Hi apostol Pablo alerto ha mga peligro han propaganda ni Satanas, pero diri ngatanan han iya igkasi-Kristiano may-ada hito nga disposisyon. Pananglitan, an pipira nga taga-Corinto posible nga nagkaada sobra nga kompyansa ha kalugaringon; naghuhunahuna hira nga marig-on gud hira ha kamatuoran ngan diri gud matutumba. (1 Cor. 10:12) Salit ginpahamangnoan hira ni Pablo: “Nababaraka ako nga bangin madaot an iyo mga hunahuna sugad kan Eva nga nalimbongan han halas ha tuso nga paagi, ngan diri na kamo magin sinsero ngan putli nga sadang niyo ipakita ha Kristo.”​—2 Cor. 11:3.

An pagpahayag ni Pablo hin kabaraka nagpapakita nga diri sadang magin kampante. Kon karuyag mo magdaog ha away ha imo hunahuna, kinahanglan mo hibaroan an mga peligro han propaganda ngan panalipdan an imo kalugaringon tikang hito.

Ano an propaganda? Hini nga konteksto, an propaganda amo an paggamit hin malimbong o sayop nga impormasyon basi kontrolon o maniobrahon an paghunahuna ngan paggios han mga tawo. Para ha pipira, pariho ito ha “pagbuwa, pagbaliko han impormasyon, panlimbong, pagmaniobra, pagkontrol ha hunahuna, [ngan] pakig-away ha hunahuna” ngan nag-uupod ito hin “maraot, nakakadaot, ngan diri patas nga mga taktika.”​—Propaganda and Persuasion.

Mationan-o kapeligroso an propaganda? Peligroso gud ito​—pariho ha diri nakikita, waray amyon, nakakahilo nga gas—​ngan hinay-hinay ito nga nakakaimpluwensya ha aton hunahuna. Tungod kay bangin diri naton nasasabtan kon ano gud an propaganda, hi Vance Packard nga espesyalista ha  paggawi han tawo nagsiring: “Damu ha aton an naiimpluwensyahan ngan nakukontrol​—nga diri gud naton nasasabtan.” Usa nga eskolar an nagsiring nga tungod han impluwensya han propaganda, an mga tawo “masayon la makabuhat hin peligroso gud nga paggawi”—​sugad han ‘pagpoohay hin lahi, pakiggirra, kapungot ha iba nga lahi, pagkontra ha relihiyon ngan damu nga iba pa nga maraot gud nga paggawi.’​—Easily Led—​A History of Propaganda.

Salit kon mahimo kita malimbongan han propaganda han tawo, sigurado nga labaw pa hito an mahihimo ni Satanas! Gin-adman na niya an paggawi han mga tawo tikang pa han ginlarang hira. “An bug-os nga kalibotan” yana kontrolado niya. Puydi niya gamiton an bisan ano nga bahin hito basi ipasarang an iya mga buwa. (1 Juan 5:19; Juan 8:44) Epektibo gud hi Satanas ha ‘pagbuta han hunahuna’ han mga tawo salit yana ‘nalilimbongan niya an bug-os nga inuukyan nga tuna.’ (2 Cor. 4:4; Pah. 12:9) Paonan-o mo maaatohan an iya propaganda?

Hi Jesus naghatag hinin simple nga paagi basi maatohan an propaganda: ‘Hibaroi an kamatuoran, ngan an kamatuoran maghahatag ha iyo hin kagawasan.’ (Juan 8:31, 32) Ha literal nga girra, an usa nga sundalo kinahanglan mahibaro kon diin hiya makakakuha hin tinuod ngan masasarigan nga impormasyon basi diri hiya malimbongan han mga taktika han kaaway. Hi Jehova nagtatagana han tinuod ngan masasarigan nga impormasyon. Ha Biblia, makikita mo an ngatanan mo nga ginkikinahanglan basi maatohan an propaganda ni Satanas.​—2 Tim. 3:16, 17.

Syempre, maaram hito hi Satanas, an pinakaeksperto maghimo hin propaganda. Salit ginagamit niya an iya kalibotan basi mawara an aton interes ha pagbasa ngan pag-aram han Biblia. Ayaw pagpalimbong ha iya tuso nga mga pamaagi! (Efe. 6:11, ftn.) ‘Sabota gud hin bug-os’ an kamatuoran. (Efe. 3:18) Kinahanglan mo gud mangalimbasog. Tigamni inin importante nga ginsiring han awtor nga hi Noam Chomsky: “Waray tawo nga magsusulod han kamatuoran ha imo utok. Ikaw mismo an kinahanglan magbiling hito.” Salit ‘pamilnga’ ito pinaagi ha ‘pag-usisa hin maopay han Kasuratan kada adlaw.’​—Buh. 17:11.

