ANTES ito mahitabo, interesado na ako ha kamatuoran ha Biblia. May mga publikasyon hi Nanay nga basado ha Biblia, ngan naruyagan ko gud ito labi na an mga retrato. Nadiri hi Tatay nga tutdoan ako ni Nanay han iya mga nahibabaroan. Pero tungod kay interesado ako ngan damu an akon pakiana, nagba-Bible study kami ni Nanay kon waray hi Tatay. Salit nagdesisyon liwat ako nga magdedikar kan Jehova. Nabawtismohan ako ha Blackpool, Inglatera, han 1943 han dyes anyos ako.

Tikang hito nga panahon, pirme na kami ni Nanay magkaupod ha pagsangyaw. Ginagamit namon an ponograpo ha pagsangyaw han mensahe han Biblia. Daku an ponograpo ngan mga upat hin tunga ka kilo an kabug-aton hito. Hunahunaa la an usa nga bata nga may dara-dara hito!

Han 14 anyos ako, karuyag ko magpayunir. Ginsidngan ako ni Nanay nga makiistorya  anay ha surugoon han kabugtoan (gintatawag yana nga paramangno han sirkito). Nagsuhestyon an bugto nga mamiling anay ako hin trabaho nga makakasuporta ha akon pagpayunir. Ngan ito an akon ginhimo. Paglabay hin duha ka tuig, nakiistorya liwat ako ha usa nga paramangno han sirkito. Siring niya, “Sige, maopay ito!”

Salit han Abril 1949, igindispatsar namon ni Nanay an amon mga muwebles ha amon ginpipletehan nga balay ngan binalhin ha Middleton, hirani ha Manchester, diin nagtikang kami pagpayunir. Paglabay hin upat ka bulan, nagpili ako hin brother basi makapartner ko ha pagpayunir. Ginsidngan kami han sanga nga opisina nga bumalhin ha bag-o nga naporma nga kongregasyon ha Irlam. Hi Nanay nagpayunir kaupod hin usa nga sister ha iba nga kongregasyon.

Bisan kon 17 anyos pa la ako, kami ngan an akon partner an gintokahan ha pagdumara han mga katirok tungod kay pipira la an kwalipikado nga brother hito nga kongregasyon. Ha urhi, ginpabalhin ako ha kongregasyon ha Buxton, diin gutiay gud la an magwarali ngan daku an panginahanglan. Ito nga mga eksperyensya gintagad ko gud sugad nga pagbansay para ha mga toka ha tidaraon.

Han 1951, nag-aplay ako para ha Watchtower Bible School of Gilead. Pero han Disyembre 1952, ginpatawag ako basi magsundalo. Naghangyo ako kon puydi nga diri ako magsundalo kay bug-os-panahon ako nga ministro, pero waray karawata han korte  an akon rason ngan ginsentensyahan ako hin unom ka bulan nga kaprisohan. Samtang priso, nakarawat ko an imbitasyon para ha ika-22 nga klase han Gilead. Salit pakagawas ko han Hulyo 1953, nagbiyahe ako tipakadto ha New York sakay han barko nga gintatawag nga Georgic.

Pag-abot ko didto, nakatambong ako han 1953 nga New World Society Assembly. Katapos, sumakay ako hin tren pakadto ha South Lansing, New York, diin nahimumutang an eskwelahan. Tungod kay pakakagawas ko pa la ha prisohan, gutiay la an akon kwarta. Paghaw-as ko ha tren sumakay liwat ako hin bus pakadto na mismo ha eskwelahan, pero kinahanglan ko manhuram hin 25 sentabos ha igkasi-pasahero para makapamasahe.

An maopay nga pagbansay nga akon nakarawat ha Gilead School nakabulig gud ha akon nga ‘makiangay ha ngatanan nga klase hin tawo’ ha akon pagmisyonero. (1 Cor. 9:22) Kami nga tulo nira Paul Bruun ngan Raymond Leach igintoka ha Pilipinas. Kinahanglan namon maghulat hin pipira ka bulan para han amon visa. Katapos, nagbiyahe kami sakay hin barko pakadto ha Rotterdam, Dagat Mediteranyo, Suez Canal, Kadagatan han India, Malaysia, ngan Hong Kong. Paglabay hin 47 ka adlaw ha kadagatan, inabot gihapon kami ha Manila han Nobyembre 19, 1954.

Nagtikang kami magpahiuyon ha bag-o nga kultura, bag-o nga nasud, ngan bag-o nga linggwahe. Pero ha tinikangan, igintoka kami ha usa nga kongregasyon ha Quezon City nga damu an nagyayakan hin Ingles. Salit paglabay hin unom ka bulan, gutiay la an amon nahibaroan nga Tagalog. Pero an amon sunod nga toka makakabulig nga masulbad ito.

Usa ka adlaw han Mayo 1955, pag-uli namon ni Bugto Leach tikang ha pagsangyaw, may nakita kami nga mga surat ha amon gin-uukyan. Hinbaroan namon nga igintoka kami sugad nga mga paramangno han sirkito. Hito nga panahon, 22 anyos pa la ako, pero ito nga toka nagtutdo ha akon kon paonan-o pa ‘makikiangay ha ngatanan nga klase hin tawo.’

