Geeshsha Maxaafan Xaafettida Maalaalissiyaaban Ammanana Danddayay?

ISSI maalaaliya taarikiyaa neessi issi uri yootiyaaba gidiyaakko, i ammanettiya ura gidiyoogee neeni hegaa ammananaadan oottennee? I ammanettiyaagaa gidiyoogee taarikiyaa yootiyo ogiyaa xallaara gidennan, i ba deˈuwan oottiyooban tumancha asa gidiyoogaarakka gayttidaba. I ubbatoo neeyyo tuma gididabaa yootidaba, qassi mule worddotibeennaba gidikko, i haˈˈi neeyyo yootidobaa ammanana danddayaasa.

Geeshsha Maxaafay yootiyo maalaalissiyaabaa xeelliyaagankka hanotay hegaa mala. He maalaalissiyaabay haniyo wode nuuni yelettibookko. SHin Geeshsha Maxaafaa taarikee ammanttiyaagaanne tuma gidiyoogaa shaakki erana danddayoos. Waatidi? Geeshsha Maxaafay yootiyo maalaalissiyaabaa ammananaadan oottiya issi issibati kaallidi deˈoosona.

Maalaalissiya darobay hanidoy asay deˈiyoosaana. Maalaalissiyaabay haniyo wode, issi issitoo shaˈan qoodettiya asay beˈiis; ubba miilooniyan qoodettiya asay beˈennan aggenna. (Kes. 14:21-31; 19:16-19) He maalaalissiyaabay hanidoy asay deˈiyoosaanappe attin, geemaana gidenna.

Maalaalissiyaabay akeekanau metennaagaa. Hegaa oottidaageeti dumma miishshaa woy balettiyaabaa goˈettibookkona. Geeshsha Maxaafan xaafettida maalaalissiyaabatuppe dariya baggay kasetidi qoppennan, qassi asay oychin oottidoba. (Mar. 5:25-29; Luq. 7:1-16) Hegaa mala hanotan oosettida maalaalissiyaabay giigettidi oottidoba gidana danddayenna.

Maalaalissiyaabaa oottidaageeti hegaa oottidoy hayttatanaassa, bonchettanaassanne duretanaassa gidenna. SHin, eti hegaa oottidoy Xoossaa bonchisanaassa. (Yoh. 11:1-4, 15, 40) Hegaa mala maalaalissiyaaba oottidi banttau goˈˈaa demmanau koyida asata Xoossay qaxxayiis.—2 Kaw. 5:15, 16, 20, 25-27; Oos. 8:18-23.

Geeshsha Maxaafan xaafettida maalaalissiyaabay dumma dumma gidiyoogee asa wolqqa xallan hanana danddayennaagaa qonccissees. Leemisuwau, goteenne beetay woppu giis, haattay woyne eessau laamettiis, iray bukkiyoogaa aggiisinne bukkiyoogaa doommiis, harggida asay paxiis, qassi qooqee xeelliis. Ha ubba maalaalissiyaabatinne harati, hegaa malabaa ootissana danddayiya, asaappe keehi wolqqaamiya uri deˈiyoogaa bessoosona.—1 Kaw. 17:1-7;  18:41-45; Maa. 8:24-27; Luq. 17:11-19; Yoh. 2:1-11; 9:1-7.

Maalaalissiyaabay haniyo wode beˈida eqettiyaageeti hegee hanidoogaa siribookkona. Yesuusi ba dabbuwaa Alˈˈaazara hayquwaappe denttido wode, Yesuusa morkke gidida, haymaanootiyaa kaalettiyaageeti Alˈˈaazari hayqqidoogaa siribookkona. Woni eti waanidi sirana danddayiyoonaa? Alˈˈaazari moogettidi oyddu qammaa duufuwan takkiis. (Yoh. 11:45-48; 12:9-11) Ubba Yesuusi hayqqido wodiyaappe daro layttaa takkidi, Ayhudatu Talmudiyaa xaafidaageetikka Yesuusau maalaalissiyaabaa oottiyo wolqqay deˈiyoogaa siribookkona. Eti i hegaa oottiyo wolqqaa awuppe demmidaakko siridosona. Hegaadankka, Yesuusi erissiyo ashkkarata Ayhudatu pirdda keetti xeesido wode, eta “Intte maalaalissiyaabaa oottidetii?” giidi oychibookkona. SHin eta, “Ai wolqqan woi o sunttan hagaa intte oottidetii?” yaagidi oychidosona.—Oos. 4:1-13.

Yaatiyo gishshau, maalaalissiyaabaa xeelliyaagan Geeshsha Maxaafay yootiyoobaa ammanana danddayay? Hanno gakkanaashin nuuni beˈidoogaadan, Geeshsha Maxaafay yootiyo maalaalissiyaabay ammanana danddayiyooba gidiyoogee qoncce. Geeshsha Maxaafay yootiyo he taariketubaa ammananaadan oottiya hara gaasoy deˈees. Leemisuwau, Geeshsha Maxaafay issi hanidabaa yootiyo wode, hegee hanido wodiyaa, sohuwaanne asatu sunttaa yootees. Ubba qassi, Geeshsha Maxaafaa toochiyaageetikka an deˈiya taarikee tuma gidiyoogan maalaalettoosona. Geeshsha Maxaafan deˈiya, xeetan qoodettiya hiraagay, odettidabi aybinne attennan polettiis. Hegaa bollikka, Geeshsha Maxaafay asay issoy issuwaara ufayssan deˈana danddayiyo ogiyaa xeelliyaagan daro zoriyaa oyqqiis; he zoree naatuwaa cimaa, qassi dumma dumma wogan diccida asaa ubbaa maaddiis. Asay issoy issuwaara deˈiyo ogiyaa xeelliyaagan Geeshsha Maxaafay yootiyo zoriyaara laggetiyaabi baawa.

Neeni Geeshsha Maxaafaa hanno gakkanaashin ammanennaba gidikko, wodiyaa bazzada aybissi loyttada pilggikkii? Neeni a loyttada eriyo wode, kaseegaappe aaruwan a ammanana. (Yoh. 17:17) Yaatikko, beni wode hanida maalaalissiyaabaa xeelliyaagan Geeshsha Maxaafay yootiyoobaa neeni ammanana danddayiyoogaa akeekaasa. He taariketa neeni ammaniyo wode, hegee Geeshsha Maxaafay yootiyo, sinttappe hananaban neeni ammanettanaadan oottees.

[Sinttaa 5n deʼiya misiliyaa qonccissuwaa]

Yesuusa morkketi Alˈˈaazari hayqqidoogaa siribookkona