Tigamni nga karuyag ni Satanas nga diri magin matin-aw ha imo hunahuna an mga butang o diri mo ito hunahunaon hin maopay. Kay ano? Tungod  kay an propaganda “nagigin mas epektibo” kon an mga tawo “diri naghuhunahuna hin maopay.” (Media and Society in the Twentieth Century) Salit ayaw dayon karawata an imo nababatian o tumuod dayon hito. (Prob. 14:15) Gamita an regalo ha imo han Dios nga abilidad ha paghunahuna ngan pangatadongan basi mapamatud-an mo mismo kon ano an kamatuoran.​—Prob. 2:10-15; Roma 12:1, 2.

An propaganda mahimo gamiton sugad nga estratihiya ha pakig-away basi paluyahon an determinasyon han mga sundalo nga magpadayon ha pakig-away. Bangin mag-aghat ito nga mag-araway mismo an kakontra nga mga sundalo o maglimbong ha ira nga bumulag ha grupo. Sumala ha usa nga Aleman nga heneral, an usa nga rason han ira kapirde ha Girra ha Kalibotan I amo an kaimpluwensyahi han mga tawo han propaganda nga sugad hin ginkukontrol hira hito. Ginagamit liwat ni Satanas ito nga taktika basi madaot an pagkaurosa. Pananglitan, naniningkamot hiya nga magkaada diri pagkauruyon ha sulod han kongregasyon o aghaton an mga indibiduwal nga bumulag ha organisasyon ni Jehova tungod han ira ginhuhunahuna nga kawaray-hustisya o sayop.

Ayaw palimbong! Pagpagiya ha Pulong han Dios. Pananglitan, basi matipigan an pagkaurosa han kabugtoan, an Biblia nag-aaghat ha kada tagsa nga padayon nga “kinasingkasing nga magpinasayloay” ngan sulbaron dayon an diri pagsinabtanay. (Col. 3:13, 14; Mat. 5:23, 24) Ginpapahamangnoan gud kita hito nga diri bumulag ha kongregasyon. (Prob. 18:1) Sarihi kon marig-on an imo mga depensa ha mga propaganda ni Satanas. Pakianhi an imo kalugaringon: ‘Han naglabay, ano an nagkontrol han akon hunahuna han nagkaada kami diri pagsinabtanay han usa nga bugto? An espiritu ba han kalibotan o an espiritu han Dios?’​—Gal. 5:16-26; Efe. 2:2, 3.

An sundalo nga nawawarayan na pagtapod ha iya lider diri na maniniguro pakig-away. Salit an mga naghihimo hin propaganda nangangalimbasog nga wad-on an pagtapod han usa nga sundalo ha iya kumander. Bangin gumamit hira hin propaganda nga nasiring: “Diri matataporan an iyo mga lider!” ngan “Ayaw pagpadara ha ira, maghihikaraot la kamo!” Basi magin epektibo an ira taktika, bangin mamiling hira hin mga sayop hito nga mga lider ngan salingabuton ito. Ini an ginhihimo ni  Satanas. Naniniguro gud hiya nga wad-on an imo pagtapod ha mga tawo nga ginagamit ni Jehova ha pagpanguna ha Iya katawohan.

Paonan-o mo madidepensahan an imo kalugaringon? Magin determinado nga magpabilin ha organisasyon ni Jehova ngan maunungon nga suportari an iya mga ginagamit ha pagpanguna ha iya katawohan​—anoman nga mga kaluyahan an bangin makita mo ha ira. (1 Tes. 5:12, 13) Ayaw ‘dayon kalisang o kataranta’ kon nakakaeksperyensya hin baga hin nakakadaot nga mga pag-atake han mga apostata o iba pa nga naglilimbong ha hunahuna​—bisan kon baga hin tinuod an ira ginsisiring. (2 Tes. 2:2; Tito 1:10) Iaplikar an iginsagdon ha batan-on nga hi Timoteo. Tipigi an kamatuoran nga imo hinbaroan, ngan hinumdumi kon kan kanay mo ito hinbaroan. (2 Tim. 3:14, 15) Damu gud an pamatuod nga makakasarig ka ha mga representante nga ginagamit ni Jehova ha sulod hin haros usa ka siglo na yana basi manguna ha aton ha dalan han kamatuoran.​—Mat. 24:45-47; Heb. 13:7, 17.

