Mooguwaara Gayttida Wogau Kiristtaanetu Xeelaa

SIIQIYO uri qoppennan hayqqiyoogee keehi azzanttiyaaba. Hegee dagamaanne hegaappe simmin wolqqaama azzanuwaa kaalettees. Siiqiyo uri iita harggiyan daro wodiyau sahettidi hayqqiyoogaa beˈiyoogee hegaappe dummatees; shin azzaniyoogeenne keehi seelettiyoogee attenna.

Siiqiyo uri ay mala hanotan hayqqikkokka, kayyottida ura maaddananne minttettana koshshees. Mooguwaara gayttidaagan Geeshsha Maxaafaara moggenna wogaa kaallanaadan harati kayyottida Kiristtaaniyaa bolli yedetaa gattana danddayoosona. Afirkkan daro biittatuuninne hara issi issi biittatunkka hegee meeze gididaba.

Kayyottida Kiristtaanee mooguwaara gayttida, Geeshsha Maxaafaara moggenna wogaappe haakkanau aybi maaddii? Hegaa mala paacee gakkiyo wode, a mala Kiristtaaneti waatidi maaddana danddayiyoonaa? “Xoossaa Aawaa sinttan pokkoi bainna geeshsha ammanoi hagaa; hegee augee giikko, aaya aawi bainna naatanne waayettiya am77eta maaddanaagaanne sa7aa nagaraa qitaappe ba huuphiyaa naaganaagaa” gidiyo gishshau, ha oyshatu zaaroy Yihoowa ufayssana koyiya ubbaa keehi qofissiyaaba.—Yaaq. 1:27.

Issi Ammanuwaara Gayttidaba

Mooguwaara gayttida daro wogaa issi mala oottiyaabay, hayqqidaageeti mayzzati deˈiyo beettenna alamiyan deˈoosona giyo ammanuwaa. Kayyottiya daroti eta ufayssanau issi issi wogaa polana bessiyaabadan qoppoosona. Woykko he wogaa polana xayikko heeraa asaa bolli qohoy gakkana giidi ammaniya shoorota azzanttana giidi yayyoosona.

Issi tumu Kiristtaanee asau yayyidi, Xoossaa ufayssenna wogaa kaallana bessenna. (Lee. 29:25; Maa. 10:28) Geeshsha Maxaafay, “Paxa de7iya asati issitoo haiqqanau de7iyoogaa eroosona; shin haiqqidaageeti aibanne erokkona. . . . Neeni baanasan duufuwan oosoi, woikko halchchoi, woikko eri, woikko aadhdhida eratetti baawa” yaagiyo gishshau, hayqqidaageeti aybanne erennaagaa akeekissees. (Era. 9:5, 10) Yaatiyo gishshau, Xoossaa Yihooway beni wode ba asay hayqqidaageeta ufayssanau woy etaara haasayanau malennaadan yootiis. (Zaa. 14:1; 18:10-12; Isi. 8:19, 20) Geeshsha Maxaafay yootiyo ha tumay mooguwaara gayttidaagan aakkidi deˈiya daro wogaara phalqqettees.

“Asho Gaytotettan Geeyiyoogaa” Xeelliyaagan SHin?

Giddo Afirkkan issi issi biittatun, macha woy azini hayqqido uri hayqqida ba aqo laggiyau mata dabbo gidida uraara asho gaytotettaa polana koshshiyaabadan ammanoosona. Hegaadan oottana xayikko hayqqidaagee paxa deˈiya so asaa qohiyoobadan ammanoosona. He wogay “asho gaytotettan geeyiyoogaa” geetettees. SHin Geeshsha Maxaafay aqo laggiyaappe hara oonaaranne poliyo asho gaytotettay ‘shaaramuxiyoogaa’ gidiyoogaa yootees. Kiristtaaneti ‘shaaramuxappe baqatana’ bessiyo gishshau, Geeshsha Maxaafaara moggenna ha wogaa xalan eqettoosona.—1 Qor. 6:18.

Mersso giyo amˈˈeebaa qoppa. * I azinay 1989n hayqqido wode, dabboti azinau mata dabbo gidida uraara asho gaytotettan geeyiyo wogaa a polanaadan koyidosona. A he wogay Xoossaa higgiyaara phalqqettiyoogaa qonccissada, ixxis gaasu. Dabboti hidootaa qanxxidi, o cayidi aggidi biidosona. Issi aginappe guyyiyan eti i keettaa patipannidi, kaaraappe qorqqoruwaa shoddi olidosona. Eti, “Ne ammanoy ane nena naagiyoogaa beˈana” giidosona.

