An Ikaduha nga Surat ha mga Taga-Corinto 8:1-24
8 Yana, mga kabugtoan, karuyag namon nga hibaroan niyo an mahitungod han diri matupngan nga pagkabuotan han Dios nga iginhatag ha mga kongregasyon ha Macedonia.+
2 Samtang nakakaeksperyensya hin pag-antos ilarom han duro nga pagsari, nagpakita hira hin daku nga kalipay ngan hura* nga pagkamahinatagon, bisan pa han ira duro nga kapobrehan.
3 Kay naghatag hira uyon han ira maaakos,+ oo, ginpapamatud-an ko nga lahos pa ngani han ira maaakos,+
4 samtang kinaburut-on nga naghinangyo gud hira ha amon nga tagan hira hin pribilehiyo ha mahigugmaon nga paghatag, basi makigbahin ha ministeryo* ha pagbulig ha mga baraan.+
5 Ngan labaw pa ha amon ginlalaoman an ira ginbuhat, kay iginhatag nira siyahan an ira kalugaringon ha Ginoo ngan sugad man ha amon pinaagi han kaburut-on han Dios.
6 Salit gin-aghat namon hi Tito+ nga, sugad la nga hiya an nagtikang hini nga buruhaton dida ha iyo, hiya liwat an sadang magtapos ha pagpangulekta han iyo mahigugmaon nga hatag.
7 Pero sugad la nga hura kamo ha ngatanan nga butang, ha pagtoo ngan pulong ngan kahibaro ngan bug-os nga pangalimbasog ngan ha gugma namon ha iyo, hinaot magin hura liwat kamo hini nga mahigugmaon nga paghatag.+
8 Ginsisiring ko ini, diri basi sugoon kamo, kondi basi ipahibaro ha iyo an pangalimbasog han iba ngan basi sarihan an pagkatinuod han iyo gugma.
9 Kay maaram kamo han diri matupngan nga pagkabuotan han aton Ginoo nga hi Jesu-Kristo, nga bisan kon riko hiya, nagin pobre hiya para ha iyo,+ basi magin riko kamo pinaagi han iya kapobrehan.
10 Ngan mahitungod hini, ini an akon opinyon:+ Para ini ha iyo kaopayan, kay han naglabay nga tuig diri la kay gintikangan niyo an buruhaton kondi nagpakita liwat kamo hin hingyap nga buhaton ito.
11 Salit yana, taposa liwat niyo an iyo gintikangan pagbuhat, basi an iyo pagin andam ha pagbuhat matapos depende ha iyo mga katigayonan.
12 Kay kon an pagin andam aada nga daan, ginkakarawat gud ito depende ha gintatag-iya han usa ka tawo,+ diri depende ha diri gintatag-iya han usa ka tawo.
13 Kay diri ko karuyag nga magin masayon ito para ha iba, pero makuri para ha iyo;
14 kondi basi pinaagi han pagkasarahid, mapun-an han iyo sobra ha pagkayana an ira panginahanglan, basi mapun-an liwat han ira sobra an iyo kakulangan, basi magkaada pagkasarahid.
15 Sugad la han nahisurat: “An tawo nga nagtirok hin damu waray magkaada hin sobra, ngan an tawo nga nagtirok hin gutiay waray magkulang.”+
16 Salamat ha Dios ha pagbutang ha kasingkasing ni Tito han pariho nga sinsero nga kabaraka para ha iyo,+
17 kay ginkarawat gud niya an pagdasig, pero tungod kay disidido gud hiya, kinaburut-on nga makada hiya ha iyo.
18 Pero pauupdon namon ha iya an bugto nga gindadayaw ha ngatanan nga kongregasyon tungod han pagpasamwak han maopay nga sumat.
19 Diri la ito, ginpili liwat hiya han mga kongregasyon basi magin kaupod namon ha pagbiyahe samtang amon gin-aasikaso ini nga kinaburut-on nga regalo para ha kahimayaan han Ginoo ngan sugad nga pamatuod han amon pagin andam ha pagbulig.
20 Salit ginlilikyan namon nga an bisan hin-o may makita nga sayop ha amon mahitungod hinin kinaburut-on nga kontribusyon nga amon gin-aasikaso.+
21 Kay kami ‘tangkod nga nanginginano hini ngatanan, diri la ha pagkita ni Jehova,* kondi ha pagkita liwat han mga tawo.’+
22 Dugang pa, pauupdon liwat namon ha ira an aton bugto nga damu ka beses nga nasarihan namon ngan nakita nga maduruto ha damu nga butang, pero mas maduruto pa gud yana tungod han iya daku nga kompyansa ha iyo.
23 Kondi kon may pagruhaduha mahitungod kan Tito, hiya an akon kaupod-upod* ngan igkasi-magburuhat para ha iyo kaopayan; o kon may mga pagruhaduha mahitungod ha aton kabugtoan, mga apostol hira han mga kongregasyon ngan himaya han Kristo.
24 Salit ipakita niyo an pamatuod han iyo gugma ha ira,+ ngan ipakita ha mga kongregasyon kon kay ano nga iginhambog namon kamo.
