Nagdaku ako ha Puerto Limón, usa nga syudad ha este nga baybayon han Costa Rica. Walo kami nga magburugto, ngan ako an ikapito. Namatay hi Tatay han otso anyos ako, salit hi Nanay la an nagpadaku ha amon.

Parti han akon kinabuhi an baseball. Mahilig na ako hito tikang pa han akon kabata. Han tin-edyer ako, umapi ako ha usa nga team han diri propesyonal nga mga atleta. Samtang kaapi ako hito han mga sobra 20 anyos ako, may nagrekrut ha akon nga mag-uyag para ha usa nga team hin propesyonal nga mga atleta ha Nicaragua. Kondi diri ko karuyag umukoy didto kay hito nga panahon masakiton hi Nanay ngan ako an nag-aataman ha iya. Salit waray ko karawata an tanyag. Waray pag-iha, ginrekrut na liwat ako para ha national baseball team han Costa Rica, nga ginkukompwesto han pinili nga mga amateur league player. Hini nga higayon, ginkarawat ko ito. Kaapi ako ha team han nasud tikang han 1949 tubtob 1952, ngan nag-uyag ako hin sunod-sunod ha Cuba, Mexico, ngan Nicaragua. Baseman ako ngan makarit ako hito, nakauyag pa ngani ako hin 17 nga uyag nga waray bisan usa nga sayop. Sugad hin nalukso an akon kasingkasing kon nababatian ko nga ginsisinggit an akon ngaran!

Makasurubo, imoral an akon pagkinabuhi hito nga panahon. Bisan kon usa la an akon uyab, may-ada ako pirme iba nga mga babaye. Parainom liwat ako. Usa ka adlaw sobra an akon kahubog nga kinabuwasan, waray ako mahinumdom kon paonan-o ako nakauli! Dugang pa, hilig ko liwat an huygo ngan loterya.

Samtang ito an akon pagkinabuhi, nagin Saksi ni Jehova hi Nanay. Nangalimbasog hiya nga makuha an akon interes ha iya gintotoohan, pero waray hiya maglampos ha siyahan kay nakasentro an akon hunahuna ha isport. Diri ngani ako naabat hin gutom kon nagti-training kami! Uyag la an akon ginhihinunahuna. Hinigugma ko an baseball labaw ha bisan ano!

Kondi han 29 anyos ako, naaksidente ako samtang nag-uuyag. Han makarekober ako, binaya na ako ha pagin propesyonal  nga atleta. Kondi, nakigbahin la gihap ako ha baseball pinaagi ha pag-train han mga atleta han usa nga amateur league team ha may amon lugar.

Han 1957, ginkarawat ko an imbitasyon nga tumambong ha kombensyon han mga Saksi ni Jehova ha istadyum diin nag-uyag ako hin baseball. Didto, nakita ko an kaibahan han matinalahuron nga panggawi han mga Saksi ngan han masamok nga pamatasan han mga magkirita han baseball. An akon nakita nag-aghat ha akon nga mag-aram han Biblia kaupod nira ngan tumambong ha ira mga katirok ha kongregasyon.

Naimpres ako ha damu nga katutdoan han Biblia nga akon hinbaroan. Pananglitan, igintagna ni Jesus nga ha kataposan nga mga adlaw, ipapasamwak han iya mga sumurunod an maopay nga sumat han Ginhadian han Dios ha bug-os nga kalibotan. (Mateo 24:14) Hinbaroan ko liwat nga ginbubuhat han tinuod nga mga Kristiano an ira ministeryo diri basi makakwarta. Hi Jesus nagsiring: “Ginkarawat niyo nga waray bayad, ihatag nga waray bayad.”—Mateo 10:8.

Samtang gin-aadman ko an Biblia, gintanding ko an ginsisiring hito ha akon nakikita ha mga Saksi. Naruyagan ko an ira pangalimbasog nga ipasamwak an maopay nga sumat ha bug-os nga kalibotan. Nakita ko ha ira an pagin mahinatagon nga iginsugo ni Jesus ha mga Kristiano. Salit han nabasa ko ha Marcos 10:21 an imbitasyon ni Jesus nga “Kadi, sunod ha akon,” ginhingyap ko nga magin usa nga Saksi.

Kondi nag-iha anay antes ako bug-os nga magbag-o. Pananglitan, ha sulod hin damu ka tuig, gintatayaan ko kada semana an akon “swerte” nga numero. Kondi hinbaroan ko ha Biblia nga ginkakangalasan han Dios an magsiringba han “kadiyosan han buynas” ngan an mga hakog. (Isaias 65:11; Colosas 3:5; Maupay nga Sumat) Salit nagdesisyon ako nga umundang paghuygo. Kondi han siyahan nga Domingo han akon pag-undang, nagdaog an akon “swerte” nga numero! Gintinawaan ako kay waray ako tumaya hito nga semana, ngan ginpinirit nga tumaya utro, kondi waray ko ito buhata. Waray na gud ako maghuygo.

An usa pa nga pagsari ha akon “bag-o nga personalidad” nahitabo ha adlaw mismo han akon bawtismo ha kombensyon han mga Saksi ni Jehova. (Efeso 4:24) Han inuli ako ha akon inuukyan nga hotel hito nga gab-i, naabtan ko an akon uyab hadto nga naghihinulat ha gawas han akon kwarto. Hiya nagsiring: “Tana, Sammy, pag-enjoy anay kita!” Pero binaton dayon ako, “Diri!” Ginpahinumdoman ko hiya nga nagkikinabuhi na ako uyon ha mga suruklan han Biblia ha moral. (1 Corinto 6:18) “Ano?” diri makatoo nga nagsiring hiya. Katapos, iya ginminos an ginsisiring han Biblia mahitungod ha seksuwal nga imoralidad ngan ginpirit ako nga magbalikay kami. Kondi, sinulod ako ha akon kwarto ngan gintrangkahan ko an purtahan. Yana, malipayon ako nga makakasiring nga tikang han nagin Saksi ako han 1958, matinumanon nga nagkinabuhi ako uyon ha mga pagbag-o nga akon ginhimo.

Tungod han mga kapulsanan nga akon nakarawat ha pagsunod ha giya han Biblia, sugad hin makakagsurat ako hin libro! An pipira hito nga kapulsanan amo an pagkaada damu nga tinuod nga sangkay, may katuyoan nga kinabuhi, ngan tinuod nga kalipay.

Mahilig la gihap ako ha baseball, pero ginbag-o ko na an akon mga prinsipyo. Ha baseball nagin sikat ngan nagin riko ako, pero waray ito mag-iha. Kondi an akon relasyon ha Dios ngan ha organisasyon diin bahin ako magpapadayon ha waray kataposan. An Biblia nasiring: “An kalibotan mawawara pati an mga hingyap hito, pero hiya nga nagbubuhat han kaburut-on han Dios magpapadayon ha waray kataposan.” (1 Juan 2:17) Yana hinigugma ko hi Jehova ngan an iya katawohan labaw ha bisan ano!