MUUSEPPE TAMAARIYOOBAA
Muusee Oonee?
Neeni Muusebaa qoppiyo wode ay hassayay? Geella . . .
-
a aayyiyaa keeshiyan yeggada Nayle SHaafan wottido gacino naˈaa hassayay?
-
Paaroona naˈiyaa Gibxxen ishaluwan dichidaba gidikkokka, Israaˈeela asa gidiyoogaa dogibeenna naˈaa hassayay?
-
Miidiyaame biittan 40 layttau dorssaa heemmiiddi deˈida bitaniyaa hassayay?
-
eexxiya buuraa matan Yihoowaara * haasayida bitaniyaa hassayay?
-
Israaˈeelata yeddanaadan Gibxxe kawuwaa xalan oychida bitaniyaa hassayay?
-
Gibxxe kawoy tumu Xoossau azazettennan ixxido gishshau, he biittan Tammu Boshay gakkanaagaa Xoossay kiittin yootida bitaniyaa hassayay?
-
Gibxxeppe kiyida daro Israaˈeelata kaalettida bitaniyaa hassayay?
-
Xoossay azazin Zoˈo Abbaa shaakkida bitaniyaa hassayay?
-
Xoossay immido Tammu Azazota Israaˈeelatussi yootida bitaniyaa hassayay?
MUUSEE hageetanne hara darobaa oottiis. Ammanettida ha bitaniyaa Kiristtaaneti, Ayhudatinne Isilaamati keehippe bonchiyoogee garamissiyaaba gidenna!
Muusee “gita wolqqan maalaalissiyaabaa” oottidaagaanne hananabaa yootidaagaa gidiyoogee qoncce. (Zaarettido Wogaa 34:10-12) Xoossay a baggaara wolqqaamabaa oottanaadan i eeno giis. Gidikkokka, Muusee nu mala asa. Yesuusi saˈan haggaaziyo wode ajjuutan Muuseera qonccida, hananabaa yootiya Eelaasaagaadan, Muuseekka “nu mala asa.” (Yaaqooba 5:17; Maatiyoosa 17:1-9) Nuna gakkiyaagaa mala daro metoy Muuse bolli gakkiis; qassi i he metuwan genccidi xooni kiyiis.
I hegaadan oottidoy ayba ogiyaanakko eranau koyay? Muuse loˈˈo eeshshatuppe heezzata, qassi nuuni a leemisuwaappe ay tamaarana danddayiyaakko akeeka.
^ MENT. 7 Yihoowa giyaagee Geeshsha Maxaafan qonccida Xoossaa sunttaa.
