Hi Isaac 40 anyos han nagin asawa niya hi Rebeca. Hinigugma gud niya hi Rebeca. Ha urhi, nagkaanak hira​—kambal nga lalaki.

An ngaran han magurang Esau, ngan an manghod Jacob. Karuyag ni Esau nga aadto hiya pirme ha gawas, ngan maopay hiya manakop hin hayop. Pero mas karuyag ni Jacob nga aada la hiya ha balay.

Hito nga panahon, mas daku nga parti han tuna ngan kwarta an nakakarawat han suhag nga lalaki kon mamatay an iya tatay. Gintatawag ito nga panurundon. Ha pamilya ni Isaac, kaupod han panurundon an pagkaada bahin ha mga saad ni Jehova kan Abraham. Balewaray la kan Esau ito nga mga saad, pero maaram hi Jacob nga importante gud ito.

Usa ka adlaw, kapoy nga inuli hi Esau tikang ha magkulop nga panakop hin hayop. Iya nahamot an marasa nga ginluluto ni Jacob ngan nagsiring: ‘Gutom ako! Tagi ako hiton pula nga utan!’ Hi Jacob nagsiring: ‘Sige, pero pagsaad anay nga ihahatag mo ha akon an imo panurundon.’ Hi Esau binaton: ‘Waray ako labot hito nga panurundon! Imo na ito. Pakaona la ako.’ Husto ba an ginbuhat ni Esau? Diri. Iginbalyo niya an presyoso gud nga butang ha usa la ka yahong nga utan.

Han lagas na hinduro hi Isaac, panahon na nga iya ihatag an bendisyon ha iya suhag. Pero ginbuligan ni Rebeca an manghod, hi Jacob, nga makuha an bendisyon. Han hinbaroan ito  ni Esau, nasina gud hiya ngan gin-ikaparatay an iya kambal. Basi maproteksyonan hi Jacob, ginsidngan hiya nira Isaac ngan Rebeca: ‘Lakat ngan didto la anay ha bugto han imo nanay nga hi Laban, tubtob nga mawara an kasina ni Esau.’ Namati hi Jacob, ngan pinalagiw hiya basi matalwas an iya kinabuhi.