Nakikilala ka diri la ha imo ngaran ngan ha imo postura. Nakikilala ka liwat ha imo prinsipyo, gintotoohan, ngan personalidad. Oo, an imo pangirilal-an nag-uupod han ngatanan nga may kalabotan ha imo—ha sulod ngan ha gawas han imo pagkatawo.

Kon may-ada ka marig-on nga pangirilal-an, gintitindogan mo an imo gintotoohan imbes nga magpakontrol ha imo kasangkayan.

“Damu nga tawo an pariho hin manikin nga nakadispley ha tindahan. Diri hira an nagpipili han ira iginsusul-ot, kondi an iba nga tawo.”—Adrian.

“Nahibaro ako pagtindog ha kon ano an husto bisan kon makuri ito. Maaram ako kon hin-o an akon tinuod nga mga sangkay pinaagi ha kon paonan-o hira gumawi ngan kon ano an akon panggawi kon kaupod ko hira.”—Courtney.

PRINSIPYO HAN BIBLIA: “Ayaw na kamo pagpamolde hini nga sistema han mga butang, kondi magbag-o kamo pinaagi ha pagbag-o han iyo panhunahuna.”—Roma 12:2.

Kultibara kon ano ka nga klase hin tawo yana ngan kon ano nga klase hin tawo karuyag mo magin pinaagi ha pagpamalandong han imo mag-opay nga kalidad, kaluyahan, ngan gintotoohan. Usa nga maopay nga paagi ha pagtikang amo an pagbaton han masunod.

Mag-opay nga kalidad: Ano an akon mga talento ngan abilidad? Ano an akon mag-opay nga kalidad? (Pananglitan: Naabot ba ako hin temprano? may pagpugong ha kalugaringon? maduruto? mahinatagon?) Ano nga mapulsanon nga mga butang an akon ginbubuhat?

SUHESTYON: Nakukurian ka ba paghunahuna hin mag-opay nga kalidad mahitungod ha imo kalugaringon? Magpakiana ha usa nga kag-anak o sangkay nga imo gintataporan kon ano an ira nakikita nga mag-opay mo nga kalidad ngan kay ano.

PRINSIPYO HAN BIBLIA: “Usisahon han kada tagsa an iya mga buhat, ngan magkakaada hiya hinungdan nga malipay gud ha iya la kalugaringon, ngan diri igintatanding an iya kalugaringon ha iba nga tawo.”—Galacia 6:4.

Mga kaluyahan: Ano nga mga bahin han akon personalidad an angay ko gud pauswagon? San-o ako labi nga masayon masulay? Ha ano nga mga sitwasyon labi nga nagkikinahanglan ako hin dugang nga pagpugong?

PRINSIPYO HAN BIBLIA: “Kon magsiring kita, ‘Waray kita sala,’ ginlilimbongan naton an aton kalugaringon.”—1 Juan 1:8.

Mga gintotoohan: Ano an akon mga suruklan ha moral, ngan kay ano? Natoo ba ako ha Dios? Ano nga ebidensya an nakakombinse ha akon nga naeksister hiya? Ano nga mga buhat an akon gintatagad nga diri husto, ngan kay ano? Ano an akon gintotoohan nga mahitatabo ha tidaraon?

PRINSIPYO HAN BIBLIA: “An abilidad ha paghunahuna padayon nga magbabantay ha imo, ngan an husto nga pagturotimbang magpapanalipod ha imo.”—Proberbios 2:11.