An Ikaduha nga Libro han mga Hadi 24:1-20
24 Ha mga adlaw ni Jehoiakim, gin-atake hiya ni Hadi Nabucodonosor+ han Babilonya, ngan hi Jehoiakim nagin surugoon niya ha sulod hin tulo ka tuig. Pero kinontra hiya ha iya ngan nagrebelde.
2 Katapos, ginpahinabo ni Jehova nga sulungon hiya hin grupo han mga tikasan nga mga Caldeo,+ mga Siryano, mga Moabita, ngan mga Ammonita. Padayon nga ginpahinabo niya nga sumulong hira ha Juda basi bungkagon ito, sumala ha pulong ni Jehova+ nga iya ginyakan pinaagi han iya mga surugoon nga mga propeta.
3 Sigurado nga tungod ito han sugo ni Jehova nga nahitabo ini ha Juda, basi wad-on hira ha iya paniplatan+ tungod han ngatanan nga sala nga ginbuhat ni Manases,+
4 ngan tungod liwat han inosente nga mga tawo nga iya ginpamatay,*+ kay iya ginpuno an Jerusalem hin dugo han inosente nga mga tawo* ngan hi Jehova waray maruyag pagpasaylo.+
5 Mahitungod han iba pa nga bahin han kasaysayan ni Jehoiakim, an ngatanan nga iya ginbuhat, diri ba iginsurat ito ha libro han kasaysayan han mga panahon han mga hadi han Juda?+
6 Katapos, hi Jehoiakim pinahuway kaupod han iya mga kaapoy-apoyan;+ ngan an iya anak nga hi Jehoiakin an nagin hadi kasaliwan niya.
7 Waray na gud gumawas utro an hadi han Ehipto ha iya tuna, kay ginkuha na han hadi han Babilonya an ngatanan nga gintatag-iya han hadi han Ehipto,+ tikang ha Walog* han Ehipto+ tubtob ha Salog Eufrates.+
8 Hi Jehoiakin+ 18 anyos han nagin hadi hiya, ngan nagmando hiya hin tulo ka bulan ha Jerusalem.+ An ngaran han iya nanay amo hi Nehusta nga anak ni Elnathan nga taga-Jerusalem.
9 Padayon nga ginbuhat niya an maraot ha pagkita ni Jehova, pariho han ngatanan nga ginbuhat han iya tatay.
10 Durante hito nga panahon, an mga surugoon ni Hadi Nabucodonosor han Babilonya sinulong ha Jerusalem, ngan ira ginpalibotan an syudad.+
11 Hi Hadi Nabucodonosor han Babilonya inabot ha syudad samtang ginpapalibotan ito han iya mga surugoon.
12 Hi Hadi Jehoiakin han Juda ginawas ngadto ha hadi han Babilonya,+ upod an iya nanay, an iya mga surugoon, an iya mga prinsipe, ngan an iya mga opisyal ha palasyo;+ ngan ginbihag hiya han hadi han Babilonya ha ikawalo ka tuig han iya paghadi.+
13 Katapos, iya ginpanguha tikang didto an ngatanan nga bahandi ha balay ni Jehova ngan an mga bahandi ha balay* han hadi.+ Iya gin-utod-utod an ngatanan nga garamiton nga bulawan nga ginhimo ni Solomon nga hadi han Israel ha templo ni Jehova.+ Nahitabo ini sugad han igintagna ni Jehova.
14 Iya igindistyero an bug-os nga Jerusalem, an ngatanan nga prinsipe,+ an ngatanan nga magkusog nga girriro, ngan an ngatanan nga eksperto nga parahimo ngan panday hin metal*+—igindistyero niya an 10,000 ka tawo. Waray bisan usa nga nahibilin gawas la han pinakapobre nga mga tawo han tuna.+
15 Salit igindistyero niya hi Jehoiakin+ ngadto ha Babilonya;+ gindara liwat niya an nanay han hadi, an mga asawa han hadi, an iya mga opisyal ha palasyo, ngan an prominente nga mga tawo han tuna, igindistyero hira tikang ha Jerusalem ngadto ha Babilonya.
16 Igindistyero liwat han hadi han Babilonya an ngatanan nga 7,000 nga girriro ngadto ha Babilonya, sugad man an 1,000 nga eksperto nga parahimo ngan mga panday hin metal,* hira ngatanan magkusog nga lalaki ngan ginbansay ha pakiggirra.
17 Ginhimo han hadi han Babilonya hi Matanias, nga batâ ni Jehoiakin,+ nga hadi kasaliwan niya ngan ginbalyoan an iya ngaran hin Zedekias.+
18 Hi Zedekias 21 anyos han nagin hadi hiya, ngan nagmando hiya hin 11 ka tuig ha Jerusalem. An ngaran han iya nanay amo hi Hamutal+ nga anak ni Jeremias nga taga-Libna.
19 Padayon nga ginbuhat niya an maraot ha pagkita ni Jehova, pariho han ngatanan nga ginbuhat ni Jehoiakim.+
20 Tungod han kasina ni Jehova nahitabo ini nga mga butang ha Jerusalem ngan ha Juda, tubtob nga ginpaiwas niya hira ha iya atubangan.+ Ngan hi Zedekias nagrebelde ha hadi han Babilonya.+
Mga footnote
^ Lit., “inosente nga dugo nga iya ginpaagay.”
^ Lit., “inosente nga dugo.”
^ O “palasyo.”
^ O posible nga “paratukod hin mga kuta.”
^ O posible nga “mga paratukod hin mga kuta.”
