiyan 2 Ximootiyoosa 3:1-3y polettiiddi deˈii? Daroti bantta soo asaa siiqennaageetee?

Polettiiddi deˈiya ichashantta hiraagay nuuni deˈiyo ha saˈaa xeelliyaagaa. Hegaa xeelliyaagan Geeshshaa Maxaafay woygiyaakko beˈa.

[Sinttaa 7n deʼiya misiliyaa qonccissuwaa]

“So giddon gakkiya qohoy asaa bolli geeman gakkiya keehi wolqqaama dano giyoogeetuppe issuwaa. Issi maccaasiyaa ba bolli gakkiya qohuwaa polisiyau erissanaappe kase azinay o 35too bukkees.”​—WELSSEN, SO GIDDON QOHOY GAKKIDO ASATA SILKKIYAN ZORIYA DIRIJJITIYAA OOSANCHAA.