MAY kilala ka ba nga Saksi nga binalhin ha iba nga nasud nga mas daku an panginahanglan hin magwarali han Ginhadian? Nahunahuna mo na ba ini nga mga pakiana: ‘Ano an nagpagios ha ira nga mag-alagad ha iba nga nasud? Paonan-o hira nangandam para hito nga klase hin pag-alagad? Mahihimo ko ba liwat ito?’ Basi mabaton ini, mas maopay nga kaistoryahon naton ini nga kabugtoan.

Ano an nagpagios ha imo nga mag-alagad ha iba nga nasud nga mas daku an panginahanglan? Hi Amy nga mga 35 anyos ngan taga-Estados Unidos, nagsiring: “Maiha ko na nga ginhinunahuna an pag-alagad ha iba nga nasud, pero baga hin imposible ko ito makab-ot.” Ano an nakapabag-o han iya panhunahuna? “Han 2004 usa nga mag-asawa nga nag-aalagad ha Belize an nag-imbitar ha akon nga bumisita ha ira ngan magpayunir kaupod nira ha sulod hin usa ka bulan. Kinadto ako, ngan naruyagan ko gud ito! Paglabay hin usa ka tuig, binalhin ako ha Ghana ngan nagpayunir didto.”

Hi Stephanie, nga hirani na mag-30 anyos ngan naukoy liwat ha Estados Unidos, nag-usisa han iya kahimtang pipira ka tuig na an naglabay. Hiya naghunahuna: ‘Mahimsog man ako ngan waray obligasyon ha pamilya. Salit mas damu pa an akon mahihimo para kan Jehova kay han akon nahihimo yana.’ Iton tangkod nga pag-usisa ha kalugaringon nagpagios ha iya nga bumalhin ha Ghana basi mapauswag an iya ministeryo. Hira Filip ngan Ida, mag-asawa nga payunir nga mga 50 anyos ngan naukoy ha Denmark. Hingyap gud nira an pagboluntaryo ha lugar nga mas daku an panginahanglan. Namiling hira hin mga paagi basi matuman ito. “Han nagkaada kami oportunidad,” siring ni Filip, “sugad hin nagsiring ha amon hi Jehova: ‘Sige, balhin kamo!’” Han 2008 binalhin hira ha Ghana ngan nag-alagad didto hin sobra tulo ka tuig.

 Hira Hans ngan Brook, mag-asawa nga payunir nga mga 30 anyos ngan nag-aalagad ha Estados Unidos. Han 2005, nagboluntaryo hira pagbulig ha mga naapektohan han bagyo nga Katrina. Ha urhi, nag-aplay hira para bumulig ha mga proyekto han internasyonal nga pagpanukod pero waray hira maaprobari. “Katapos,” nahinumdoman ni Hans, “napamatian namon an usa nga pahayag han kombensyon diin ginkarawat ni Hadi David nga waray hiya tuguti nga magtukod han templo, salit ginbag-o niya an iya tumong. Ito nga punto nakabulig ha amon nga masabtan nga diri sayop nga bag-uhon han usa an iya espirituwal nga mga tumong.” (1 Kron. 17:1-4, 11, 12; 22:5-11) Hi Brook nagdugang, “karuyag ni Jehova nga tumuktok kami ha iba nga purtahan.”

Han nabatian nira Hans ngan Brook an makalilipay nga mga eksperyensya han ira kasangkayan nga nag-aalagad ha iba nga nasud, napagios hira nga sarihan liwat ito. Han 2012, kinadto hira ha Ghana ngan nagpayunir hin upat ka bulan ha kongregasyon han sign language. Bisan kon kinahanglan nira bumalik ha Estados Unidos, an ira eksperyensya ha Ghana nagpahilarom han ira hingyap nga unahon an Ginhadian ha ira kinabuhi. Ha urhi, binulig hira ha proyekto han pagtukod ha sanga nga opisina han Micronesia.

