HI Sarah umundang anay ha iya pagtrabaho ngan nangunat ngan nagkita ha hirayo. Ilarom han iya pagdumara, an mga surugoon malipayon ngan maduruto nga nagtatrabaho. Ngan ginbuhat liwat ni Sarah an iya bahin. Handurawa hiya nga nagmumuromasahe han iya mga kamot basi mawara an kakapoy hito. Bangin sagipo hiya ha pagtangkop hin buho han tolda han ira gin-uukyan. An madakmol nga tela nga hinimo tikang ha barahibo han kanding linubad na kay pipira ka tuig na ito nga nasisirakan ngan nauuranan, ngan nagpapahinumdom ito kan Sarah nga maiha na hira naukoy ha tolda. Madagmit lumabay an kakurulpon, ngan tikatunod na an adlaw. Han aga, nakita niya hi Abraham * nga nabaya, ngan yana nagkikinita hiya ha pariho nga direksyon, naglalaom. Han nakikita na niya an hulagway han iya bana tikang ha hirayo, nakita an kalipay ha iya mahusay nga bayhon.

Usa ka dekada na an naglabay tikang han ginpangunahan ni Abraham an iya daku nga pamilya pagtabok ha Salog Euprates tipakadto ha Canaan. Ginsuportaran ni Sarah an iya bana hini nga pagbiyahe ngadto ha lugar nga diri nira hinbabaroan, kay maaram hiya nga may importante nga papel hi Abraham ha katuyoan ni Jehova ha pagkaada nalilipayan gud nga binhi ngan usa nga nasud. Kondi ano an papel ni Sarah? Baog hiya ngan 75 anyos na. Bangin nagpakiana hiya, ‘Paonan-o matutuman an saad ni Jehova kan Abraham samtang ako an iya asawa?’ Salit natural la nga mabaraka hiya, o mawarayan pa ngani hin pasensya.

Kita liwat bangin maghunahuna usahay kon san-o matutuman an mga saad han Dios. Usahay nawawad-an kita hin pasensya, labi na kon ginhihingyap gud naton an aton ginpapamulat. Ano an aton mahibabaroan tikang ha pagtoo ni Sarah?

Kababalik pa la han pamilya tikang ha Ehipto. (Genesis 13:1-4) Nagkampo hira ha kabungtoran ha este han Betel, o Lus, sugad han tawag hito han mga taga-Canaan. Tikang hinin hitaas nga lugar, nakikita ni Sarah an kadak-an han Tuna nga Iginsaad. May mga lugar ito para ha mga Canaanita ngan mga kalsada nga tipakadto ha higrayo nga lugar. Pero waray makakapariho ha lugar nga iya gindak-an. Nagdaku hiya ha Ur, usa nga syudad ha Mesopotamia nga 1,900 ka kilometro an kahirayo. Didto, iya ginbayaan an iya mga paryente, an pagin kombinyente han mainuswagon nga syudad nga may merkado ngan paralitan, ngan an ira komportable nga balay nga may atop ngan bungbong ngan bangin may sistema han tubig! Kondi kon aton ginhuhunahuna nga masurub-on hi Sarah nga nagkikinita ha este ngan naghahandom han kaopayan han iya natawohan nga tuna, diri naton kilala ini nga babaye nga may kahadlok ha Dios.

Tagda an ginpasurat han Dios kan apostol Pablo paglabay hin mga 2,000 ka tuig. May kalabotan ha pagtoo nira Sarah ngan Abraham, hiya nagsiring: “Kon padayon nga gindinumdom nira an lugar nga ira ginbayaan, may oportunidad unta hira nga bumalik.” (Hebreo 11:8, 11, 15) Waray gud handuma ni Abraham  o ni Sarah an naglabay. Kay kon ito an ira ginhinunahuna, bangin binalik hira. Kondi didto ha Ur, diri nira makakarawat an maopay nga pribilehiyo nga igintatanyag ni Jehova. Ngan sigurado nga mapapara hira ha panumdoman han tawo, imbes nga magin susbaranan han pagtoo nga nakabantad ha minilyon.

