“Ayaw kahadlok, kay kaupod mo ako. Ayaw kabaraka, kay ako an imo Dios. Paririg-unon ko ikaw, oo, bubuligan ko ikaw, kakaptan ko ikaw hin maopay pinaagi han akon too nga kamot nga uyon ha katadongan.”—Isaias 41:10, Bag-o nga Kalibotan nga Hubad.

 “Diri ka mahadluk, kay ako upud ha imo; ayaw kaholop, kay ako an imo Dios; ako magpaparig-on ha imo; oo, ako mabulig ha imo; oo akon ka aagangagangon pinaagi han too nga kamot han akon pagkamatadong.”—Isaias 41:10, An Baraan nga Kasuratan.

 Nagpapatapod hi Jehova a nga Dios ha iya maunungon nga mga magsiringba nga iya hira susuportaran, anoman nga problema an ira maieksperyensyahan.

 “Kaupod mo ako.” Gintatagan ni Jehova hin rason an iya mga magsiringba kon kay ano nga diri hira angay mahadlok—diri hira nag-uusahan. Tungod kay nakikita niya an ira mga pag-antos ngan namamati hiya han ira mga pag-ampo, baga-baga hin kaupod hiya nira.—Salmo 34:15; 1 Pedro 3:12.

 “Ako an imo Dios.” Ginpapakalma ni Jehova an iya mga magsiringba pinaagi ha pagpahinumdom ha ira nga hiya pa gihapon an ira Dios ngan ginkakarawat niya hira sugad nga iya mga magsiringba. Makakasiguro hira nga waray bisan ano nga kahimtang nga makakapugong ha Dios ha pagbulig ha ira.—Salmo 118:6; Roma 8:32; Hebreo 13:6.

 “Paririg-unon ko ikaw, oo, bubuligan ko ikaw, kakaptan ko ikaw hin maopay pinaagi han akon too nga kamot nga uyon ha katadongan.” Gin-uroutro ni Jehova an usa nga ideya ha tulo nga magkaiba nga paagi basi pabug-atan an pagkasigurado han iya bulig. Pinaagi hini nga mga pulong iginpapakita niya an iya bubuhaton kon an iya katawohan nanginginahanglan hin bulig.—Isaias 41:13.

 An nangunguna nga paagi nga ginpaparig-on ngan ginbubuligan han Dios an iya mga magsiringba amo an iya Pulong, an Biblia. (Josue 1:8; Hebreo 4:12) Pananglitan, an pulong han Dios naghahatag hin praktikal nga kinaadman ha mga naatubang hin mga pagsari, sugad han kapobrehan, sakit, o kamatyi hin hinigugma. (Proberbios 2:6, 7) Mahimo liwat gamiton han Dios an iya baraan nga espiritu, o aktibo nga pwersa, basi tagan an iya mga magsiringba hin ginkikinahanglan nga karig-on ha emosyon ngan hunahuna para diri madaog han mga problema.—Isaias 40:29; Lucas 11:13.

 Ini nga mga pulong nakaliaw ha matinumanon nga mga Judio nga ha urhi ginbihag ngadto ha Babilonya. Gintagna ni Jehova nga ha ikatarapos han pagkabihag han mga Judio, magkakaada hin mga sumat nga an kaaway maabot para bungkagon an nakapalibot nga mga nasud ngan tarhugon an Babilonya. (Isaias 41:2-4; 44:1-4) Bisan kon an Babilonya ngan an nakapalibot nga mga nasud mangungurog ha kahadlok tungod hito nga mga sumat, an mga Judio diri angay mabaraka, kay puproteksyonan hira ni Jehova. Tulo ka beses nga nagpatapod hiya hira ha pagsiring “ayaw kahadlok.” (Isaias 41:5, 6, 10, 13, 14).

 Bisan kon an mga pulong ni Jehova ha Isaias 41:10 siyahan nga iginhatag ha matinumanon nga mga Judio nga bihag ha Babilonya, gintipigan ni Jehova ini nga mga pulong para maliaw an ngatanan niya nga magsiringba. (Isaias 41:10; 40:8; Roma 15:4) Ginbubuligan niya hira yana, sugad la nga iya ginbuligan an iya mga surugoon ha naglabay nga panahon.