May nagsumat na ba ha imo hin sekreto?— * An Biblia nagsusumat hin espesyal nga sekreto nga gintatawag nga “an sagrado nga tinago.” Sagrado ito tungod kay tikang ito ha Dios. Ngan tinago ito o sekreto tungod kay diri maaram hito an mga tawo. Bisan an mga anghel karuyag gud nga mahibaro pa mahitungod hito. Karuyag mo ba hibaroan kon ano ito nga sekreto?—

Maiha na nga panahon an naglabay, ginhimo han Dios an una nga lalaki ngan babaye. Adan ngan Eva an ira ngaran. Gintagan hira han Dios hin maopay nga urukyan nga gintatawag nga hardin han Eden. Kon sumunod hira Adan ngan Eva ha sugo han Dios, nahimo unta nira ngan han ira mga anak nga paraiso an bug-os nga kalibotan pariho han hardin han Eden. Ngan nabuhi unta hira ha Paraiso ha waray kataposan. Pero nahinunumdoman mo ba kon ano an ginbuhat nira Adan ngan Eva?—

Hira Adan ngan Eva waray sumunod ha sugo han Dios, salit diri paraiso an aton gin-uukyan yana. Pero nagsiring an Dios nga hihimoon niya nga makaruruyag an bug-os nga kalibotan, ngan an ngatanan mabubuhi ha waray kataposan ngan magigin malipayon. Ano an bubuhaton han Dios basi matuman ito? Ha sulod hin damu ka tuig, an mga tawo diri maaram hito. Usa ito nga sekreto.

Han nakanhi hi Jesus ha tuna, damu an iya igintutdo ha mga tawo mahitungod hito nga sekreto. Nagsiring hiya nga mahitungod ito han Ginhadian han Dios. Gintutdoan ni Jesus an mga tawo nga ig-ampo nga kumanhi ito nga Ginhadian, kay pinaagi hito nga Ginhadian magigin makaruruyag nga paraiso an kalibotan.

Nalilipay ka ba nga nahibaroan mo ini nga sekreto?— Hinumdumi nga an mga tawo la nga nasunod ha sugo ni Jehova an maukoy ha Paraiso. An Biblia may-ada damu nga istorya mahitungod ha kalalakin-an ngan kababayin-an nga sumunod ha sugo ni Jehova. Karuyag mo ba mahibaro mahitungod ha ira?— Aton hibaroan kon hin-o an pipira ha ira ngan kon ano an angay naton buhaton basi magin pariho ha ira.