Imbes nga handumon an naglabay, nagpokus hi Sarah ha tidaraon. Padayon hiya nga nagsuporta ha iya bana ha ira paglakaton, nagbulig ha pagdismantol han mga tolda, ha pagbalhin han mga hayop, ngan ha pagtukod utro han ira urukyan. Nag-ilob hiya hin kakurian ngan pagbag-o. Gin-utro ni Jehova an iya saad kan Abraham, pero waray la gihap maunabi hi Sarah!—Genesis 13:14-17; 15:5-7.

Inabot an takna nga nagdesisyon hi Sarah nga isumat kan Abraham an iya nahunahuna nga plano. Handurawa an iya nawong samtang hiya nasiring: “Kitaa niyan, hi Jehova nagpogong ha akon paganak.” Katapos ginhangyo niya an iya bana nga magkaada anak ha iya surugoon nga babaye nga hi Hagar. Nahahanduraw mo ba an kasakit ni Sarah ha paghangyo hin sugad ha iya bana? Bangin waray maghangyo hin sugad hito yana, pero hadto, komon la ha lalaki nga magkaada ikaduha nga asawa, o kerida, basi magkaada manurunod. * Posible ba nga nahunahuna ni Sarah nga hini nga paagi matutuman an katuyoan han Dios nga magkaada usa nga nasud pinaagi kan Abraham? Ha anoman nga kahimtang, andam hiya ha pagsakripisyo. Ano an reaksyon ni Abraham? An Biblia nasiring nga hiya “nanmati han tingug ni [Sarah].”—Genesis 16:1-3.

Iginpapakita ba han Biblia nga an Dios an nag-aghat kan Sarah ha paghangyo hin sugad? Diri. Lugod, an iya suhestyon nagpapakita hin tawhanon nga panhunahuna. Naghunahuna hiya nga an Dios an rason han iya problema, ngan waray niya mahanduraw nga may iba nga solusyon an Dios. An solusyon ni Sarah puydi maghatag ha iya hin kasakit. Bisan pa hito, an iya suhestyon nagpapakita nga diri kalugaringon la niya an iya gintatagad. Ha kalibotan diin an mga tawo agsob nga personal la an ginhuhunahuna, diri ba darayawon an iya pagin diri makikalugaringon? Kon gin-uuna naton an katuyoan han Dios imbes an aton karuyag, ginsusubad naton an pagtoo ni Sarah.

Waray pag-iha, nagburod hi Hagar. Tungod kay bangin naghunahuna hi Hagar nga mas importante na hiya kay ha kan Sarah kay nagburod hiya, iya gintamay an iya agaron. Daku gud ito nga kasakit ha baog nga hi Sarah! Ha pagtugot ni Abraham ngan ha suporta han Dios, ginsaway ni Sarah hi Hagar, kondi waray ito idetalye ha Biblia. Hi Hagar nag-anak hin lalaki, hi Ismael, ngan katapos linabay an mga tuig.  (Genesis 16:4-9, 16) An sunod nga rekord nag-uunabi hin mensahe tikang kan Jehova. Hito nga panahon, 89 anyos na hi Sarah ngan 99 anyos an iya bana. Ngan urusahon gud nga mensahe an ira nakarawat!

Nagsaad utro hi Jehova ha Iya sangkay nga hi Abraham nga Iya papadamuon an iya tulin. Dugang pa, ginsaliwnan han Dios an iya ngaran. Tubtob hito nga takna, ginkikilala hiya nga Abram. Pero ginsaliwnan ni Jehova an iya ngaran hin Abraham, nga nangangahulogan hin “Amay han Damu nga Tawo.” Ngan ha siyahan nga higayon, iginpakita ni Jehova kon ano an papel ni Sarah. Ginsaliwnan ni Jehova an iya ngaran nga Sarai, nga posible nangangahulogan hin “Makilantugion,” hin Sarah, an ngaran nga pamilyar ha aton. Ano an kahulogan han Sarah? “Prinsesa”! Kay ano nga ito an ginpili ni Jehova para hinin hinigugma nga babaye? Hiya nagsiring: “Ako magbibendisyon ha iya, labot pa ako mahatag ha imo hin anak nga lalaki tikang ha iya; oo, ako magbibendisyon ha iya, ngan hiya magigin iroy hin mga nasud; mga hadi han mga tawo matikang ha iya.”—Genesis 17:5, 15, 16.

