Hi Rebeca usa nga babaye nga nahigugma kan Jehova. An iya asawa hi Isaac. Nahigugma liwat hiya kan Jehova. Paonan-o nakilala ni Rebeca hi Isaac? Ano an ginhimo ni Rebeca nga nagpapakita nga karuyag niya mapalipay hi Jehova? Antes hito, kilalahon anay naton an iya asawa, hi Isaac.

Hira Abraham ngan Sara an mga kag-anak ni Isaac. Naukoy hira ha Canaan, usa nga lugar diin an mga tawo diri nagsisingba kan Jehova. Pero karuyag ni Abraham nga an magin asawa han iya anak nagsisingba kan Jehova. Salit ginsugo niya an iya surugoon nga posible nga hi Elieser nga mamiling hin maarasawa ni Isaac ha lugar han Haran, kay didto naukoy an pipira han mga paryente ni Abraham.

Nagbiyahe hi Elieser kaupod han iba pa nga surugoon ni Abraham. Hirayo gud an ira kakadtoan. Nagdara hira hin napulo nga kamelyo nga may karga nga mga pagkaon ngan regalo. Paonan-o mahibabaroan ni Elieser kon hin-o nga babaye an iya pipilion para kan Isaac? Han inabot ha Haran hi Elieser ngan an iba pa nga surugoon, umundang hira ha usa nga atabay kay maaram hi Elieser nga makada an mga tawo basi mag-alog. Nag-ampo hiya kan Jehova ngan nagsiring: ‘Kon mag-aro ako hin tubig ha usa nga batan-on nga daraga ngan tagan ako niya pati an akon mga kamelyo, ito an babaye nga imo ginpili.’

Katapos, an batan-on nga hi Rebeca kumada ha atabay. An Biblia nasiring nga mahusay gud hiya. Hi Elieser nangaro hin tubig nga  maiinom, ngan hi Rebeca nagsiring: ‘Sige, adi in tubig, ngan maalog liwat ako para ha imo mga kamelyo.’ Hunahunaa la! Damu nga tubig an gin-iinom han nauuhaw nga mga kamelyo, salit kinahanglan magbinalikbalik hi Rebeca pag-alog. Nakikita mo ba ha retrato kon mationan-o kakuri an iya ginhihimo?— Nasurprisa gud hi Elieser kon paonan-o ginbaton ni Jehova an iya pag-ampo.

Gintagan ni Elieser hi Rebeca hin damu nga mag-opay nga regalo. Gin-imbitar ni Rebeca hi Elieser ngan an iya mga kaupod ngadto ha ira balay. Igin-istorya ni Elieser kon kay ano nga ginpakada hiya ni Abraham ngan kon paonan-o ginbaton ni Jehova an iya pag-ampo. An pamilya ni Rebeca naruyag nga magin asawa hiya ni Isaac.

Pero para ha imo, karuyag ba liwat ni Rebeca nga magin asawa hi Isaac?— Maaram hi Rebeca nga hi Jehova an nagpadara kan Elieser. Salit han ginpakianhan hiya han iya pamilya kon karuyag niya umupod ha Canaan ngan magin asawa ni Isaac, nagsiring hiya: ‘Oo, karuyag ko umupod.’ Salit umupod hiya kan Elieser pagbalik ha Canaan. Pag-abot didto, nagin asawa hiya ni Isaac.

Tungod kay ginsunod ni Rebeca an karuyag ni Jehova, ginbendisyonan hiya ni Jehova. Paglabay hin damu ka tuig, nagin kaapoy-apoyan hiya ni Jesus! Kon ginpapalipay mo hi Jehova pariho kan Rebeca, bibendisyonan ka liwat niya.