Gubaaˈee Mersso minttettiis; ubba iyyo ooratta keettaa keexxiis. SHooro asay hegan keehi garamettidi, issoti issoti he oosuwaa oottanau koyidosona; Kaatolike haymaanootiyaa kaalliya, heeraa halaqaa machiyaa ubbaappe kasetada kaaraa kammiyo gattaa ehaasu.  Merssa ammanettiyaaro gidada deˈidoogee i naata minttettiis. Etappe oyddati hegaappe simmin Xoossa Yihoowayyo banttana geppidosona; qassi Gubaaˈiyau Oottiyaageeti Loohiyo Timirtte Keettan mata wode loohidosona.

Asho gaytotettan geeyiyo wogaappe denddidaagan, issi issi Kiristtaaneti ammanenna ura ekkanaadan woy gelanaadan asay wolqqanttiis. Leemisuwau, machiyaa hayqqido layttay 70ppe bolla gidido uri eesotidi, hayqqida ba machee dabbo gidida issi yelagiyo ekkiis. I hegaadan oottiyoogan, asho gaytotettan geeyiyo wogaa polaas gaana danddayees. SHin Kiristtaaneti “Godaa ammaniya asaa wogan” ekkanaadan Geeshsha Maxaafay yootiyoogaappe hegee phalqqettees.—1 Qor. 7:39.

Kumetta Qammaa Ahaa Naagiyo Siraataa

Daro biittan, kayyottidaageeti hayqqida ura son shiiqidi, kumetta qammaa xiskkennan aqoosona. Darotoo he wogay bullachchaanne cenggurssaa xoqqu ootti yexxiyo muuziqaa gujjees. Hegee hayqqidaagaa ufayssiyaabadaaninne paxa deˈiya so asaa gomiyaappe naagiyaabadan qofettees. Hayqqida uran nashettanau a mela sabbiyo haasayaykka shiiqana danddayees. Issi uri haasayi simmin, hara uri haasayana gakkanaashin kayyottidaageeti haymaanoote mazamuriyaa yexxana danddayoosona. Saˈay wonttana gakkanaashin hegaadan oottana danddayoosona. *

Hayqqidaageeti paxa deˈiyaageeta maaddana woy qohana danddayennaagaa Geeshsha Maxaafay bessiyo gishshau, issi tumu Kiristtaanee kumetta qammaa ahaa naagiyo hegaa mala wogaa kaallenna. (Doo. 3:19; Maz. 146:3, 4; Yoh. 11:11-14) Iita ayyaanaa oosuwaa oottennaadan Geeshsha Maxaafay azazees. (Ajj. 9:21; 22:15) SHin issi amˈˈe Kiristtaaniyaa, harati iita ayyaana oosuwaa oottennaadan teqqanau metootana danddayausu. Eti kumetta qammaa i son ahaa naagiiddi aqanau o iisettana danddayoosona. Hegaa mala metoy gakkido, kayyottida Kiristtaaneta maaddanau eta mala Kiristtaaneti ay oottana danddayiyoonaa?

Gubaaˈiyaa cimati darotoo, Kiristtaane so asaa dabbotanne shoorota yootidi ammanttiyoogan, eta maaddana danddayidosona. Hegaadan yooti simmin, he asati saruwan sooppe baanaunne hara galla mooguwau shiiqanau maayana danddayoosona. SHin issoti issoti hanqqettikko waatana danddayettii? Yootidi ammanttanau zaari zaaridi baaxetiyoogee ooshshaa denttana danddayees. “Godaa ashkkarai . . . danddayanchcha gidanau besseesippe attin, ooyettanau bessenna.” (2 Xim. 2:24) Hegaa gishshau, odiyoobaa maayenna dabboti he wogaa wolqqan polanau koyikko, amˈˈe Kiristtaaniyaanne i naati hegaa digganau eta wolqqaappe bolla gidana danddayees. SHin Geeshsha Maxaafay, “Ammanenna asatuura zuppetidi, giigenna oosuwaa oottoppite” yaagiyoogaa eti azazettiyo gishshau, bantta son polettiya worddo haymaanoote wogaa augaanne kaallokkona.—2 Qor. 6:14.