An saad ni Jehova ha paghatag hin tulin nga magbibendisyon ha tanan nga nasud matutuman pinaagi han anak ni Sarah! An ngaran nga ginpili han Dios para hini nga bata nga hi Isaac nangangahulogan hin “Pagtawa.” Han siyahan nga hinbaroan ni Abraham an katuyoan ni Jehova ha pagbendisyon kan Sarah hin anak, hiya “kinolob, ngan nahakatawa.” (Genesis 17:17) Nahipausa hiya ngan nalipay gud. (Roma 4:19, 20) Kumusta man hi Sarah?

Waray pag-iha katapos hito, tulo nga estranghero nga lalaki an binisita ha tolda ni Abraham. Masirak hadto, pero ginios dayon inin lagas na nga mag-asawa basi abiabihon hira. Hi Abraham nagsiring kan Sarah: “Pagandam hin kadagmitan tolo ka takus nga harina nga fino, pagmasa, ngan paghimo hin mga tinapay.” Hadto, matrabaho an pag-abiabi hin bisita. Waray pabay-i ni Abraham nga an iya asawa la an maghikay, nagdagmit hiya pag-ihaw hin nati nga baka ngan nag-andam hin dugang nga pagkaon ngan irimnon. (Genesis 18:1-8) Ito nga mga “lalaki” mga anghel ngay-an ni Jehova! Posible nga ini nga panhitabo an nahunahuna ni apostol Pablo han nagsurat hiya: “Ayaw hingalimot ha pagin maabiabihon, kay ha pagbuhat hito an iba diri maaram nga mga anghel na ngay-an an ira gin-aabiabi.” (Hebreo 13:2) Masusubad mo ba an pagin maabiabihon nira Abraham ngan Sarah?

Han gin-utro han mga anghel kan Abraham an saad han Dios nga magkakaada anak hi Sarah, namamati hi Sarah didto ha sulod han tolda. An ideya nga magkakaanak pa hiya bisan kon lagas na baga hin pataraw-an para ha iya; waray hiya makapugong ha pagtawa ngan nagsiring ha iya kalugaringon: “Kataliwan ko kalagas magkakaada pa ako kalipay, nga an akon bana lagas na man?” Katapos ginsaway hiya han anghel pinaagi hin prangka nga pakiana: “Mayada ba bagay nga diri mahihimo ni Jehova?” Hi Sarah nahadlok ngan nangatadongan, reaksyon nga natural la ha tawo. Hiya nagsiring: “Ako waray mahakatawa.” An anghel binaton: “Ikaw nahakatawa gud.”—Genesis 18:9-15.

Ebidensya ba han kawaray-pagtoo an pagtawa ni Sarah? Diri gud. An Biblia nasiring: “Tungod han pagtoo ni Sarah, nakakarawat hiya hin gahum nga magburod, bisan han lagas na hiya, kay ginhunahuna niya nga matinumanon Hiya nga nagsaad.” (Hebreo 11:11) Kilala ni Sarah hi Jehova; maaram hiya nga matutuman han Dios an tanan Niya nga saad. Hin-o ba an diri nagkikinahanglan hin sugad nga pagtoo? Importante nga kilalahon naton an Dios nga iginpapakilala han Biblia. Kon bubuhaton naton ito, makikita naton nga husto hi Sarah ha pagkaada sugad nga pagtoo. Matinumanon gud hi Jehova ngan pirme nagtutuman han iya saad—usahay ginbubuhat niya ito ha paagi nga diri ginlalaoman o pataraw-an!

Ha edad nga 90, naeksperyensyahan ni Sarah an iya gud ginhingyap sugad nga adulto. Nagkaada hiya anak bisan kon 100 anyos na an iya hinigugma nga bana! Ginngaranan ni Abraham an bata hin Isaac, o “Pagtawa,” sugad han siring han Dios. Bangin mahanduraw  naton hi Sarah nga maluya pa kondi nahiyom samtang nasiring: “An Dios nagpatawa ha akon; an tagsa nga makadungug mahikakatawa upud ha akon.” (Genesis 21:6) Inin milagroso nga regalo tikang kan Jehova sigurado nga nagpalipay ha iya tubtob ha kataposan han iya kinabuhi. Kondi, nagdara liwat ito ha iya hin daku nga responsabilidad.

