Sugad han gin-report ha breaking news ha jw.org, may pipira nga bomba nga bumuto ha regional nga kombensyon ha Kerala, India, han Domingo, Oktubre 29, 2023. Makasurubo, labot la ha duha nga sister nga namatay, usa nga 12-anyos nga babaye an namatay liwat tungod han mga samad ha pagbuto. May 55 nga kabugtoan liwat nga nasamaran, ngan an iba ha ira grabe nga nasunog an lawas.

Ha pagkayana, tulo nga sister ngan duha nga brother an nagpapabilin ha hospital tungod han kritikal nga kondisyon. Ginkompirma han mga awtoridad nga diri maminos tulo nga bomba an ginpabuto ha tinikangan nga pag-ampo han mga 9:40 han aga. Aada yana ha kustodiya han mga pulis an suspek hini nga pagbomba, ngan nagpapadayon an imbistigasyon.

Mapasalamaton gud kita ha mga tawo nga rumesponde dayon ha lugar han kombensyon ngan ha mga empleyado han hospital nga bumulig ha mga nasamaran.

Nabantad gud ngan naparig-on liwat an mga inatender tungod han gugma ngan suporta nga iginpakita han ira igkasi-tumuroo. Usa nga sister nga nakadto ha awditoryum han bumuto an mga bomba an nagsiring: “Nag-ampo dayon ako kan Jehova. An mga attendant ngan iba pa nga brother, bumulig ha amon ngan rumesponde dayon basi masiguro nga talwas kami. Iginpapakita hito an gugma ngan pagpaid ni Jehova ha kada usa ha aton.”

An mga representante tikang ha branch office han India, mga paramangno han sirkito, ngan mga tigurang ha Kerala padayon nga nagtatagana hin espirituwal ngan praktikal nga bulig ha mga naapektohan. Usa nga tigurang tikang ha branch office nga nagbiyahe pakadto ha Kerala basi liawon an kabugtoan nga naapektohan han pagbomba an nagsiring: “Bisan pa kon damu an nalisang, nasakitan, ngan natruma, naparig-on ako han positibo nga panhunahuna han kabugtoan nga naapektohan. Ginkaistorya ko an damu ha ira. Makaparig-on gud hin pagtoo nga makita an ira pagsarig kan Jehova.”

Sugad nga bahin han bug-os-kalibotan nga pagminagburugto, igin-aampo naton an mga pamilya han mga nabiktima ngan an ngatanan nga naapektohan hini nga trahedya ha India. Naliliaw kita ngan nagkakaada murayaw nga hunahuna ha mga saad han Biblia nga ha tiarabot waray na kamadarahog, pag-antos, ngan kamatayon. Determinado kita nga padayon nga bug-os nga sumarig kan Jehova.—Salmo 56:3.