An Siyahan nga Surat ha mga Taga-Corinto 16:1-24
16 Yana mahitungod han pangulekta para ha mga baraan,+ mahimo niyo sundon an akon mga instruksyon ha mga kongregasyon ha Galacia.
2 Ha siyahan nga adlaw han kada semana, an tagsa ha iyo sadang maglaín hin maiaamot uyon ha iya maaakos, basi waray na pangulekta pag-abot ko.
3 Pero pagkada ko, susugoon ko an kalalakin-an nga iyo gin-unabi nga matataporan uyon ha iyo mga surat+ nga dad-on ngadto ha Jerusalem an iyo kinaburut-on nga regalo.
4 Kondi kon baga hin angayan nga kumadto liwat ako, makadto hira didto nga kaupod ko.
5 Pero makada ako ha iyo kon tikang na ako ha Macedonia, kay maagi ako ha Macedonia;+
6 ngan bangin magpabilin ako o magpalabay pa ngani han kathagkot dida ha iyo, basi updan ako niyo hin pipira ka distansya pagtikadto ko ha akon kakadtoan.
7 Kay diri ko karuyag makigkita ha iyo yana hin madaliay la, kay naglalaom ako nga makaupod kamo hin pipira ka panahon,+ kon itutugot ni Jehova.*
8 Pero magpapabilin ako didi ha Efeso+ tubtob ha Piyesta han Pentekostes,
9 kay gin-abrihan ha akon an daku nga purtahan ngadto ha buruhaton,+ pero damu an nakontra.
10 Yana kon umabot hi Timoteo,+ siguroha niyo nga waray hiya kahadlokan samtang kaupod niyo, kay nagbubuhat hiya han buruhaton ni Jehova,*+ pariho ha akon.
11 Salit waray bisan hin-o nga magminos ha iya. Palargaha niyo hiya nga mamurayawon, basi makakadi hiya ha akon, kay ginhuhulat ko hiya sugad man han kabugtoan.
12 Yana mahitungod kan Apolos+ nga aton bugto, ginhangyo ko gud hiya nga kumada ha iyo upod han kabugtoan. Waray pa hiya plano nga kumada yana, pero makada hiya kon may higayon na hiya.
13 Magpadayon kamo nga nagmamata,+ magmarig-on ha pagtoo,+ padayon nga magpakalalaki,*+ ngan magmakusog.+
14 Buhata nga may gugma an ngatanan niyo nga buruhaton.+
15 Yana ginsasagdonan ko kamo, mga kabugtoan: Maaram kamo nga an mga sulod-balay ni Estefanas amo an siyahan nga mga bunga ha Acaya ngan debotado nga nagsiserbi hira ha mga baraan.
16 Hinaot padayon nga magpasakop liwat kamo ha sugad nga mga tawo ngan ha ngatanan nga nakooperar ngan maduruto nga nagbubuhat.+
17 Pero nalilipay gud ako ha presensya nira Estefanas+ ngan Fortunato ngan Acaico, kay daku an ira naibulig ha akon han waray kamo.
18 Kay ginparig-on nira ako ngan kamo. Salit apresyara niyo an sugad nga kalalakin-an.
19 Nangungumusta ha iyo an mga kongregasyon ha Asia. Hira Aquila ngan Prisca sugad man an kongregasyon nga nagkakatirok ha ira balay+ kinasingkasing nga nangungumusta ha iyo sugad nga mga sumurunod han Ginoo.
20 Ginkukumusta kamo han ngatanan nga kabugtoan. Kumustaha niyo an usa kag usa pinaagi hin baraan nga harok.
21 Ako, hi Pablo, ako an nagsurat hini nga akon pangumusta.
22 Kon may bisan hin-o nga waray gugma ha Ginoo, maghikaraot hiya. O amon Ginoo, pakadi!
23 Hinaot makarawat niyo an diri matupngan nga pagkabuotan han Ginoo nga hi Jesus.
24 Hinaot an akon gugma makarawat niyo ngatanan nga kahiusa ni Kristo Jesus.
