ANO daw la an magigin kahimtang han kinabuhi kon an bug-os nga nasud ngan an hadi hito nagsusunod kan Jehova sugad nga Soberano ngan nagtutuman han Iya mga balaud? An baton hito iginhulagway han 40 ka tuig nga pagmando ni Hadi Salomon.

Antes mamatay hi David, iya ginpili an iya anak nga hi Salomon nga sumaliwan ha iya. Ha usa nga inop, ginpahangyo han Dios hi Salomon han iya karuyag. Naghangyo hiya hin kinaadman ngan kahibaro basi makatadunganon ngan maaramon nga makaghukom. Nalipay hito hi Jehova ngan gintagan hiya hin kaaram ngan pagsabot. Ginsaaran liwat hiya ni Jehova hin karikohan, kadungganan, ngan hilawig nga kinabuhi kon magpabilin hiya nga masinugtanon.

Nagin kilala hi Salomon tungod han iya maaramon nga paghukom. Ha usa nga higayon, duha nga iroy an nag-aagaw hin minasus-an, an tagsa nag-aangkon nga iroy hito. Nagdesisyon hi Salomon nga tungaon ito ngan tagan hin tag-usa nga bahin an duha nga iroy. Inuyon an usa, kondi an tinuod nga iroy nakimalooy dayon nga ihatag na la an bata ha usa nga babaye. Hito nga takna, matin-aw nga nasantop ni Salomon nga an mapinairon nga babaye amo an iroy ngan iginhatag an bata ha iya. Waray pag-iha, hinbaroan ha bug-os nga Israel an mahitungod hini nga hudisyal nga desisyon, ngan nasantop han mga tawo nga an kinaadman ni Salomon tikang ha Dios.

Usa han pinakadaku nga nahimo ni Salomon amo an pagtukod han templo ni Jehova​—makatarag-ob nga istraktura ha Jerusalem nga magigin sentro han pagsingba ha Israel. Durante han inagurasyon hito, nag-ampo hi Salomon: “Kitaa, an langit ngan an langit han kalangitan diri makakapaigo ha imo; pagkadaku han kakulangan hini nga balay nga akon gintukod!”​—1 Hadi 8:27.

An kadungganan ni Salomon hinbaroan ha iba nga nasud, bisan tubtob ha Sheba, ha Arabia. Tungod hito, nagbiyahe an rayna han Sheba basi makita an himaya ngan karikohan ni Salomon ngan basi hibaroan an kahilarom han iya kinaadman. Gindayaw gud han rayna an kinaadman ni Salomon ngan an kauswagan han Israel, tungod hito iya gindayaw hi Jehova ha pagpili hin sugad kamaaramon nga hadi. Oo, pinaagi han bendisyon ni Jehova, an pagmando ni Salomon amo an pinakamainuswagon ngan pinakamamurayawon ha kasaysayan han kadaan nga Israel.

Makasurubo, napakyas hi Salomon nga magpadayon ha pagbuhat uyon ha kinaadman ni Jehova. Iya gintalapas an sugo han Dios ngan nangasawa hin ginatos nga kababayin-an, upod na an damu nga nagsisingba hin iba nga dios. Hinay-hinay nga iginpahirayo han iya mga asawa an iya kasingkasing kan Jehova, ngan nagsingba hiya hin mga dios-dios. Ginsidngan hiya ni Jehova nga may bahin han ginhadian nga kukuhaon ha iya. Usa la nga bahin an mabibilin ha iya pamilya, tungod ito han iginsaad han Dios ha iya amay nga hi David. Bisan kon waray magpabilin nga matinumanon hi Salomon kan Jehova, gintuman ni Jehova an iya saad kan David may kalabotan ha Ginhadian.

​—Iginbasar ha 1 Hadi kapitulo 1 tubtob 11; 2 Kronikas kapitulo 1 tubtob 9; Deuteronomio 17:17.