LEKSYON 16
Ano an Ginbuhat ni Jesus han Nakanhi Hiya ha Tuna?
Damu an naghuhunahuna nga hi Jesus usa nga waray mahihimo nga minasus-an, maaramon nga propeta, o tawo nga hirani na mamatay. Pero may-ada pa ba kita mahibabaroan mahitungod ha iya pinaagi ha pag-usisa han iya kinabuhi dinhi ha tuna? Hini nga leksyon, uusisahon naton an pipira han pinakaimportante nga mga butang nga ginbuhat ni Jesus ngan kon paonan-o ito makakabulig ha imo.
1. Ano an pinakaimportante nga buruhaton ni Jesus?
An pinakaimportante nga buruhaton ni Jesus amo an ‘pagpasamwak han maopay nga sumat han Ginhadian han Dios.’ (Basaha an Lucas 4:43.) Iginsangyaw niya an maopay nga sumat nga an Dios mag-iestablisar hin ginhadian, o gobyerno, nga magsusulbad han ngatanan nga problema han katawohan. a Maduruto nga ginsumat ni Jesus ini nga maopay nga mensahe ha sulod hin tulo ngan tunga ka tuig.—Mateo 9:35.
2. Ano an katuyoan han mga milagro ni Jesus?
Gin-uunabi han Biblia an damu nga “gamhanan nga mga buhat, urusahon nga mga butang, ngan mga tigaman, nga ginbuhat han Dios pinaagi [kan Jesus].” (Buhat 2:22) Gintagan han Dios hi Jesus hin gahum basi kontrolon an panahon, pakaunon an yinukot nga tawo, tambalon an mga may sakit, ngan buhion pa ngani an mga patay. (Mateo 8:23-27; 14:15-21; Marcos 6:56; Lucas 7:11-17) Klaro nga iginpakita han mga milagro ni Jesus nga ginsugo hiya han Dios. Iginpakita liwat hito nga hi Jehova may gahum ha pagsulbad han ngatanan naton nga problema.
3. Ano an aton mahibabaroan ha paagi han pagkinabuhi ni Jesus?
Hi Jesus sinugot kan Jehova ha ngatanan nga sitwasyon. (Basaha an Juan 8:29.) Bisan pa han pagkontra, matinumanon nga ginbuhat ni Jesus an ginsugo ha iya han iya Amay tubtob ha iya kamatayon. Ginpamatud-an niya nga posible para ha mga tawo nga mag-alagad ha Dios bisan ha makuri nga mga kahimtang. Salit hi Jesus nagbilin hin “susbaranan basi sundon [naton] hin maopay an iya mga pitad.” —1 Pedro 2:21.
DUGANG NGA USISAHA
Usisaha kon paonan-o ni Jesus iginsangyaw an maopay nga sumat ngan kon paonan-o hiya naghimo hin mga milagro.
4. Hi Jesus nagsangyaw han maopay nga sumat
Hi Jesus nagbaktas hin ginatos ka kilometro ha matapotapo nga mga dalan basi isangyaw an maopay nga sumat ha pinakadamu nga tawo tubtob ha iya mahihimo. Basaha an Lucas 8:1, katapos, hisguti niyo ini nga mga pakiana:
-
An mga tawo la ba nga dinaop kan Jesus basi mamati ha iya an iya ginsangyawan?
-
Ano an ginhimo ni Jesus ha iya pangalimbasog nga mabilngan an mga tawo?
An Dios nagtagna nga an Mesias magsasangyaw han maopay nga sumat. Basaha an Isaias 61:1, 2, katapos, hisguti niyo ini nga mga pakiana:
-
Paonan-o natuman ni Jesus ini nga tagna?
-
Ha imo hunahuna, kinahanglan ba mabatian han mga tawo yana ini nga maopay nga sumat?