Ha baaso siraatay mooguwaassikka hanees. Worddo haymaanootiyaa asttamaaree kaalettiyo mazamuriyan, woosan woykko wogaa Yihoowa Markkati kaallokkona. Hayqqida uraa keetta asa gidida Kiristtaaneti he sohuwan beettana koshshiyaabadan qoppikko, he siraataa kaallokkona.—2 Qor. 6:17; Ajj. 18:4.

Bonchettida Mooguwaa Siraataa

Yihoowa Markkati poliyo mooguwaa siraatan, hayqqidaageeta ufayssanau poliyo wogi baawa. Kawotettaa Addaraashan, hayqqida uraa son woy mooguwaa sohuwan Geeshsha Maxaafan baasettida haasayay shiiqees. He haasayaa halchoy, Geeshsha Maxaafay dendduwaa hidootaanne hayquwaa xeelliyaagan yootiyoobaa qonccissiyoogan kayyottidaageeta minttettiyoogaa. (Yoh. 11:25; Roo. 5:12; 2 PHe. 3:13) Geeshsha Maxaafan baasettida mazamuree yexettana danddayees; qassi he siraatay minttettiya woosan kuuyettees.

Amarida wodeppe kase, Tohossa Afirkkaa pirezddanttiyaa, Nelsen Manddeela kaalo micho gidida Yihoowa Markkiyaa hayqqin, hegaa mala moogo siraatay polettiis. He siraataappe simmin, Pirezddanttee haasayaa shiishshida ishaa wozanappe galatiis.  Bonchettidanne xoqqa maatay deˈiyo daro asati he sohuwaa yiidosona. Ministteretuppe issoy, “Taani hanno gakkanau be⁠ˈido moogo siraata ubbaappe hagee keehi bonchettidaagaa” yaagiis.

Azzano Maayuwaa Maayiyoogee Aynne Baawee?

Siiqiyo uri hayqqiyo wode Yihoowa Markkati kayyottoosona. Eti Yesuusaagaadan afuxxana danddayoosona. (Yoh. 11:35, 36) SHin eti azzanidoogau malaata gidiyaabaa asa bessanau koshshiyaabadan qoppokkona. (Maa. 6:16-18ra gatta xeella.) Daro biittatun, amˈˈe maccaasati hayqqida bantta azinaa ufayssanau dumma maayuwaa maayanaadan koyettees. Baliyaappe simmin, he maayuwaa unddenna aginau, woy ubba issi layttau maayana bessees; hegaa maayiyoogaa aggiyo wode, hara bullachaa kessoosona.

Azzanidoogaa bessiya malaataa goˈettennaagee hayqqida ura hanqqetissiyaabadan qofettees. Hegaa gishshau, Swaazilandden issi issi heeran zariyaa halaqati Yihoowa Markkata eta keettaappenne heeraappe yedettidosona. Gidikkokka, harasan deˈiya eta Kiristtaane ishati ubbaton he ammanettida Kiristtaanetussi koshshiyaabaa kunttidosona.

Swaazilandde Xoqqa Pirdda Keettay Yihoowa Markkati bantta soonne bantta deˈiyo heeri simmanaadan yootiyoogan etau pirddiis. Hara hanotan, azinay paxa deˈiiddi ba machiyaa azzano maayuwaa maayana koshshennaagaa qonccissido, dabddaabbiyaanne teeppiyan duuqqidoogaa immada, issi amˈˈe Kiristtaaniyaa ba aquwan takkaasu. Yaatiyoogan, ba azinaa tumuppe bonchiyoogaa bessana danddayaasu.

Issi uri hayqqanaappe kase, mooguwaara gayttida kaaletuwaa qonccissiyoogee, ubba qassi Geeshsha Maxaafaara moggennabaa oottiyo meezee deˈiyoosan keehi maaddees. Kaameruunen deˈiya Viktora leemisuwaa qoppite. I ba baliyan asay kaallana bessiyo prograamiyaa xaafiis. Asa guuggiyau goynniyoogaa gujjin, hayqqidaageetuura gayttida daro meezee deˈiyo wogaa kaalliyoogan erettida daro dabboti ayyo deˈoosona. Viktori ba dabbotu giddon bonchettida asa gidiyo gishshau, ba guuggiyaa asay hegaadan goˈettana danddayiyoogaa eriis. Yaatiyo gishshau, Yihoowa Markkati ba baliyaa waatidi polana koshshiyaakko qoncce kaaletuwaa immiis. Hegee, a macheeyyoonne a naatuyyo hanotay metennaadan oottiis; qassi he moottan loˈˈo markkatettaa gidiis.

