Xoossaa Qaalaappe Tamaarite

Xoossaayyo Dirijjitee Deˈiyoy Aybissee?

Ha huuphe yohoy neeni oychidoba gidana danddayiya oyshatu zaaruwaa qonccissees; qassi he zaarota Geeshsha Maxaafan awan demmana danddayiyaakko yootees. Yihoowa Markkati he zaarota nenaara tobbanau ufayttoosona.

1. Xoossay Israaˈeelata daraajjayidoy aybissee?

Xoossay Abrahaama zerettata issi dere ootti daraajjayidi, etau higgiyaa immiis. I he deriyaa Israaˈeela giidi sunttiis; qassi tumu goynuwaanne ba Qaalaa naaganaadan etau aawatettaa immiis. (Maz. 147:19, 20) Hegaappe denddidaagan saˈaa asa ubbay goˈettiis.—Doomettaabaa 22:18 nabbaba.

Xoossay Israaˈeelati ba markka gidanaadan dooriis. Eti azazettiyo wode, Xoossaa higgiyaappe goˈˈaa demmidosona. (Zaa. 4:6) Israaˈeelatu taarikiyaa xannaˈiyoogan tumu Xoossaabaa kaseegaappe aaruwan erana danddayoos.—Isiyaasa 43:10, 12 nabbaba.

2. Tumu Kiristtaaneti daraajjayettana koshshidoy aybissee?

Guyyeppe, Israaˈeelati Xoossan nashettiyoogee attin, Yihooway eta sohuwan Kiristtaane gubaaˈiyaa essiis. (Maa. 21:43; 23:37, 38) Beni wode, Israaˈeelati Xoossaa markkata. Ha wodiyan, tumu Kiristtaaneti Yihoowa markka gididi oottoosona.—Oosuwaa 15:14, 17 nabbaba.

Yesuusi bana kaalliyaageeti citan Yihoowabaa markkattanaadaaninne ubba biittaappe asaa erissiyo ashkkara oottanaadan yootiis. (Maa. 10:7, 11; 24:14; 28:19, 20) Ha oosoy wuranau matattiis. Hanno gakkanau hani erenna hanotan, Yihooway ubba dere asaappe miilooniyan qoodettiyaageeta tumu goynuwan issippe shiishshiis. (Ajj. 7:9, 10) Tumu kiristtaanetu maabaraykka issoy issuwaa minttettanaadaaninne maaddanaadan daraajjayettiis. Eti alame yuushuwan bantta shiiqotun Geeshsha Maxaafaappe issi mala timirttiyaa tamaaroosona.—Ibraawe 10:24, 25 nabbaba.

  3. Ha wodiyan Yihoowa Markkatu dirijjitee doommidoy ayba ogiyaanee?

Ha wodiyan Yihoowa Markkatu dirijjitee doommidoy 1870 heeraana. Amarida Geeshsha Maxaafaa tamaaretu citay, daro wodiyau dogettida Geeshsha Maxaafaa tumaa zaarettidi demmiyoogaa doommiis. Haggaazanaadan Yesuusi Kiristtaane gubaaˈiyaa darajjayidoogaa eti eridosona. Yaatiyo gishshau, eti zamachan Kawotettaabaa alame yuushuwan sabbakidosona. Eti 1931n Yihoowa Markkata giya sunttan xeesettiyoogaa doommidosona.—Oosuwaa 1:8; 2:1, 4; 5:42 nabbaba.

4. Ha wodiyan Yihoowa Markkati daraajjayettidoy ayba ogiyaanee?

Koyro xeetu layttan, daro biittan deˈiya Kiristtaane gubaaˈeti Yesuusi gubaaˈiyau Huuphe gidiyoogaa ammanidi ekkida bollaara heemmiyaagaa kaaletuwan goˈettidosona. (Oos. 16:4, 5) Hegaadan ha wodiyankka, Yihoowa Markkati Yesuusi banttana kaalettiyaagaa gidiyoogaa ammanidi ekkoosona. (Maa. 23:9, 10) Eti kaymida cimati deˈiyo Bollaara heemmiyaagee 100, 000ppe dariya gubaaˈetuyyo Geeshsha Maxaafaappe immiyo minttettuwaaninne kaaletuwan goˈettoosona. Ubba gubaaˈetunkka gidaa kunttida attuma asati cima woy bollaara xeelliyaageeta gididi oottoosona. He asati Xoossaa wudiyaa siiquwan naagoosona.—1 PHeexiroosa 5:2, 3 nabbaba.

Yihoowa Markkati mishiraachuwaa sabbakanaunne erissiyo ashkkara oottanau daraajjayettidosona. Ubba biittan deˈiya asaa maaddanau Geeshsha Maxaafaa xannaˈanau maaddiya xuufeta 500ppe dariya doonan birshshoosona, attamoosonanne asau immoosona. Eti kiitettidaageetuugaadan sooppe soo biidi sabbakoosona. (Oos. 20:20, 21) Tumaa wozanappe siiqiyaageeti Geeshsha Maxaafaa xannaˈanaadan shoobboosona. Yihoowa asay Xoossaa ufayssiyaabaa oottiyoogaanne asaa maaddiyoogaa kaseyiyo gishshau, eta dirijjitee ufayttiya asay deˈiyo dirijjite.—Mazamure 33:12; Oosuwaa 20:35 nabbaba.

Gujo qofaa demmanau, Yihoowa Markkati attamissido ha maxaafaa shemppo 19 xeella. Tumuppe Geeshsha Maxaafay Tamaarissiyoy Aybee?