HI Josue inatubang hin diri harumamay nga toka. Kinahanglan niya pangunahan an nasud han Israel ngadto ha Tuna nga Iginsaad bisan pa han dagku nga ulang. Pero ginpasarig hiya ni Jehova nga maglalampos hiya, ngan gindasig hiya: ‘Magpakabaskog ka ngan magmadasigon. Buhata an akon balaud. Magpalandong [o magbasa] ka hito ha adlaw ngan gab-i, nga mabantayan mo pagbuhat sumala han ngatanan nga nahisurat dida. Dida hito ikaw mag-uuswag [o maglalampos] ngan mamamayada ka maopay nga kauswagan [o magios nga maaramon].’​—Jos. 1:7, 8.

Hinin “peligroso gud nga mga panahon nga makuri pakiangayan,” kita liwat naatubang hin magkuri nga kahimtang. (2 Tim. 3:1) Pariho kan Josue, mahimo kita maglampos pinaagi han pagsunod ha iginsagdon ni Jehova ha iya. Mahimo naton basahon an Biblia hin regular ngan iaplikar hin maopay an mga prinsipyo hito ha mga pagsari nga aton gin-aatubang.

Pero may pipira ha aton nga bangin diri maaram kon paonan-o mag-aaram, o bangin diri kita nalilipay pag-aram. Kondi tungod kay an pag-aram ha Biblia importante gud, repasoha an kahon nga “ Sarihi Ini nga mga Suhestyon” nga naghahatag hin mag-opay nga suhestyon basi an imo pag-aram magin mas epektibo ngan makalilipay.

“Pagpasunda ako dida ha dalan han imo mga sugo,” nagkanta an salmista, “kay dida hito nalilipay ako.” (Sal. 119:35) Malilipay ka gud ha pag-usisa ha Pulong han Dios. Makakadiskobre ka hin presyoso nga mga hiyas samtang namimiling ka hin espirituwal nga mga bahandi.

Bisan kon diri mo kinahanglan manguna hin nasud sugad han ginbuhat ni Josue, may-ada ka aatubangon nga magkuri nga kahimtang. Salit pariho kan Josue, admi ngan buhata an iginsurat para ha imo kaopayan. Kon bubuhaton mo ito, ikaw liwat magigin malampuson ngan magios nga maaramon.