Nagtubo hi Jesus ha Nazaret, usa nga gutiay ngan diri kilala nga syudad. Nahimumutang ito ha norte, ha bungturon nga distrito han Galilea, ha weste han daku nga danaw o linaw nga gintatawag nga Dagat han Galilea.

Han mga dos anyos hi Jesus, gindara hiya didto nira Jose ngan Maria tikang ha Ehipto. Baga hin hito nga panahon, hiya pa la an ira anak. Pero ha urhi, nagkaada hiya kabugtoan ha nanay—hira Santiago, Jose, Simon, ngan Judas. Nagkaanak liwat hira Jose ngan Maria hin mga babaye. Oo hi Jesus, may-ada diri maminos unom nga kamanghoran.

Syempre, may mga paryente liwat hi Jesus. Hinbaroan na naton an mahitungod kan Elizabeth ngan han iya anak nga hi Juan. Naukoy hi Juan ha sur, ha Judea, nga damu ka kilometro an kahirayo. Hi Salome nga bangin bugto ni Maria ngan dada ni Jesus, naukoy hirani ha Galilea. An iya bana hi Sebedeo. An ira duha nga anak nga hira Santiago ngan Juan, posible nga mga patod igsiyapa ni Jesus. Diri kita maaram kon nakaupod hira ni Jesus hin maiha samtang nagtutubo hira, pero ha urhi nagin duok hira nga magsarangkay, ngan nagin mga apostol ni Jesus.

Kinahanglan maduruto gud nga magtrabaho hi Jose basi masuportaran an iya nagtitikadaku nga pamilya. Panday hiya. Ginpadaku niya hi Jesus sugad hin iya kalugaringon nga anak, salit gintawag hi Jesus nga “an anak han panday.” (Mateo 13:55) Gintutdoan liwat ni Jose hi Jesus ha pagpanday, ngan nahibaro gud hiya. Ngani, ha urhi an mga tawo nagsiring mahitungod kan Jesus: “Ini an panday.”—Marcos 6:3.

An kinabuhi han pamilya ni Jose nakasentro ha pagsingba kan Jehova. Ha pagsunod ha Balaud han Dios, gintutdoan nira Jose ngan Maria an ira mga anak hin espirituwal nga mga instruksyon ‘kon nalingkod hira ha balay, kon naglalakat ha dalan, kon nahigda, ngan kon nabuhat.’ (Deuteronomio 6:6-9) May-ada sinagoga ha Nazaret. Salit, makakasiguro kita nga regular nga gin-uupod ni Jose an iya pamilya basi magsingba didto. Ha urhi, ginsiring nga “sugad han iya nabatasan ha adlaw han Sabbath,” hi Jesus napakadto ha sinagoga. (Lucas 4:16) Nalilipay liwat an ira pamilya ha regular nga pagbiyahe ngadto ha templo ni Jehova ha Jerusalem.