Job 11:1-20
11 Hi Zopar+ nga Naamatita binaton:
2 “Diri ba babatunon ini ngatanan nga pulong,O magigin husto ba an usa nga tawo pinaagi han duro nga pagyinakan?*
3 Makakapahilom ba ha mga tawo an imo waray pulos nga panyakan?
Waray ba magsasaway ha imo tungod han imo nakakaminos nga mga pulong?+
4 Kay nasiring ka, ‘Putli an akon igintututdo,+Ngan malimpyo ako ha imo pagkita.’+
5 Kondi kon magyakan la unta an Dios
Ngan magbuka han iya mga im-im ngada ha imo!+
6 Iya isusumat ha imo an mga sekreto han kinaadman,Kay an praktikal nga kinaadman may-ada damu nga bahin.
Ngan masasantop mo nga ginkakalimtan han Dios an iba han imo mga sayop.
7 Imo ba mahibabaroan an higlarom nga mga butang han Dios
O mahibabaroan an ngatanan mahitungod* han Makagarahum-ha-ngatanan?
8 Mas hitaas ito kay han langit. Ano an imo mahihimo?
Mas hilarom ito kay han Lubnganan.* Ano an imo mahibabaroan?
9 Mas hilaba ito kay han tuna
Ngan mas haluag kay han dagat.
10 Kon lumabay hiya ngan magdakop hin tawo ngan magdara ha iya ha korte,Hin-o an makakaato ha iya?
11 Kay maaram hiya kon malimbong an mga tawo.
Kon nakikita niya an karaotan, diri ba hiya maghahatag hin atensyon?
12 Kondi an tawo nga maluya an kaulo dida la makakasabot
Kon an ihalas nga asno mag-anak hin tawo.*
13 Kon imo la unta ig-andam an imo kasingkasing
Ngan ig-unat an imo mga kamot ha pag-ampo ha iya.
14 Kon an imo kamot nagbubuhat hin sayop, ipahirayo ito,Ngan ayaw paukya ha imo mga tolda an pagkadiri-matadong.
15 Sugad nga resulta, maiaalsa mo an imo nawong tungod han kawaray-sayop;Makakatindog ka hin marig-on, nga waray ginkakahadlokan.
16 Sugad nga resulta, hingangalimtan mo an imo problema;Hinunumdoman mo ito nga sugad hin mga agos han tubig nga linabay ha imo.
17 An imo kinabuhi magigin mas malamrag kay han udto;Bisan an kasisidman hito magigin pariho han aga.
18 Magkakaada ka pagsarig tungod kay may paglaom,Ngan makita ka ha palibot ngan mahigda nga may kasigurohan.
19 Mahigda ka, nga waray bisan hin-o nga makakapahadlok ha imo,Ngan damu nga tawo an mangangalimbasog nga makarawat an imo pag-uyon.
20 Kondi an mga mata han magraot mahaharap;Ngan diri hira makakaagi hin lugar nga mapapalagiwan,Ngan an ira la paglaom amo an kamatayon.”*+
Mga footnote
^ O “magigin husto ba an hambog nga tawo?”
^ O “mahibabaroan an limitasyon.”
^ O “Kon an ihalas nga asno ig-anak sugad nga tawo.”
^ O “amo an pagkautod han gininhawa han kalag.”
