An mga membro han pamilya han Bethel nagbuboluntaryo ha iba-iba nga departamento ha pag-ataman han pagsangyaw nga buruhaton ha usa nga nasud o sobra pa. An iba ha ira naghuhubad, nag-iimprinta hin mga magasin ngan mga libro, nag-iimpaki hin mga literatura, nabulig ha produksyon hin mga audio ngan video, o nag-aasikaso han iba pa nga buruhaton para ha rehiyon.

Usa nga Komite han Sanga nga Opisina an nag-oorganisar han buruhaton. Iginsasarig han Nagmamando nga Lawas an pagdumara han tagsa nga sanga nga opisina ha Komite han Sanga nga ginkukompwesto hin tulo o sobra pa nga kwalipikado nga tigurang. Iginpapahibaro han komite ha Nagmamando nga Lawas an pag-uswag han buruhaton ngan an bisan ano nga problema han nasud nga sakop han tagsa nga komite. Pinaagi hini, nakakagdesisyon an Nagmamando nga Lawas kon ano an paghihisgotan ha sunod nga mga publikasyon, ha mga katirok ngan asembleya. An mga representante han Nagmamando nga Lawas regular nga nabisita ha mga sanga nga opisina ngan nagtatagana hin giya ha mga Komite han Sanga may kalabotan ha pagdumara han toka hito. (Proberbios 11:14) Usa nga espesyal nga programa nga may pahayag han representante han headquarters an gin-oorganisar basi dasigon adton sakop han teritoryo han sanga nga opisina.

Nagsusuporta han lokal nga mga kongregasyon. An kwalipikado nga kabugtoan nga kalalakin-an ha sanga nga opisina an nag-aaproba han kaporma han bag-o nga mga kongregasyon. Hira gihap an nag-oorganisar han buruhaton han mga payunir, misyonero, ngan paramangno han sirkito ha teritoryo nga sakop han sanga nga opisina. An sanga nga opisina gihap an nag-oorganisar han mga asembleya ngan mga kombensyon, nag-aasikaso han konstruksyon han bag-o nga mga Kingdom Hall, ngan nagsisiguro nga naipapadara an mga literatura ha mga kongregasyon. An ngatanan nga ginbubuhat ha sanga nga opisina nabulig basi magin organisado ngan maglampos an pagsangyaw nga buruhaton.—1 Korinto 14:33, 40.

• Paonan-o ginbubuligan han Komite han Sanga an Nagmamando nga Lawas?

• Ano an ginhihimo ha sanga nga opisina?