Pananglitan, gindumara ko an akon siyahan nga pahayag publiko sugad nga paramangno han sirkito ha atubangan han tindahan ha usa nga baryo. Hinbaroan ko nga kustomre ngay-an ha Pilipinas hito nga panahon nga an pahayag publiko gindudumara ha panpubliko gud nga mga lugar! Kon nabisita ako ha mga kongregasyon ha sirkito, gindudumara ko an akon pahayag publiko ha panpubliko nga mga gazebo, merkado, atubangan han munisipyo, basketball court, parke, ngan agsob ha mga kalsada han syudad. Makausa, han binisita ako ha San Pablo City, waray madayon an akon pahayag publiko kay makusog an uran salit ginsidngan ko an nangunguna nga mga brother ha kongregasyon nga himoon ito ha Kingdom Hall. Katapos han pahayag, ginpakianhan ako nira kon mairireport ba ito sugad nga panpubliko nga katirok bisan kon waray ito dumaraha ha panpubliko nga lugar!

Balay han kabugtoan an akon akomodasyon. Bisan kon simple la an ira balay, malimpyo ito. Agsob nga nahigda ako ha salog nga may banig. Kasagaran na nga waray ripot nga karigoan ha akon gin-uukyan, salit nahibaro ako pagkarigo nga nakikita han iba. Nagbibiyahe ako sakay hin jeep ngan bus ngan usahay hin baluto kon nakadto ha mga isla. Tikang pa hadto, waray gud ako magkaada kalugaringon nga sarakyan.

Waray ako mag-eskwela basi mag-aram hin Tagalog. Nahibaroan ko ito pinaagi ha pagpamati ha kabugtoan durante ha pagsangyaw ngan ha mga katirok. Karuyag han kabugtoan nga buligan ako nga mahibaro han linggwahe, ngan mapasalamaton gud ako han ira pagpailob ngan sinsero nga mga komento.

Paglabay han panahon, kinahanglan ko magpahiuyon tungod han bag-o nga mga toka. Han binisita hi Bugto Nathan Knorr han  1956, gintokahan ako ha pakigkomunikar ha media para ha nasyonal nga kombensyon. Waray pa ako eksperyensya hito, salit ginbuligan ako han iba nga kabugtoan. Paglabay hin haros usa ka tuig, nagkaada usa pa nga nasyonal nga kombensyon ngan hi Bugto Frederick Franz an bisita tikang ha headquarters. Samtang nag-aalagad sugad nga paramangno han kombensyon, nahibaro ako tikang ha ehemplo ni Bugto Franz ha pagin andam nga magpahiuyon ha mga tawo. Nalipay gud an kabugtoan han nakita nira hi Bugto Franz nga nakasul-ot hin Barong Tagalog han nagdumara hin pahayag publiko.

Han igintoka ako sugad nga paramangno han distrito, kinahanglan ko na liwat magpahiuyon. Hito nga panahon, kasagaran nga iginpapasalida namon an The Happiness of the New World Society ha panpubliko nga mga lugar. Usahay nadidisturbo kami hin mga insekto. Nadadani an mga insekto ha suga han projector ngan nandudukot dida hito. Daku gud nga trabaho an paglimpyo hito katapos han pasalida! Diri masayon an pagdumara hini nga mga pasalida, pero makalilipay gud nga makita an mga tawo nga nahibabaro mahitungod han bug-os-kalibotan nga organisasyon ni Jehova.

Ha pipira nga lugar, gindidid-an han mga padi nga Katoliko an mga opisyal nga tagan kami hin permiso nga magdumara hin mga asembleya. Gintutuyo liwat nira nga patunugon an bagtingan ha ira singbahan basi diri mabatian an amon mga programa. Bisan pa  hito, nag-uswag an buruhaton, ngan damu an nagin magsiringba ni Jehova hito nga mga lugar.

Han 1959, igintoka ako nga mag-alagad ha sanga nga opisina. Tungod hini, mas damu pa an akon nahibaroan. Paglabay hin pipira ka panahon, igintoka ako ha pagbisita ha iba-iba nga nasud. Ha usa hini nga mga pagbiyahe, nakilala ko hi Janet Dumond, usa nga misyonera ha Thailand. Nagsuratay kami hin pipira ka panahon ngan ha urhi nagpakasal kami. Singkwenta-y-uno ka tuig na kami nga malipayon nga nag-aalagad kan Jehova sugad nga mag-asawa.

Ha kabug-osan, nakapribilehiyo ako nga mabisita an katawohan ni Jehova ha 33 nga nasud. Mapasalamaton gud ako nga an akon mga toka han naglabay nakabulig ha akon nga hibaroan kon paonan-o makikiangay ha iba-iba nga tawo! An akon pagbisita ha magkalain-lain nga nasud nakabulig ha akon nga mas masabtan nga hinigugma gud ni Jehova an ngatanan nga klase hin tawo.​—Buh. 10:34, 35.

Makalilipay gud nga mag-alagad kaupod an kabugtoan ha Pilipinas! Mas damu na yana an magwarali kay han nagtikang ako ha pag-alagad dinhi. Padayon kami ni Janet nga nag-aalagad ha sanga nga opisina ha Quezon City. Bisan kon sobra 60 ka tuig na ako nga nag-aalagad ha iba nga nasud, kinahanglan ko pa gihapon magin andam ha pagpahiuyon ha iginsusugo ni Jehova. Tungod han mga pagbag-o ha organisasyon, kinahanglan namon magpabilin nga mapauyon-uyon ha amon pag-alagad ha Dios ngan ha kabugtoan.

Nangangalimbasog kami nga buhaton kon ano an kaburut-on ni Jehova, ngan ini an pinakamakapatagbaw nga pagkinabuhi. Nangangalimbasog liwat kami nga maghimo hin ginkikinahanglan nga mga pagbag-o basi makagserbi hin maopay ha kabugtoan. Oo, determinado kami nga buhaton an kaburut-on ni Jehova ngan ‘makiangay ha ngatanan nga klase hin tawo.’