Kay ano nga malipayon an mga tawo ha retrato? Tungod kay natambong hira ha usa han amon mga asembleya. Pariho ha mga magsiringba ha Dios han naglabay nga ginsugo nga magkatirok hin tulo ka beses ha usa ka tuig, ginpapamulat gud namon an pagkatirok ha dagku nga grupo. (Deuteronomio 16:16) Kada tuig, may-ada kami tulo nga dagku nga katirok: duha nga usa-ka-adlaw nga mga sirkito nga asembleya, ngan tulo-ka-adlaw nga regional nga kombensyon. Ano an amon napapahimulosan tikang hini?

Napaparig-on an amon pagminagburugto sugad nga mga Kristiano. Pariho ha mga Israelita nga nalipay ha ‘tig-ob’ nga pagdayaw kan Jehova, nalilipay kami nga urosa nga singbahon hiya ha espesyal nga pagkatirok. (Salmo 26:12; 111:1) Hini nga mga katirok nakikilala ngan nakakaupod namon an amon mga igkasi-Saksi tikang ha iba nga kongregasyon o iba nga nasud pa ngani. Ha udto, urosa nga nangangaon kami ha lugar nga ginkakatirokan, salit nagigin mas makalilipay ini nga mga okasyon. (Buhat 2:42) Personal nga naieksperyensyahan namon dinhi an gugma nga nagbubugkos han ngatanan nga “kabugtoan” ha bug-os nga kalibotan.—1 Pedro 2:17.

Nabubuligan kami nga mag-uswag ha espirituwal. An mga Israelita nagpahimulos liwat ha ‘pakasabot han pulong’ han Kasuratan tungod kay iginsaysay ito ha ira. (Nehemia 8:8, 12) Ha pariho nga paagi, ginpapabilhan namon an Kasuratanhon nga mga pagsaysay nga amon nakakarawat ha mga asembleya. Ha bulig han makapainteres nga mga pahayag, simposyum, ngan mga pasundayag, nahibabaro kami kon paonan-o magkikinabuhi uyon ha kaburut-on han Dios. Nadadasig kami ha mga eksperyensya han mga naglampos ha pagkinabuhi sugad nga mga Kristiano bisan pa hinin makuri nga panahon. Ha regional nga mga kombensyon, may-ada mga drama nga nagpapakita han mga asoy ha Biblia ngan nagtututdo hin praktikal nga mga leksyon. Ha tagsa nga asembleya, ginbabawtismohan adton naruruyag ha pagdedikar han ira kinabuhi ha Dios.

• Kay ano nga makalilipay nga okasyon an mga asembleya?

• Ano an imo mapapahimulsan ha pagtambong ha asembleya?