Han singko anyos hi Isaac, nag-andam an pamilya hin panagtawo basi saurugon an paglutas ha iya. Pero nagkaada problema. Mababasa naton nga pirme ‘nakikita’ ni Sarah an padayon nga panraugdaog kan Isaac han 19 anyos nga anak ni Hagar nga hi Ismael. Diri ini binata-bata nga pagsinunlog. Ha urhi, gin-giyahan hi apostol Pablo ha pagtawag han panggawi ni Ismael sugad nga pagtimaraot. Nakita ni Sarah nga seryoso ini nga tarhog ha iya anak. Maaram hi Sarah nga diri la niya basta anak hi Isaac, kondi may importante ito nga papel ha katuyoan ni Jehova. Salit maisugon ngan prangka nga nakiistorya hiya kan Abraham. Naghangyo hiya nga paiwason hira Hagar ngan Ismael.—Genesis 21:8-10; Galacia 4:22, 23, 29.

Ano an reaksyon ni Abraham? Aton mababasa: “Ini nga bagay uraura ka [mabug-at] ha paniplatan ni Abraham tungud ha iya anak nga lalaki.” Hinigugma niya hi Ismael, ngan diri niya maibabalewaray an iya pagin amay hito. Kondi klaro nga nakita ni Jehova an problema, salit nanginlabot hiya. Aton mababasa: “An Dios siniring kan Abraham: Diri mo igmakuri ha imo paniplatan tungud han bata, ngan tungud han imo sorogoon nga babaye; ha ngatanan nga kan Sara iginsiring ha imo, pamati-i an iya tingog; kay ha kan Isaak pagngangaranan an imo katulinan.” Ginpasarig ni Jehova hi Abraham nga diri niya papabay-an hira Hagar ngan Ismael. Tungod hito, namati an matinumanon nga hi Abraham.—Genesis 21:11-14.

Hi Sarah maopay gud nga asawa kan Abraham, usa nga sinsero nga padis. Diri la an karuyag mabatian ni Abraham an iya iginsumat ha iya. Han nakita niya an problema nga makakaapekto ha pamilya ngan han ira tidaraon, prangka nga nakiistorya hiya ha iya bana. Diri naton angay hunahunaon nga waray hiya respeto tungod han iya pagin prangka. Ngani ha urhi, gin-unabi hiya han inasaw-an nga apostol nga hi Pablo sugad nga susbaranan nga asawa nga may hilarom nga pagtahod ha bana. (1 Corinto 9:5; 1 Pedro 3:5, 6) Ha pagkatinuod, kon waray isumat ni Sarah an problema, masisiring nga waray niya tahora hi Abraham kay daku nga kadaot an mahimo magin resulta hito kan Abraham ngan ha bug-os nga pamilya. Mahigugmaon nga iginyakan ni Sarah an kinahanglan niya isumat kan Abraham.

Ginsusubad han damu nga asawa an susbaranan ni Sarah. Nahibaro hira nga magin tangkod ngan matinalahuron ha pakiistorya ha ira bana. May mga asawa nga bangin maghingyap usahay nga manginlabot hi Jehova sugad han iya ginhimo kan Sarah. Bisan pa hito, nahibaro hira tikang ha marig-on nga pagtoo, gugma, ngan pagpailob ni Sarah.

Bisan kon ginngaranan ni Jehova hin “Prinsesa” hi Sarah, waray hiya maglaom nga trataron hin sugad. Diri urusahon nga han namatay hiya ha edad nga 127, hi Abraham nasubo hinduro ngan nagtinangis. * (Genesis 23:1, 2) Ginmingaw gud hiya ha iya hinigugma nga “Prinsesa.” Sigurado nga ginmimingaw liwat hi Jehova hinin matinumanon nga babaye ngan karuyag Niya nga banhawon hiya ha paraiso nga tuna. Waray kataposan ngan makalilipay nga tidaraon an naghuhulat kan Sarah—ngan ha ngatanan nga nagsusubad han iya pagtoo.—Juan 5:28, 29.