Ano an imo ginhimo nga pagpangandam basi makag-alagad ha lugar nga mas daku an panginahanglan? “Nagsaliksik ako hin mga artikulo ha Barantayan may kalabotan ha pag-alagad ha lugar nga mas daku an panginahanglan,” siring ni Stephanie. * “Igin-istorya ko liwat ha mga tigurang ha kongregasyon ngan ha paramangno han sirkito ngan han iya asawa an akon hingyap nga mag-alagad ha iba nga nasud. Labaw ha ngatanan, agsob ko ig-ampo kan Jehova an akon tumong.” Ginpasimple liwat ni Stephanie an iya kinabuhi, salit nakatirok hiya hin kwarta nga iya magagamit ha pag-alagad ha iba nga nasud.

Hi Hans nagsiring: “Nag-ampo kami kan Jehova para hin giya kay karuyag  namon nga kumadto ha lugar nga karuyag niya nga kadtoan namon. Igin-ampo liwat namon an petsa kon san-o namon bubuhaton an amon plano.” Ini nga mag-asawa nagsurat ha upat nga sanga nga opisina. Han ginbalosan hira han sanga nga opisina han Ghana nga puydi hira magboluntaryo didto, kinadto hira ngan nagplano nga magpayunir ha sulod hin duha ka bulan. “Nalipay gud kami ha pakig-upod ha kongregasyon,” siring ni Hans, “salit nag-iha pa kami didto.”

Hira George ngan Adria, mag-asawa nga waray pa mag-40 anyos ngan taga-Canada, nahinunumdom pirme nga ginbibendisyonan ni Jehova an maopay nga desisyon, diri la kay an maopay nga motibo. Salit naghimo hira hin mga pitad basi makab-ot an ira tumong. Ginkontak nira an usa nga sister, nga binalhin ha Ghana basi mag-alagad ha lugar nga mas daku an panginahanglan, ngan nagpinakiana hira ha iya. Nagsurat liwat hira ha sanga nga opisina ha Canada ngan ha Ghana. Hi Adria nagsiring: “Namiling kami hin paagi nga mas mapasimple pa an amon kinabuhi.” Salit han 2004, nakagboluntaryo hira ha Ghana.

Ano nga mga pagsari an imo naeksperyensyahan ha pagboluntaryo ha iba nga nasud, ngan paonan-o mo ito nalamposan? Para kan Amy, kamingaw an siyahan niya nga nagin pagsari. “Iba gud an ngatanan ha akon nahiaraan.” Ano an nakabulig ha iya nga malamposan ito? “Kon gintatawagan ako han akon pamilya ngan ginsisidngan nga gin-aapresyar gud nira an akon pag-alagad, napapahinumdoman ako hito kon kay ano nga nagboluntaryo ako. Ha urhi, nag-iistorya kami pinaagi hin video chat. Tungod kay nakikita ko hira, baga hin hirani  la hira.” Hi Amy nagsiring nga an iya pakigsangkay ha eksperyensyado nga sister hito nga lugar nakabulig ha iya nga mahibaroan an iba-iba nga kustomre. “An akon sangkay an akon pirme gindadaop kon diri ko nasasabtan an reaksyon han mga tawo ha partikular nga butang. Pinaagi han iya bulig, hinbaroan ko kon ano an angay ko buhaton ngan likyan, ngan nakabulig gud ito basi magin malipayon ako ha ministeryo.”

Hira George ngan Adria nagsiring nga han bag-o pa la hira ha Ghana, inabat nira nga baga hin binalik hira ha kadaan nga panahon. “Imbes nga ha washing machine, ha planggana kami naglalaba. An pagluto hin pagkaon maiha hinduro kay han amon nahiaraan,” siring ni Adria. “Pero waray pag-iha, an baga hin makuri nga kahimtang nagin makalilipay nga eksperyensya.” Hi Brook nagsiring: “Bisan pa han mga ulang nga amon gin-aatubang sugad nga mga payunir, malipayon gud kami. Kon amon gintitirok an ngatanan nga makaparig-on namon nga eksperyensya, nagigin pariho ito hin makaruruyag nga bouquet nga amon ginpapabilhan.”

