Gintagan han Dios an mga tawo hin naiiba nga regalo​—an abilidad nga makigkomunikar ha iya ngan magpahayag han ira inaabat pinaagi ha pag-ampo. Hi propeta David nag-ampo: “O Parapamati han pag-ampo, ha imo madaop an ngatanan nga klase hin tawo.” (Salmo 65:2) Pero paonan-o kita mag-aampo basi pamatian ngan bendisyonan kita han Dios?

An imo pag-ampo naghahatag ha imo hin higayon nga maisumat ha Dios an ngatanan nga aada ha imo kasingkasing, o an imo tinuod nga inaabat. (Salmo 62:8) Ginpapamatian gud han Makagarahum-ha-ngatanan an kinasingkasing nga mga pag-ampo.

Bisan kon damu an titulo han Dios, usa la an iya ngaran. “Ako hi Jehova. Ito an akon ngaran.” (Isaias 42:8) An ngaran nga Jehova makikita hin mga 7,000 ka beses ha Baraan nga Kasuratan. Damu nga propeta an gumamit han ngaran han Dios ha ira pag-ampo. Hi Abraham nagsiring: “Jehova, alayon . . . tuguti ako nga padayon nga magyakan [ha imo].” (Genesis 18:30) Kon nag-aampo kita, kinahanglan liwat naton gamiton an ngaran han Dios nga Jehova.

Nasasabtan han Dios an aton panhunahuna ngan inaabat anoman an aton yinaknan. An iya Pulong nagpapasarig ha aton: “An Dios waray pinaurog, kondi ha tagsa nga nasud an tawo nga may kahadlok ha iya ngan nagbubuhat han husto ginkakarawat niya.”​—Buhat 10:34, 35.

Pero basi bendisyonan han Dios, diri igo an basta la pag-ampo. Ha masunod nga mga artikulo, hihisgotan naton kon ano pa an kinahanglan naton buhaton.