An Ikaduha nga Libro han mga Hadi 12:1-21
12 Ha ikapito ka tuig ni Jehu,+ hi Jehoas+ nagin hadi, ngan nagmando hiya hin 40 ka tuig ha Jerusalem. An ngaran han iya nanay amo hi Zibia nga taga-Beer-sheba.+
2 Padayon nga ginbuhat ni Jehoas an husto ha pagkita ni Jehova ha ngatanan nga adlaw nga gintutdoan hiya ni Jehoiada nga saserdote.
3 Pero waray pananggala an higtaas nga mga lugar,+ ngan an katawohan naghahalad la gihapon ngan nagpapaaso hin halad ha higtaas nga mga lugar.
4 Hi Jehoas nagsiring ha mga saserdote: “Kuhaa an ngatanan nga kwarta nga gindara ha balay ni Jehova para ha baraan nga mga halad,+ an buhis nga kinahanglan igbayad han kada tagsa,+ an kwarta nga iginhatag sugad nga ginbanabana nga kantidad han usa nga tawo,* ngan an ngatanan nga kwarta nga kinasingkasing nga gindara han tagsa nga tawo ngadto ha balay ni Jehova.+
5 An mga saserdote an personal nga makuha hito tikang ha mga nagdonar ha ira* ngan gagamiton ito ha pag-ayad han balay, bisan diin nga may makita nga guba.”*+
6 Ha ika-23 ka tuig ni Hadi Jehoas, waray pa maayad han mga saserdote an mga guba ha balay.+
7 Salit iginpatawag ni Hadi Jehoas hi Jehoiada+ nga saserdote ngan an iba pa nga mga saserdote ngan ginsidngan hira: “Kay ano nga diri pa niyo gin-aayad an mga guba han balay? Kon sugad, ayaw na kamo pagkuha hin kwarta tikang ha mga nagdudonar ha iyo labot la kon gagamiton ito ha pag-ayad han balay.”+
8 Inuyon an mga saserdote nga diri na magkuha hin kwarta tikang ha katawohan ngan diri na hira an may responsabilidad ha pag-ayad han balay.
9 Katapos, nagkuha hi Jehoiada nga saserdote hin kahon+ ngan ginbuhoan ito ha bawbaw ngan iginbutang ito ha sapit han halaran ha too nga dapit kon nasulod an usa nga tawo ha balay ni Jehova. Dida hito iginbubutang han mga saserdote nga parabantay han purtahan an ngatanan nga kwarta nga gindara ha balay ni Jehova.+
10 Ha kada panahon nga makita nira nga damu an sulod nga kwarta ha kahon, an sekretaryo han hadi ngan an hitaas nga saserdote napakadto ngan ginkukolekta* ngan gin-iihap an kwarta nga gindara ha balay ni Jehova.+
11 Ira iginhahatag an kwarta nga naihap ngadto ha mga ginpili ha pagdumara han buruhaton nga ginbubuhat ha balay ni Jehova. Ngan ira ito iginbabayad ha mga panday ngan ha mga magturukod nga nagtatrabaho ha balay ni Jehova,+
12 sugad man ha mga mason ngan ha mga paratabas hin bato. Nagpalit liwat hira hin mga kahoy ngan tinabas nga mga bato para ha pag-ayad han mga guba ha balay ni Jehova ngan gin-gamit nira an kwarta para ha ngatanan nga iba pa nga gastos ha pag-ayad han balay.
13 Pero an kwarta nga gindara ha balay ni Jehova waray gamita basi himoon nga mga planggana nga silber, mga panparong, mga yahong, mga trumpeta,+ o bisan ano nga klase hin garamiton nga bulawan o silber para ha balay ni Jehova.+
14 Iginhahatag la nira ito ha mga nagtatrabaho, ngan pinaagi hito ira gin-ayad an balay ni Jehova.
15 Diri na hira naghihimo hin pagkwenta ha mga tawo nga ira gintagan han kwarta basi ighatag ha mga trabahador, kay matataporan hira.+
16 Pero an kwarta nga halad tungod han pagin salaan+ ngan an kwarta nga halad tungod han sala waray dad-a ha balay ni Jehova; kanan mga saserdote ito.+
17 Hito nga panahon sinagka hi Hazael+ nga hadi han Sirya basi makig-away ha Gat,+ ngan iya ito ginsakop, katapos hito, nagdesisyon hiya nga atakehon an* Jerusalem.+
18 Tungod hito ginkuha ni Hadi Jehoas han Juda an ngatanan nga baraan nga halad nga ginbaraan han iya mga kaapoy-apoyan nga hira Jehosafat, Jehoram, ngan Ahazias, nga mga hadi han Juda, sugad man an iya kalugaringon nga baraan nga mga halad ngan an ngatanan nga bulawan nga makikita ha mga tiripigan hin bahandi ha balay ni Jehova ngan ha balay* han hadi, ngan iginpadara ito ngadto kan Hazael nga hadi han Sirya.+ Salit inatras hiya tikang ha Jerusalem.
19 Mahitungod han iba pa nga bahin han kasaysayan ni Jehoas, an ngatanan nga iya ginbuhat, diri ba iginsurat ito ha libro han kasaysayan han mga panahon han mga hadi han Juda?
20 Pero an iya mga surugoon inapi ha pakigkunsabo kontra ha iya+ ngan ginpatay hi Jehoas didto ha balay ha Bungtod,*+ ha dalan nga tipalugsad ngadto ha Sila.
21 An iya mga surugoon nga hira Jozacar nga anak nga lalaki ni Simeat ngan Jehozabad nga anak nga lalaki ni Somer amo an umatake ngan nagpatay ha iya.+ Ira iginlubong hiya kaupod han iya mga kaapoy-apoyan ha Syudad ni David, ngan an iya anak nga hi Amazias an nagin hadi kasaliwan niya.+
Mga footnote
^ O “kalag.”
^ O “ira mga kakilala.”
^ O “mga gutak.”
^ O “iginbubutang ha mga surudlan.” Lit., “ginbubutok.”
^ Lit., “igin-atubang ni Hazael an iya nawong basi sumagka kontra ha.”
^ O “palasyo.”
^ O “ha Bet-milo.”