5. Hi Jesus nagtutdo hin mapulsanon nga mga kamatuoran
Labot la han pagsangyaw han maopay nga sumat mahitungod han Ginhadian han Dios, nagtutdo liwat hi Jesus hin praktikal nga mga leksyon. Usisaha an pipira nga ehemplo tikang ha iya kilala nga Sermon han Bukid. Basaha an Mateo 6:14, 34 ngan 7:12, katapos, hisguti niyo ini nga mga pakiana:
-
Ano nga praktikal nga mga sagdon an ginhatag ni Jesus dinhi hini nga mga bersikulo?
-
Ha imo hunahuna, ini ba nga mga sagdon makakabulig pa gihapon ha mga tawo yana?
6. Hi Jesus naghimo hin mga milagro
Hi Jehova naghatag hin gahum kan Jesus basi maghimo hin damu nga milagro. Basi makita an usa nga ehemplo, basaha an Marcos 5:25-34 o i-play an VIDEO. Katapos, hisguti niyo an masunod nga mga pakiana.
-
Ha video, ha ano kombinsido an may sakit nga babaye?
-
Ano an naruyagan mo gud hini nga milagro?
Basaha an Juan 5:36, katapos, hisguti niyo ini nga pakiana:
-
Ano an ‘ginpapamatud-an’ han mga milagro ni Jesus mahitungod ha iya?
Maaram ka ba?
Kadam-an han aton nahibabaroan mahitungod kan Jesus tikang ha upat nga libro han Biblia nga gintatawag nga mga Ebanghelyo—an Mateo, Marcos, Lucas, ngan Juan. An tagsa nga parasurat han Ebanghelyo naghisgot hin iba-iba nga detalye mahitungod kan Jesus. Ini ngatanan nga detalye naghahatag hin makaruruyag nga paghulagway han iya kinabuhi.
-
MATEO
Hiya an siyahan nga nagsurat han iya Ebanghelyo. Ginsusumat hito ha aton an damu nga katutdoan ni Jesus, labi na an igintutdo ni Jesus mahitungod ha Ginhadian han Dios.
-
MARCOS
Hiya an nagsurat han pinakahalipot nga Ebanghelyo. Puno ito hin makapainteres nga mga panhitabo.
-
LUCAS
Ginsusumatan kita niya kon ano kaimportante an pag-ampo ngan kon paonan-o gintratar ni Jesus an mga babaye.
-
JUAN
Ginsusumat niya ha aton an damu nga iginyakan ni Jesus ha iya duok nga kasangkayan ngan ha iba. Nabulig ini ha aton nga makilala an personalidad ni Jesus.
AN IBA NASIRING: “Hi Jesus usa nga maopay nga tawo, pero diri hiya an Mesias.”
-
Ano an imo masisiring?
SUMARYO
Hi Jesus nagsangyaw mahitungod han Ginhadian han Dios, naghimo hin mga milagro, ngan sinugot kan Jehova ha ngatanan nga sitwasyon.
Repaso
-
Ano an pinakaimportante nga buruhaton ni Jesus han nakanhi hiya ha tuna?
-
Ano an ginpapamatud-an han mga milagro ni Jesus?
-
Ano nga praktikal nga mga leksyon an igintutdo ni Jesus?
DUGANG NGA IMPORMASYON
Ano nga topiko an kasagaran nga gin-iistorya ni Jesus?
“Ginhadian han Dios—Kay Ano nga Importante Ito kan Jesus?” (An Barantayan, Oktubre 1, 2014)
Usisaha kon kay ano nga makakasiguro kita nga an mga milagro ni Jesus tinuod nga nahitabo.
“An mga Milagro ni Jesus—Ano an Imo Mahibabaroan?” (An Barantayan, Hulyo 15, 2004)
Basaha kon paonan-o nabag-o an kinabuhi han usa nga tawo tungod han ehemplo ni Jesus ha pagsakripisyo.
“An Akon La Kalugaringon an Akon Ginhunahuna” (An Barantayan, Oktubre 1, 2014)
Kitaa an importante nga mga ginbuhat ni Jesus ha iya ministeryo uyon ha pagkasunod-sunod han panhitabo.
a Ha Leksyon 31-33 mas detalyado nga hihisgotan an Ginhadian han Dios.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
