Diri maopay nga epekto: An pagin awdanon mahimo makapugong ha imo nga magkaada hin mag-opay nga kasangkayan ngan makalilipay nga mga eksperyensya.

 Maopay nga epekto: Diri man maraot an pagin awdanon. Makakabulig ito ha imo nga maghunahuna anay antes magyakan, magin mas maobserbaron, ngan magin mas maopay nga parapamati.

 An imo mahihimo: Diri karuyag sidngon nga tungod kay awdanon ka yana, magigin sugad ka na la hito pirme. Puydi mo makontrol an imo pagin awdanon. Ini nga artikulo mabulig nga mahibaroan mo kon paonan-o.

•  Hibaroi an imo mga ginkakahadlokan

•  An puydi mo buhaton

•  An ginsisiring han iba nga batan-on

 An pagin awdanon mahimo magpugong ha imo nga makiistorya ha mga tawo hin personal. Salit bangin abaton mo nga bulag ka ha iba, nga baga hin nag-uusahan ka ha usa nga masirom nga kwarto. Makaharadlok ito. Pero kon hibabaroan mo an imo mga ginkakahadlokan, bangin ma-realize mo nga diri ka ngay-an angay mahadlok. Hunahunaa inin tulo nga ehemplo.

•   Kahadlok #1: “Diri ako maaram kon ano an akon iyayakan.”

   An tinuod: Mas nahinunumdoman han mga tawo an imo iginpaabat ha ira kay ha imo iginyakan. Makukontrol mo an imo kahadlok kon magigin maopay ka nga parapamati nga nagpapakita nga interesado ka gud ha ginsisiring han iba.

   Hunahunaa ini: Ano nga klase hin sangkay an imo karuyag—an pirme la nagyiyinakan o an maopay nga parapamati?

•   Kahadlok #2: “Bangin hunahunaon han mga tawo nga boring ako nga kaistorya.”

   An tinuod: May-ada pirme maiyayakan an mga tawo parte ha imo, awdanon ka man o diri. Makukontrol mo an imo kahadlok—ngan mabubuligan an mga tawo nga mas makilala ka hin maopay—kon ipapakita mo kon ano ka gud nga klase hin tawo.

   Hunahunaa ini: Kon ginhuhunahuna mo nga negatibo an pagkita ha imo han iba, diri ba bangin ikaw an naghuhukom ha ira kay ginhuhunahuna mo nga nadiri hira ha imo?

•   Kahadlok #3: “Maaalohan ako kon sayop an akon maiyakan.”

   An tinuod: Usahay, nahitatabo ito ha aton ngatanan. Makukontrol mo an imo kahadlok kon huhunahunaon mo ito nga mga sayop sugad nga oportunidad basi ipakita ha iba nga diri mo ginhuhunahuna nga perpekto ka.

   Hunahunaa ini: Diri ba mas maopay makig-upod ha mga tawo nga ginkakarawat nga nagsasayop liwat hira?

 Maaram ka ba? Ginhuhunahuna han iba nga diri hira awdanon kay mahilig man hira mag-text. Pero mas masayon nga magkaada hin tinuod nga kasangkayan kon personal nga makakaistorya mo an iba. An psychologist ngan technology expert nga hi Sherry Turkle nagsurat: “Kon nakikita naton an aton kaistorya ngan nababatian an ira tingog, nagigin mas duok gud kita ha ira.” a

•   Likayi an pagkompara. Diri mo kinahanglan magin maistoryahon. Kondi an imo goal amo an makontrol an imo pagin awdanon basi diri ka mapugngan nga magkaada hin mag-opay nga kasangkayan ngan makalilipay nga mga eksperyensya.

   “An mga pag-istorya diri kinahanglan magin hilaba, ngan diri mo kinahanglan magin sentro han atensyon. Ipakilala la an imo kalugaringon, o pagpakiana hin simple nga mga pakiana.”—Alicia.

   Prinsipyo ha Biblia: “Usisahon han kada tagsa an iya mga buhat, ngan magkakaada hiya hinungdan nga malipay gud ha iya la kalugaringon, ngan diri igintatanding an iya kalugaringon ha iba nga tawo.”—Galacia 6:4.

•   Magin maobserbaron. Obserbari an mga tawo nga maopay makig-istorya ngan pansina kon paonan-o nira ito ginhihimo. Ha ano hira epektibo? Ha ano naman hira diri masyado epektibo? Ano nga mag-opay nira nga kalidad an puydi mo masubad?

   “Obserbari an mga tawo nga masayon magkaada kasangkayan ngan mahibaro tikang ha ira. Kitaa kon ano an ira ginhihimo ngan ginsisiring kon may bag-o hira nga nakikilala.”—Aaron.

   Prinsipyo ha Biblia: “Sugad la nga an puthaw nagpapatarom han igkasi-puthaw, an usa nga tawo nagpapatarom han iya sangkay.”—Proberbios 27:17.

•   Pagpakiana. An mga tawo kaurogan nga naruruyag pagsumat han ira opinyon parte ha mga butang, salit an pagpakiana maopay nga paagi ha pagtikang hin pakiistorya ha ira. Naibulig liwat ito basi diri maipokus han mga tawo an ira atensyon ha imo.

   “An abanse nga pagpangandam nabulig nga maibanan an imo kabaraka. Puydi ka pa ngani maghunahuna hin pipira nga topiko o pakiana antes an usa nga pagturotarampo basi diri ka maawod kon may bag-o ka nga nakikilala.”—Alana.

   Prinsipyo ha Biblia: “[Panginanoa] diri la an iyo kalugaringon nga kaopayan, kondi pati liwat an kaopayan han iba.”—Filipos 2:4.