Tigamni nga diri pirme tuso nga mga propaganda an ginagamit ni Satanas. Usahay, nagamit hiya hin panarhog​—“usa han pinakadaan nga klase hin propaganda.” (Easily Led​—A History of Propaganda) Pananglitan, usa nga propesor nga taga-Britanya nga hi Philip M. Taylor an nagsurat nga ginkukontrol han mga Asiryahanon an ira mga kaaway gamit an “panhadlok ngan propaganda.” Gagamiton ni Satanas an kahadlok ha tawo, kahadlok ha pagtimaraot, kahadlok ha kamatayon, ngan an iba pa nga klase hin negatibo nga kahadlok basi kontrolon ka ngan umundang ha pag-alagad kan Jehova.​—Isa. 8:12; Jer. 42:11; Heb. 2:15.

Ayaw tuguti nga gamiton ni Satanas an kahadlok basi paluyahon an imo determinasyon o wad-on an imo integridad. Hi Jesus nagsiring: “Ayaw kamo kahadlok ha mga nakakamatay han lawas ngan waray na nahihimo katapos hito.” (Luc. 12:4) Sarig hin bug-os ha saad ni Jehova nga hiya magbabantay ha imo, maghahatag ha imo han “diri-ordinaryo nga gahum,” ngan mabulig ha imo nga diri magkompromiso ha anoman nga panarhog.​—2 Cor. 4:7-9; 1 Ped. 3:14.

Syempre, bangin makaeksperyensya ka hin makaharadlok ngan makapaluya nga mga hitabo. Pero hinumdumi an pagdasig ni Jehova kan Josue: “Magpakabaskog ka ngan magmadasigon: ayaw patarhug ngan ayaw man liwat kaholop: kay hi Jehova nga imo Dios maupud ha imo bisan ngain ka kadto.” (Jos. 1:9) Kon may mga ginkakabarak-an ka, isumat dayon ito ngatanan kan Jehova pinaagi ha pag-ampo. Makakasarig ka nga ‘an kamurayawan han Dios magbabantay han imo kasingkasing ngan han imo panhunahuna’ basi magkaada ka kusog ha pag-ato ha ngatanan nga propaganda ni Satanas.​—Fil. 4:6, 7, 13.

Nahinunumdoman mo ba an propaganda nga gin-gamit han representante han Asirya, an Rabsake, kontra ha katawohan han Dios? Baga hin nasiring hiya nga ‘Waray makakapanalipod ha iyo tikang ha Asirya. Bisan an iyo Dios nga hi Jehova waray mahihimo para ha iyo.’ Waray kahadlok hiya nga nagsiring: ‘Hi Jehova mismo an nagsugo ha amon nga gunawon ini nga tuna.’ Ano an baton ni Jehova? “Ayaw kahadluk han mga polong nga imo hinbatian, nga tungud hini an mga sorogoon han hadi ha Asiria nagtampalas ha akon.” (2 Hadi 18:22-25; 19:6) Katapos, nagpadara Hiya hin anghel basi poohon an 185,000 nga Asiryahanon ha usa la kagab-i!—2 Hadi 19:35.

Nakakita ka na ba hin pelikula diin nakikita mo nga klaro nga ginlilimbongan ngan ginkukontrol an usa nga tawohan? Naaghat ka ba nga sumiring: “Ayaw pagtuod hito! Gin-iinuwat ka nira!” Kon sugad, handurawa nga ito liwat an gin-guguliat ha imo han mga anghel: “Ayaw pagpauwat ha mga buwa ni Satanas!”

Salit ayaw pamati ha propaganda ni Satanas. (Prob. 26:24, 25) Pamati kan Jehova ngan sarig ha iya ha ngatanan mo nga ginhihimo. (Prob. 3:5-7) Sugta an iya mahigugmaon nga hangyo: “Anak ko, pagmakinaadmanon, ngan himoa an akon kasingkasing nga malipayon.” (Prob. 27:11) Ha pagbuhat hito, madadaog mo an away ha imo hunahuna!