Mga Salmo 80:1-19
Para ha direktor; ha tono han “An mga Bukad nga Liryo.” Usa nga pahinumdom. Salmo ni Asap.+ Usa nga kanta.
80 O Paraataman han Israel, pamati,Ikaw nga naggigiya han Jose pariho hin panon.+
Ikaw nga nalingkod ha trono ha bawbaw* han mga kerubin,+Pagsanag.*
2 Ha atubangan ni Efraim ngan ni Benjamin ngan ni Manases,Ipakita an imo pagkagamhanan;+Pakadi ngan talwasa kami.+
3 O Dios, ipahiuli kami;+Pasanaga ha amon an imo nawong, basi kami matalwas.+
4 Jehova nga Dios han mga hugpo, tubtob san-o ka mangangalas* ha pag-ampo han imo katawohan?+
5 Ginpakaon mo hira hin mga luha sugad nga ira tinapay,Ngan ginpainom mo hira hin damu hinduro nga luha.
6 Ginpabay-an mo nga kontrahon kami han amon mga amyaw;An amon mga kaaway padayon nga nagmiminos ha amon tubtob han ira karuyag.+
7 O Dios han mga hugpo, ipahiuli kami;Pasanaga ha amon an imo nawong, basi kami matalwas.+
8 Imo ginpalarga ha Ehipto an tanom nga ubas.+
Imo ginpaiwas an mga nasud ngan igintanom ito.+
9 Naghawan ka hin lugar para hito,Ngan nanggamot ito ngan napuno an tuna.+
10 An kabukiran natabonan han lambong hito,Ngan an mga sedro han Dios natabonan han mga sanga hito.
11 An mga sanga hito inabot tubtob ha dagat,Ngan an mga saringsing hito ngadto ha Salog.*+
12 Kay ano nga imo ginrumpag an mga pader nga bato han urubasan,+Salit an ngatanan nga naagi nangunguha han bunga hito?+
13 Ginbubuwad ito han mga baboy ha kagurangan,Ngan ginkakaon ito han ihalas nga mga hayop ha tuna.+
14 O Dios han mga hugpo, alayon pagbalik.
Tamod tikang ha langit ngan kitaa!
Atamana ini nga tanom nga ubas,+
15 An tanom nga ubas nga imo igintanom pinaagi han imo too nga kamot,+Ngan kitaa an anak nga lalaki* nga imo ginpakusog para ha imo kalugaringon.+
16 Ginsunog ito ha kalayo,+ ngan ginpulod.
Napupoo hira ha imo pagsaway.*
17 Hinaot an imo kamot bumulig ha lalaki nga aada ha imo too nga kamot,Ha anak han tawo nga imo ginpakusog para ha imo kalugaringon.+
18 Katapos, diri kami mabaya ha imo.
Tipigi kami nga buhi, basi makatawag kami ha imo ngaran.
19 O Jehova nga Dios han mga hugpo, ipahiuli kami;Pasanaga ha amon an imo nawong, basi kami matalwas.+
Mga footnote
^ O posible nga “butnga.”
^ O “Ipakita an imo karanggat.”
^ Lit., “mag-aaso kontra.”
^ Karuyag sidngon, an Eufrates.
^ O “an sanga.”
^ Lit., “ha pagsaway han imo nawong.”