Geeshsha Maxaafaara Moggenna Wogaa Kaallennaadan Naagettite

Geeshsha Maxaafaa eray deˈiyo issoti issoti haratuppe dummati deˈanau yayyidosona. Eti yedetay gakkennaadan giidi, ahaa naagiyo wogaa poliyaaba milatiyoogan bantta shoorota ufayssanau malidosona. Kayyottidaageeta minttettanau eta soo biyoogee loˈˈoba gidikkokka, hegee hayqqida uraa son sima gidida moogo siraataa, baliyaa gallassaappe kase ubbaton omarssan polana koshshees giyoogaa gidenna. Hegaadan oottiyoogee hayqqida asaa xeelliyaagan Geeshsha Maxaafay yootiyoobaa ammanennaba milatissiyo gishshau, hegee beˈiya asaa xubbana danddayees.—1 Qor. 10:32.

Kiristtaaneti Xoossau goynniyoogaa bantta deˈuwan kaseyanaadaaninne bantta wodiyaa suure goˈettanaadan Geeshsha Maxaafay zorees. (Maa. 6:33; Efi. 5:15, 16) Gidikkokka, issi issi heeran baliyaa gaasuwan asay gubaaˈiyaara gayttida oosuwaa issi saaminttau woy hegaappe dariya wodiyau aggi bayiis. Hegaa mala metoy Afirkkaa xallan deˈiyaaba gidenna. Issi baliyaa xeelliyaagan, Tohossa Amarkkaappe kiitettida irpporttee hagaadan gees: “Heezzu gubaaˈe shiiqotun shiiqida asaa qooday keehi guutta. Tammu gallassa gidiya wodiyau haggaazuwaa kiyanau shiiqiyo shiiquwaa yiiday baawa. Ubba gubaaˈiyaa yame gidennaageetinne xinaateti nu ishatuppenne michotuppe issoti issoti he wogaa kaalliyoogaa beˈidi garamettidosonanne hidootaa qanxxidosona.”

Issi issi heeran, kayyottida so asay baliyaappe simmin banttanaara guuttabaa maanaadan mata laggetuppe amaridaageeta bantta soo shoobbana danddayoosona. SHin Afirkkan daro heeran, baliyaa biida xeetan qoodettiya asay hayqqida uraa soo biidi gibiraa maanau naagees;  hegaa mala wode darotoo mehee shuhettees. Kiristtaane gubaaˈiyan deˈiya issoti issoti he meeziyaa kaallidosona; hegee hayqqidaageeta ufayssanau poliyo bullachaa meeziyaa eti ammaniyoobadan harati qoppanaadan oottiis.

Yihoowa Markkati poliyo mooguwaa siraatay kayyottidaageetussi tooho gidenna. Yaatiyo gishshau, mooguwau kessiyo daro miishshaa zaaretti ekkanau mooguwaasaa biida asay shocciyo hanotaa giigissana koshshenna. Hiyyeesa amˈˈetussi koshshiya miishshay baynnaba gidikko, gubaaˈiyan deˈiya harati ufayttidi maaddanaagee erettidaagaa. Hegaa mala maadoy gidennaba gidikko, miishshi koshshiyoogeeta maaddiyo ogiyaa gubaaˈiyaa cimati giigissana danddayoosona.—1 Xim. 5:3, 4.

Mooguwaara gayttida woga ubbay Geeshsha Maxaafaa baaso siraataara ubbatoo phalqqettenna. PHalqqettiyo wode Kiristtaaneti Geeshsha Maxaafaara moggiyaabaa oottanau murttoosona. * (Oos. 5:29) Hegee metuwaa yaa gujjana danddayikkokka, Xoossau oottiya daroti he metuwaa xooni kiyidoogaa markkattana danddayoosona. Eti “minttetto ubbaa Xoossaa” Yihooway immiyo wolqqaaninne metuwaa wode minttettida eta mala Kiristtaaneti siiquwan maaddidoogan hegaadan oottidosona.​—2 Qor. 1:3, 4.