Kay ano nga gin-aaghat mo an iba nga buhaton ini nga klase han pag-alagad? “Makalilipay an pagsangyaw ha teritoryo nga an mga tawo interesado gud mahibaro han kamatuoran nga tungod hito karuyag nira magpa-Bible study kada adlaw,” siring ni Stephanie. “An pag-alagad ha lugar nga mas daku an panginahanglan usa han akon maopay gud nga desisyon!” Han 2014, nagpakasal hi Stephanie kan Aaron. Yana, nag-aalagad hira ha sanga nga opisina han Ghana.

Hi Christine, usa nga payunir nga taga-Alemanya ngan sobra 30 anyos, nagsiring: “Makalilipay gud ini nga eksperyensya.” Nag-alagad hiya ha Bolivia antes bumalhin ha Ghana. Hiya nagdugang: “Tungod kay hirayo ako ha akon pamilya, kan Jehova ako pirme nangangaro hin bulig. Mas nagin tinuod hiya ha akon. Naeksperyensyahan ko liwat an makatirigamnan nga pagkaurosa han katawohan ni Jehova. Nagin makalilipay gud an akon kinabuhi tungod hini nga klase han pag-alagad.” Hinin bag-o la, nagpakasal hi Christine kan Gideon, ngan padayon hira nga nag-aalagad ha Ghana.

Igin-istorya nira Filip ngan Ida an ira ginhimo basi mag-uswag an ira mga estudyante ha Biblia. “Kasagaran nga 15 o sobra pa an amon Bible study, pero ginlimitahan namon ito tubtob ha 10 basi mas matutdoan namon hira hin maopay.” Nagpahimulos ba an mga estudyante? Hi Filip nagsiring: “May gindumarahan ako nga batan-on nga hi Michael. Nag-aaram hiya kada adlaw ngan nag-aandam hin maopay ha amon pag-aram salit natapos namon an Igintututdo han Biblia nga libro ha sulod hin usa ka bulan. Katapos hito, nagin diri-bawtismado nga magwarali hi Michael. Ha iya siyahan nga pakigbahin ha pagsangyaw, nagpakiana hiya ha akon, ‘Puydi mo ba ako buligan ha akon mga Bible study?’ Nahipausa ako hito. Hi Michael nagsiring nga may-ada na hiya tulo nga estudyante ha Biblia ngan karuyag niya magpabulig ha pagdumara hin pag-aram.” Hunahunaa la, daku gud an panginahanglan hin mga magturutdo kay bisan an mga estudyante ha Biblia mga magturutdo na ha Biblia!

Igin-istorya ni Amy kon paonan-o niya nakita an daku nga panginahanglan: “Waray pag-iha katapos namon umabot ha Ghana, nagsangyaw kami ha usa nga gutiay nga baryo ngan namiling hin mga ngula. Ngan nakabiling kami, diri la usa, kondi walo nga ngula hito pa la nga baryo!” Hito nga panahon, hi Amy nagpakasal kan Eric, ngan nag-alagad hira sugad nga espesyal payunir. Nakikig-upod hira ha kongregasyon han sign language basi buligan an pipira han mga 300 nga ngula nga magwarali ngan an damu nga interesado hito nga nasud. Tungod han pag-alagad nira George ngan Adria ha Ghana, naeksperyensyahan nira mismo an kinabuhi han misyonero. Salit malipayon gud hira han gin-imbitar hira ha ika-126 nga klase han Gilead! Yana, misyonero hira ha Mozambique.

Makalilipay gud nga makita an damu nga nagbuboluntaryo tikang ha iba-iba nga nasud ngan maduruto nga nag-aalagad kaupod han kabugtoan ha Ghana basi bumulig ha pag-ani nga buruhaton. (Juan 4:35) Kada semana, 120 an aberids nga nababawtismohan hito nga lugar. Pariho han 17 nga binalhin ha Ghana basi mag-alagad ha lugar nga mas daku an panginahanglan, yinukot liwat nga magwarali ha bug-os nga kalibotan an “nagsasakripisyo ha pag-alagad” tungod han ira gugma kan Jehova. Nag-aalagad hira ha mga lugar nga mas damu nga magwarali han Ginhadian an ginkikinahanglan. Sigurado gud nga nalilipay hi Jehova hinin maduruto nga mga magwarali!—Sal. 110:3; Prob. 27:11.